Skip to content
BibleKenya

Gedeo Bible

Mammaassiinkaa Maxaafa 1

Muxxummatike Haaso'iixxa La'o

Isira'eelika moyanjo, Daawwitika belto, Solomooni mammaassuwwa1

Muxxumma la'oofatateenna cabbematee,

ege'natika hiyyichchuwwa qalbeeffachchotee;

Iittanni qullummanna seeriinxanna toggitte murte uwwatee;

cabbendeexxa muxxe hedho hedhatee,

Oosommataake manni'a qalbeffachcho,

reefixxe oose'a ege'natanna elo yo'ooxxa gargari mellatee;

Beekkole tennee laqqeexxi barachchonde'n barachcho lephphituun;

qalbeeffataakiirinna akkeette alfuun.

Tinninna beekkoletika mammaassuwwanna fakkeennuwwiinxa tika,

hiyyichchuwwakanna hiibbuwwa qalbeeffantaashshaten.

Dargaggeeyyetee Gorsa

Duuchchi Woddika Gootta sodaata muxxummatike ke'iton;

balalichchi manni kinni muxxummatanna cabbema tuffataani.2

Anke beltoo! Atike annika gorsa caqasi;

ama atixxi uuttaaxxa barachchiisanna gibboxxe'e.

Isenna ati'a ulfinna lebammake umiinke kallachchishshanna,

gooba atika danchoossitammaxxe ellellashshaten.

Anke beltoo! Cubballeeyye atee maxxissoole,

ishshi hitoxxe'e.

Insa'nenna atee, «Munde dunatee'e,

no'onni welti amo rinphoo,

balleessa afebaake manji'a sho'ommennexxi fonxoro ugginoo!

Hirreesiinxe, bale giddo sa'nammashsha,

lubbondinni he'nee'naa insa'nee liqiinsinoo!

No'onna yo'oshsha fiixeeka bifa bifaka mi'yuwwa alfinannoni; saammenechchooranna mine no'oke'n wo'nshe'nannon,

No'oni welti guddi;

Saammennexxa karranna atinni qoodemmannon» hinoole;

Anke beltoo! Insa'nenni welti me'itoxxe'e;

me'inaake oranaa'ninna lekka atixxa hoyyedhi.

Lekka insa'neexxinna cubbotibaa gongitaan;

munde dunateenna wiinandaan.

Ci'a uuddaa'naa'a uggendeexxi fonxoro,

toliinxen;

Yaane kinni kunni manni ripheedheeki ifike uminxe munde'niten;

gaanda'neekinna ifinge umo calla'nten.

Seeri belo ifike umixxe la'o'aa gongaakeerik muuxami iittanden;

itti bukki asse'nemmaxxi karranna,

lubbo insa'neexxa aaxxee saxxaan.

Muxxumma Gibaakeeri'a Uwwendeexxa Xexxe'achchiisa

Muxxumma orake'n hexxee yexxa'neen;

weldeennatenaa'ninna ifika hafuura gikki assitee laqissa'neen.

Canci bira sa'eeke boonchonaa'n yexxa'neen;

ookkone qachchi giddi'a e'yatixxe hula'ni hexxe:3

«Ha'no ege'na xe'yiteekiir! Haani qici'a xe'ya ege'naaka ha'nooka ora eettinaa?

Gacifataakiir gacifachchote'n gammada'neek,

gowwooletinna ege'na gibaak haani qici'aate?

Xixichcho anka laqqina'neele,

yaada anka silaat ha'noo giddo uggannan;

ank hiyyichchinna silaat ha'noo'n ege'nemaashsha assannan.

Yaane kinni ye'enne wodda gibbinemmaxxee'e,

anga farri assenne woddanna ayyinna macci hiyyeek hedha gophemmaxxee'e,

Gorsa anka duuchcha bashshi hitnemmaxxee'e;

anka xixichchonna adhdha gophinemmaxxee'e,

Tennexxee rakko ha'noo'ni geltaa wodda ani ha'noo'ni oso'lannon;

ba'ne ha'nooni dagaa wodda ani ha'noo'n gacifatannon.

Ba'ne ha'noo danbala'iinsha wishshaa wodda,

rakkotinna ha'noo hobonbaltetishsha filtaa wodda,

wixxirri hiyyatinna abari ha'noo'ni dagaa wodda ha'no'ni gacifatannon.

«Ookkone wodda anee yexxinaan; ani kinni hee hiyyabe'non;

jaba qicinni anee halsinaani yaane kinni anee'e alfinabaan.

Ege'na ginbemmaxxee,

Duuchchi Woddike Gootta sodaata melledha gonpheemmaxxee'e,

Gorsa anka adhdha eeyya gonpheemmaxxee'e,

anka xixichchonna tuffanteemmaxxee'e,

Tennexxee insa'ne ifike orixxa gumma indaan,

ifike yaadika hiranna adhdhinaan.

Ege'na xe'iteekaara beekkumakenaa'n bayyata insa'nexxi insa'nee shiltaan,

gowwoletanna bashshi hiyya insa'neexxi insa'nee balleesitaan.

Yaane kinni anxa laqaak duuchchi nage'ik hedhaan,

rakkotixxe ruphphinaa'ninna gataan.»

Source notes (3)
  1. Cross-reference 1 Moy. 4:32.
  2. Cross-reference Iyo. 28:28; Far. 111:10; Mam. 9:10.
  3. Cross-reference Mam. 8:1-3.

Gedeo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.