Skip to content
BibleKenya

Gedeo Bible

Iyyasukaa Maxaafa 20

Danoti Manjo Shyeeki Baaje Ofo'laaka Qachchuwwa

Ookkoneechchi uduma Duuchchi Woddik Gootti Iyyaasu'u hiyyee qici: «Muuse darree'ni ha'noo'n kulenne qicishsha danoti manjo shiyeeki manji itti baajaaka qachchuwwa fi'linaashsha Isira'eeli'aa kuli; ayyinna danoti manjo shiyoole ookko'a baajiyyot halo fulo'a hasaake manjinna anjiremaan.

«Manijo shiyeeki manji konne qachchuwwinaa'n mittinbaa baaje mare qachchixxe hulaxxe songo'n murte uutammaxxe geedhe edo shiqeexxi kaddeexxa yaane insa'ne'ni kulaan. Ookkoneechchi uduuma insa'ne isoo qachchi giddi'a e'yaashsha assineexxi hedhaa boonchonna une'na'a ookko hedhaan. Halo fulo'a isoo hasa'neeki maniji hordofe dagoole, iikki manji shiyeechchi danotite male halo fulatete kada gopheemmaxxe'e qachchi giddi manni isoo abide uwwoqqe. Songote'n shiqe'naa'a murte uwwenidaa qico'inna ookkone baro'n hedheeki qeesetiki umo kadeeki qeesichchi reyaa qico'n ookkone qachchi giddo turowwaal. Ookkoneechchi uduma mine ifike'n, baaje dagemmake qachchibaa higaan.»

Tennexxe Isira'eeliki ardi koobatika Nefitaalemike bogi giddo hedheeka Geliilaka qachcha; Efireemike koobatike bogi giddo hedheeka Qaadeesi hiyyemmaka Sekemika qachchanna Yihudake kooba callike bogi giddo hedheeka Kebiroonite hiyyemmaka Qiriyati'arbaaqika qachcha file. Iittanni Yordaanoosi galaani wido Iyyaarkoo'n boroti darre'n hedheeke gammoojje qiilli giddo Roobelike minike ardike boganaa'n Beetseerika qachcha, Gaadixxe galcha giddo Gele'adike boganaa'n Raamotika qachchanna Minaaseke minike ardike boginaa'n Baasaani hedheeka Golaanika qachcha foone. Kunni qachchuwwi Isira'eelik ardi'anna insa'ne giddo keessummumma ofo'leeki manni danoti manjo shiyoole songote'n murte uwwendebaaki halo fulo'a hasaaki isoo shiyebaasha konne qachchcuwwi giddi'ni mittibaa banje'e lubbo gato'a filemeeke qachchuwwan.

Gedeo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.