Skip to content
BibleKenya

Gedeo Bible

Zekkaaryaasikaa Raaga 3

Qeesetike Akeekisanji'a Kaddaaxxa ca'itte Seemma

Ookkonneeechchi uduma Duuchchi Woddiki Gootti qeesoletika akeekisanjo Iyyaasuu Duuchchi Woddike Goottike iimike erganji edo uurreena'a, durriisikinna isoo ku'lo'a middi darre'n uurree'naa ane'n leellishe.1 Duuchchi Woddiki Goottinna durriisa «Koo duriisa Duuchchi Woddiki Gootti atee xixo'o: Iyyerusaalemi'i fi'leeki Duuchchi Woddiki Gootti atee xixo'o: isi kunni manjichchi giirati giddii'n butemeeke itisanjobaata?» hiyye.2 Iyyaasuunna xuritte seemma oddo'weexxi iimike erganji edo uurreemman. Iimiki erganjinna isi edo ergataammakara, «Tennee xuritte seemma isonaa'n fulche» hiyye: ookkonneechchi uduma erganjikinna Iyyasuu'u «kunnise ani cubbo atixxa atenaa'n fuggusseenneni; eloxxa seemmanna ate'ni oddeessannoni» hiyye. Aninna, «Isike umo'n ca'axxa ruufa ugge» hiyyeenne; Duuchchi Woddike Goottiki iimik erganji Iyyaasu bira uurree'naa umo isike'n ca'itte ruufa uggineexxi seemmatanna oddeessine. Ookkonneechchi uduma Duuchchi Woddike Goottik iimik erganji Iyyaasuu xexxe'achisa'n hiyyee qici, «Lumok Duuchchi Woddik Gootti atee'e hiyya'nee qici, ‹Ora anke'n me'itottole ajaja anka heqqexxottole, mine anka galchitattoni: anxe baxxuwwa'n akeekisanjoke assannoni; kaba uurreekirixxe oddo'ni bakka ati'a uwwannon.

« ‹Koo qeesetike akeekisanjo Iyyaasuu laqi; kunni ati edo ofo'la'neeki atiki gargaarsanjuwwinna edi'a dagga'neexxe yaane'a beessisa kada'neeke manninna laqowwaal; Dame3 hiyyemeeka anka erganjo iyyedagannon. Uuddi Iyyaasuu edo uggeenneka kinjoo! Ookkone mitte kinjo'ni hana torbaane ille hexxeeni; ookkonee kinjo'ninna borreessa qunqume giissannoni; konne bogixxa cubbonna mitte barra'n fugussannoni› hiyya'neni dada duuchcha ajajaki Duuchchi Woddiki Gootti.

« ‹Eettene barra'ni mitti mittingi manji ifi ifike woyyinetikenna odi'iinke hiddichchi hudda ofo'lee olla'a ifika ye'eexxi itisaani› hiyya'neeni Lumoki Duuchchi Woddiki Gootti.»

Source notes (3)
  1. Cross-reference Izr. 5:2; Wal. 12:10.
  2. Cross-reference Yih. 9.
  3. Cross-reference Erm. 23:5; 33:15; Zek. 6:12.

Gedeo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.