Skip to content
BibleKenya

Gedeo Bible

Ermiyaasikaa Raaga 43

Ermiyaasixxa Gibtsi'a Adhdhensha

Ani Ermiyaasi, Duuchchi Woddiki Gootti insa'ne'n kulonna'a anee'e ergemmaka hiyyichcho duuchcha ardake'n haaso'e birenne wodda, Hoshayaak belti Azaariyaassi, Qaareehak belti Yohaananna hollaameeyye kade'ek manni duuchchi Ermiyaasi'i, «Soba'neeten! Duuchchi Woddiki Gootti no'o'ok Magen ‹Gibtsee'a me'itine ookko hexxinoqqe'e› hite kuli hiyye atee'e ergebaan. Yaane kinni Baabilooniki manni no'o'o shiyo'a yookaan booji'eexxi Baabilooni'a adhdhe'e me'o'a insa'nexxe anga'n no'o'o sa'isite uuttota'a Neeryaki belti Baarooki ate'e no'o'n tirtirse'een.»

Tennexxee Qaareehak belti Yohaananna loliinke mannik ja'laabuwwi duuchchi iittanni ardi duuchchi, Duuchchi Woddiki Gootti Yihudiinke boga'n he'naashsha ajajemmaka hiyyichcho lanqebaa. Yaane kinni Qaareehak belti Yohaananinna loliinke mannik ja'laabuwwi duuchchi, Yihudake boga'n ofo'latee'e xexxerememake gosa gosake ardi giddi'n illeema hige dagemmaka manna duuchcha aa'ne me'ine; Insa'nenna labballo, melaalle, oosenna, mootumatike minike heqqanjuwwik ajajalli, Nabuzerdaan, Ahiqaamika belto Godoliyaasixxe anga'n gallo'a waalemmaxxa moyanjiinxa meyyaxxa oosenna, ittanni anee'e wabeekichcho Ermiyaasinna Neeryaka belto Baarookii'i aa'ne me'ine. Insa'ne'e Duuchchi Woddike Goottike hiyyichcho ajajema ginbe'e Gibtsee e'yineexxi Xaafinaasi qico'n me'ine.1 Xaafinaasi hedhee'na'a Duuchchi Woddiki Gootti hiyyichch anee Ermiyaasi'n dagee hiyyeeqic, «Lumolla kino aaxxettexxi Xaafinaasi'i hedheeke Feri'oonike mootomatike minixxe hula'n Ayihudiink manni uudanaa faariinke miyini giissende butta fayendeexxe fawo giddo mooggettexxi, insa'nee ‹Lumoki Isira'eelik Duuchchi Woddiki Gootti Mageni: erganjo anka Baabiloonika moyanjo Nabukadanatsoori'i dagaashsha assannon; moote isixxanna konne kaba moogetexxe kinuwwa'n hana ofo'lishaashsha assanon; isinna mootumma ifixxika seemati giisemeeka fooqa ooko hana olitaan. Isinna dageexxi Gibtsee lolaan; reyotee muremeekir shiyemaan, booji'ote muremeekir booji'emaan, wolaantichakee muremeekir wolaantichangee'e sa'iseme uwwemaan. Isi Gibtseexxe fakkuwwake magenooffachchotike minuwwa'ni giira woree, gubaan; magenuwwa insa'nekaranna booji'ee adhdhaan; allalisanji fugate seemma hana lephphammashsha Gibtseeka boga lephpheexxi ookkoo'n nage'ik me'an. Isi Gibtseeke bogi giddo hedheeka arshotike magenuwwike fakkuwwake minuwwixxa sooddo buttuchee biraan; Gibtseke magenuwwika fakkuwwatika minenna giirat gubaan.› »

Source notes (1)
  1. Cross-reference 2 Moy. 25:26.

Gedeo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.