Gedeo Bible
Zekkaaryaasikaa Raaga 7
Dhugaatixxi Murtenna Mararte Eeyendeexxeni
Moyaanji Daariyoosi moyeexxe shoolgaxxe wogga'ni Kaaseelu hiyyemaake sallanike agenjixxe shoolgaaxxe barra'ni Duuchchi Woddike Goottiki hiyyichchi Zekkariyaasi'ni dage. Beeteliki manni Saar'etseeriinna Regeemelekii'i mitteba hedhemmake manninni welti Duuchchi Woddika Gootta soodanto'a ergine. Insa'nenna Lumoke Duuchchi Woddike Goottike Galmixxa qeesenna wabeeko hine qorree qici, «Ta'i qico'ni heddo wogga'ni assineennashsha ondike agenjo'ni yaanda'ni agabo goddo hosa no'o'a hasissaa?» hine qorre.
Ookkonneechchi uduma lumoke Duuchchi Woddike Goottiki hiyyichchi ane'ni dage hiyyee qici, «Butta duuchchika ardanna qeesee hite qortatto qici, ‹Saxxeexxe torbaane tomme wogguwwake ondikenna torbake agenjo'ni agabo goddo hosinaammakinna yaaddinaammaaki dhugaanda ani'atemmata? Itinna'ninna ha'witina'ni hexxinemmaki umo ha'nongeetemmabaata? Iyyerusaaleminna qarqara iseke'ni hedheeki qachchuwwi duroome nage'iki hedhaa'naa bita'ikenna dhidhimiinke tulchuwwike kasuwwa'n manni hedhaamma wodda Duuchchi Woddiki Gootti edixxe wabeeko darree'ni haaso'emmaki haaso'i konnenidemmabaa?› »
Duuchchi Woddike Goottiki hiyyichchi higgeenna Zekkaariyaasi'ni dage'e hiyyee qici, «Lumoki Duuchchi Woddiki Gootti hiyya'nee qici, ‹Dhugaatixxa murte murre; weli'aanni weli marartine ba'latte. Aro'o shi'witeexxa melaalle, yookaani annakanna ama afebaaxxa yookaan alaga, yookaani hiyyeessa rakkissinoqe'e; godoba ha'nooki giddonna mitti mittekee fuggoxxa hedinoqqe'e.›
«Yaane kinni insa'ne gooba micciidhdhine laqa ginbe; lanqabaashshanna dudduro wirri hine; manshatanna tuphe'ne. Godoba ifikanna cabbetike kinjishsha jabeesse'ne; Lumoki Duuchchi Woddiki Gootti edixxe wabeeko darree'ni ifike hafuurinni ergemaaka hiyyichcho yookaani seera lanqebaani; tennexxee Lumoki Duuchchi Woddiki Gootti yo'oshsha mufate.
« ‹Ani insa'nee ye'enne wodda laqebaani; tennexxee insa'nenna anee ye'ee'naa wodda laqabe'no› hiyya'neeni lumoki Duuchchi Woddiki Gootti. ‹Insa'ne egenebaake gosa gosake ardi giddo diidalloti insa'nee xexxeerenne; insa'ne uduma huuni manjinna ookko'a dagaakinna ookko'a maraaki hedhabaa qico'ni bogi insa'neki urumme gate; shamoka insa'neka boga urmake assennechchi tennexxeeteni.› »
Gedeo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.