Skip to content
BibleKenya

Gedeo Bible

Leewwitotikaa Maxaafa 2

Midhatixxa Uwwa

« ‹Huuni manjinna Duuchchi Woddike Gootti'a midhatixxa uwwa shiqishaa wodda eettene midhixxa shaqqaxxa bulle shiqishowwaal; bullete'ninna ejeersiinxa zayite itti cossowwaal; hixaanakanna itti lebowwaal; Qeese Aaroonixxe oosebaa iyyedagowwaal; insa'ne giddii'n mitti qeesichchi shiqqeexxa zayitenna eettene shaqqaxxe bulleenaa'n mitte oobo aadheexxi hixaana duuchcha Magenokee shiqisha'neexa qaabachisatee tolchimalchoke'ni ciincesowwaal; iitta hedheeki medhatixxe ciincaki fooli Duuchchi Woddika Gootta gammachiisan. Gatteexi midhatixxi uwwa Aarooni'aanna labbaxxe isixxe oose'a uwwendowwaal; Magenokee shiqqeexxe midhatixxe uwwanaa'n gatteexxe kaddemmaxxee hara woyyoondeexxen.

« ‹Midhatixxi uwwanna giirate'n ra'eexxe kebbo kaddoole gamaami tuqebaaxxe kaddowwaal; isenna zayite karsende giissineexe yookaan zayite itti hana buurrendeeke shaqqaxxe bulleke xalta kadowwaal. Iitti midhatixxa uwwanna she'late'n ra'isendeexxe kaddoole shaqqaxxe bulle'n ejeersiinxi zayite karsendeexxi giissendeexxenna gamami tuqeebaaxxe kaddowwaal. Shiqqeexxa kebbonna shashate'e ejeersiinxa zayite hana buurteetexxi midhatixxe uwwa assite shiqishshaton. Midhatixxi uwwa hubbuqitte sibiliinxe sha'lan ra'isendeexxe kaddoole shaqqiteexe bulle'n ejeersiinxi zayite karsende qushshinde ra'isindeexxe kaddowaal. Midhatixxi uwwa Magenoke uwweendeexxe tolcha assite'e qeesichchoke'n uuwwtaton; qeesichchikinna eettene uwwa tolchimalchiibaa shiqishaan. Qeesichchikinna shiqqeexxe uwwa duuchchanaa'n aadheexxi Magenoke shiqqeexxe kaddeexxa qaabachiisatee tolchimalchoke'n ciinceesaan; iita hexxeexxe midhatixxe ciincaxxi fishshe Duuchchi Woddika Gootta gammachchiisaan. Gatteexxi midhatixxi uwwa qeesetee uwwendowwaal; isenna Magenokee uwwendeexxe uwwanaa'n gatteexxe kaddemmaxxee hara woyyoondeexxen.

« ‹Ciincessatee Magenokee shiqqaaxxe midhatixxe uwwanni welti shiqqaaxxa lebele yookaan malebo giirate'n ciincesitoxxe'e; tennexxee Magenokee shiqqaaxxi midhatixxi uwwa duuchcha gamaami tuqebaaxxe kaddowwaal; Wogga wogga'ni aassexxinaaxxe midhanaa'n umo Magenokee iyyedagginaan; tenne umo utinemmaxxa midhixxi fishshe gammachchisaashsha tolchimalchoke'n ciinceesemoqqe'e. Midhatixxe uwwa duuchcha'n maxine lebi; atike Magenixxa kakoxxa maxine deetoxxe'e; tennexxee midhatixxe uwwa duuchcha'n maxine leba hassissaan.

« ‹Sirete'ni haandatoxxe midhaka umo Duuchchi Woddike Gootti'a uutato wodda soqemeexxi giirate'n ayemeeke tisha kadowwaal. Tinni midhatixxe uwwa kaddemmaxxee ejeersiinxa zayitenna hixaana itti lebi; Qeesichchikinna eettene midhatixxe uwwanaa'ni aadheexxi Duuchchi Woddike Gootti'a uwwendeexxe kaddeexxa qaabachisatee zayitenna hixaana eettene midhanni welti ciinceesaan.

Gedeo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.