Gedeo Bible
Mikiyaasikaa Raaga 5
«Ati lolinke mannike Qachcha!
Sannachcha atika qophpheessi.
No'o buqemeennen;
Isira'eelika akeekisanjonna
siqqoti boqo gannaan.»
Betelheemi'ni Ke'ake Moyaniji'a Kulemeeka Waabekkuma
Mageni hiyya'nee qici, «Tee Efiraatake bogixxe Beeteliheemi!
Ati Yihudi giddo hedheeke shiixaaramma qachchuwwanaa'ni tenna kaddotole,
Hundaayye Isixxi,
edo olmii'ni kexxeexxa,
Isira'eelika galchallo moyanjo
ifi'a ke'issedhannon» hiyye.1
Tene'a ama isoo ciniiffatte ildaa qico'ni,
Isira'eeli waalenda;
Gateek isik dayyuwwinna,
illeema higeexxi booji'emeeki isixxe gosaki ardi gosa ifixxiba'a higaan.
Isi Duuchchi Woddikie Goottixxe hunnanni,
ookkone Duuchchi Woddike Goottike summike lumminninni,
ti'ni hiyyee uurran; arda isikanna allala;
Eettene yanna isik lumminni buttatixxe gabala qico'n geyammaxxee,
insa'ne'e soda'a belo he'naan.
Isinna nage'a insa'neke kadaan.
Anjiranna Ba'ne
Asoorik manni lolo'a no'oke boga'ni daga wodda,
qachcha no'okika dala'a tansaase e'yoole,
Torbaane heqaaka mannanna
matanga sadeeta akeekisanjuwwa insa'ne'ni woci assinannoni.
Asoorka boga wolaantichchik,
Namiruudika boganna lolle injifante abindaan;
Asoorik manni no'o lolee,
boga no'oka abidoole,
isi no'o insa'neexxe aniganaa'ni gatisaan.2
Reyotenaa'ni gateeki Isira'eelik ardi,
giddo hedheke heddo gosake arduwi'a,
Duuchchi Woddik Gootti iimi'ni uwwammake wojishsha,
bada'ate'ni kiiffammaxxe kiifoshsha,
Manjo heqqammabaake,
manjiinka beltonna adamabaake manjishsha kada.
Heddo biniichchuwwi giddo hedheeke neenqisha,
lekka ifixxenni maxaqi assa'ni me'ammake,
Buttuchemmakanna ayyinna isonaa'ni butte aadha dandeessisemmabaake,
gedheebi giddo hedheeke,
Oosichcha neenqishsha
Ya'iqoobike ardixxi hafe, gosa gosake arda'n, heddo arduwwi giddonna iitta kaddaan.
Isira'eelxi hunna naaphuwwake'n injiifachchoti kexxaan;
atik naaphi duuchchinna ba'a.
«Eettene yanna» Duuchchi Woddik Gootti,
«Ha'noka loliinka fadhado ha'no giddii'n balleessanno;
hanoxxa gaaruwwanna birano.
Boga ha'nokika qachchuwwa bakka balleessanno;
ha'noka kinjinka dalla'uwwanna diiganno.
Ha'nooxxa moronna balleesanno;
ta'anni edi'anna mortinaba'a.
Ha'nooxxa gissendeexxa misiluwwa,
magnoonfatinammaxxa ha'noxxa soodduwwanna, ha'no giddii'n balleessanno;
Ta'anni edi'a anga ha'noxxixxe huje'a
ha'no sagadinaba'a.
Asherate hiyyendaaxxa sooddotixxa misile ha'no giddii'ni goshanno;
ha'nooka qachchuwwanna bakka balleessanno.
Ani'a ajajemabaaka gosa gosaka arduwwa,
aaretinna balati insa'ne'n halo fulanno.»
Source notes (2)
- Cross-reference Mat. 2:6; Yoh. 7:42.
- Cross-reference Dada. 10:8-11.
Gedeo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.