Gedeo Bible
Leewwitotikaa Maxaafa 24
Xassake Hasissaaxa Xonxommachcho
(Fula. 27:20-21)
Mageni Muuse, «Ani ulfinniki leellannake seemmati giissineeke fooqi giddo hedheeki xassi ifa'ni hedhaashsha assiyyotee Isira'eeliki ardi miinceexxa qullite ejeersiinxa zayite iyyedagaashsha ajaji. Aarooni hashsha hashsha'ni ifina xassaan; ifi ikkinna ani ulfiniki leellannoke duunkaani giddo hedheeke Kakotike Taaboti edo hedheeke goli gadhi darre Magenii edo bogi soodaa qico'ni ifa'ni galaan; tinni dagaake baro duuchcha'ni heqqende hexxaaxxen. Aarooninna xassi ca'itte worqeti giissineechcho'ni hana Magenii edo xo'ebaangi ifaashsha heqqaan.
Magenokee Shiqqaaxa Woyyitte Ita
«Tommenna lame kiilo danne shaqqinseexxa bulle aaxxe tommenna lame kebbo ra'issi; Kebbotanna Magenii edo hexxeexxe worqe hana fanneexxe qore'ni jaane mitte dala'ni jaane wele dala'ni lame dala'ni uggi.1 Giirate'ni gunbaaxxe Magenokee shiqqeexxe woyyitte kebbo kaddeexxa qabbaachisaashsha ca'ichcha ixaana lamiinge dala'ni uggi. Aarooni Isira'eelike ardixxa bakka kebbo sanbata sanbata'ni duuchchi wodda Magenii edo uggaan. Tinni Isira'eeliki ardi duuchchi wodda muuxa hasissaaxxe kakotixxe aadan. Iitti kebbonna Aaroonixxenna isixxe ooseke qoobbo kaddaan; insa'nenna eettenee kebbo hara woyyichcha booncho'ni indowwaal; kebbotinna Duuchchi Woddike Gootti'a hara woyyitte itatixxe uwwa kaddeexxi shiqqeechchi uduma qeesetike qoobbo kaddaan.»2
Balleessana Mura
Amati darree'ni Isira'eelichcho, anniin darree'ni Gibtsichcho kadeeki manji Isira'eelike mannixxe oddo'ni mitte Isira'eelichchinni welti loleme; Lolemeexxe yanna eettene'ni Mageno yowwammale Muuseba iyyedange; Amatiki isixxiki summinna Seeloomite hinaaxxe Daanike mininaa'ni Dibirixxe beltommani. Mageni maa assinaaxxa kula qico'ni isoo abinde tursine. Magenikinna Muuse: «Okkone manjo olla'akenaa'ni gadhi'a fulchi; yowwaa wodda laqeeki manji duuchchi ikki manji balleesseexxa dhugaa kulaki mitti mittin manji okkone manjike umo'ni hana anga ugge dhugaa kulowaal; okkonechchi uduma Isira'eeliki ardi kinoti cancaqowwaal; Ane Mageno yowwaaki huuni manjinna cubbote isi'a kaddaaxxa, Isira'eelike arda'ni kuli; Mageno yowwaaka shiwwe; ardi duchchi kinoti cancaqqowwaal; Isira'elike manjo kado keesuntichchi Mageno yowwoole shiwwe.
«Manjo shiyaaka hoone manjonna shinnaashsha murte uwwe;3 Wele manjika hore shiyeeki shiyeeke horixxe bakka'ni wele uwwowwaal; tinninna lubbotixxa bakka lubbo hiissatixxe aadan.
«Huuni manjinna wele manjo'ni miidhamma geesisoole ookkonengii miidhdhami iso geyowwaali; Wele manjika micco enqoole enqekiki miccinna enqemowwaali; wele manjixxa ille balleeseekixxi illenna baxxowaal; isso enqoole isso isixxinna enqendowaali. Wele manjo'ni hoone miidhammanna geesisoole okkonengingi miidhammi iso'ni geyowwaal.4 Hore shiyeeki bakka okkone horixxe'ni hiissowaal; manjo shiyaaka kinni iso shinnowwaal. Kunni seeri ha'no duuchchinge Isira'elike manni'aanna kadi ha'nooxxe oddo'ni hexxaaxxe keessumma duuchchi'a kadaaken; ani Mageno ha'nooken» hiyye.5
Muusenna tenne duuchcha ardakee haaso'e ke'ee wodda okkone manjo olla'in gadho fulchine kinjiki cancanqe shinne; konne qicini Isira'eeliki ardi Mageni Muuse ajajeeshshanni asse.
Source notes (5)
- Cross-reference Fula. 25:30.
- Cross-reference Mat. 12:4; Mar. 2:26; Luq. 6:4.
- Cross-reference Fula. 21:12.
- Cross-reference Fula. 21:23-25; Lew. 19:21; Mat. 5:38.
- Cross-reference Lak. 15:16.
Gedeo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.