Gedeo Bible
Ermiyaasikaa Raaga 30
Duuchchi Woddik Gootti Arda Ifikee Uwweexxa Addachchiisa
Duuchchi Woddike Goottik hiyyichchi Ermiyaasiba'a dageexxi: «Duuchchi Woddiki Gootti Isira'eeliki Magen hiyyeeqic: ‹Ate'n haaso'enneka hiyyichcho duuchcha Maxaafake'n borreessi. Kunniseten arda anka Isira'eeli'anna Yihuda'a› hiyya'neen Duuchchi Woddik Gootti, ‹annuwa insa'neke uwwennake bogiba'a insa'ne illeema hissannoxxi yanna shiqe'een insa'nenna boga ookkone'e dhaallaan› hiyya'neen Duuchchi woddik Gootti.»
Duuchchi Woddiki Gootti Isira'eelikenna Yihudake ardixxee haaso'a'n: «Duuchchi Woddik Gootti hiyyee qici:
« ‹Sodda'atikinna weekenshati hafuur laqeme'een;
nage'ikinna hedhebaan.
Amme hubattine uudde;
isi labbaki ilaata?
Mayeeteta labballi duuchchi ciniffatteexxe manjichoshsha
anga hidhake'n uggudhdhe'e,
alba xilledheena'a uuda'ennek?
Aanne'e! Itti barra hittata sodaachchissaaxxe!
Iitta hexxeenxi barra hexxabaan;
Ise Ya'iqoobixxe horte'a rakkotixxe yanna kaddaan;
yaane kinni insa'ne anjiremaan.»
« ‹Eettene barra› dada duuchchik Duuchchi Woddiki Gootti hiyya'nee qici,
‹Ani eettene barra insa'nexxe quce'naa'n qanbara enqannon;
Usurakena'ninna insa'ne tikannon;
konneechchini edi'a alagi insa'nee garbumma galchabaan.
Yaane kinni insa'ne Duuchchi Woddike Gootta ifike Mageni'anna
ani insa'ne'n mo'waashsha assannoke
Daawwiti'i ifike moyanji'a hiremaan.
« ‹Tennexxxee koo anke erganjo Ya'iqoobi sodaattoxxe'e;
koo Isra'elike arda mee alayyi!›
hiyya'neen Duuchchi Woddik Gootti.
‹Ani ha'no'o bayyike boginaa'n,
horte ha'noxxanna booji'endeeke bogibaa'n hissannon;
Yaa'iqobixxi horte haaroba nage'iki ti'ni hitee'e ofoldaan,
insa'nee'e allalshaakinna hedhabaan.
Ani ha'nonni hedhee ha'no'o anjirannon,›
hiyya'neen Duuchchi Woddik Gootti.
‹Ha'no gosa gosaka ardi giddo xeereennan;
ookkone gosa gosaka arda bakka isixxa balleessannon;
ha'no kinni bakka ha'noxxa balleessabe'non;
Seerinke xixichcho ha'no'o xixanno malee'e
xixichchi belo ha'no'o waalabe'non.›
«Duuchchi Woddiki Gootti hiyya'neeqic:
« ‹Mada ha'noxxi fayyitabaaxxe,
miidhensha ha'noxxinna jabaxxen.
Ha'no'a haaso'aak hedhebaan;
mada ha'noxxenna qorsi afemebaan;
ha'nonna fayyitinabaan.
Jaaluwwi ha'nok duuchchi ha'no dedhe'een;
habanna gattinee hiyyabaan;
Balleessa ha'noxxi lumooxxe kaddemmaxxeenna
cubbo ha'nooxxi bira saxxemmaxxe'e,
Naapha gannammashsha ani ha'noo ganeennen;
mararte belonna ha'noo'o xixenne.
Fayyitabaaxxe ha'nooxxe dhibo'a,
mada ha'nooxxee meyeee raartina?
Balleessa ha'nooxxi lumooxxen,
cubbo ha'nooxxinna birasaxxeemmaxxe'e iitta ha'noo xixeennen.
« ‹Yaane kinni ha'noo itemmakir duuchchi insa'nenna iittanni itemmaan;
naaphuwwi ha'nooki duuchchi booji'eme adhdhemaan;
Ha'noo saamammakir saamemaan;
ha'noo mulqedhemmak miicama duuchchinna mulqemaan.
Ha'nook naaphi hunendeexxe,
ayyinna isee'e qaabbatabaaxxe Tsiyooni,›
hiyye'een.
‹Ani kinni haaroba ha'no'a fayya hissannon;
mada ha'nooxxanna fayyisannon;›
Ani Duuchchi Woddik Gootti tenne haaso'eennen.
«Duuchchi Woddiki Gootti hiyya'neeqic:
« ‹Kunse ani Ya'iqoobixxe horte inisa'neenge bogibaa ille iima hissannon;
he'ne he'neeba insa'ne'a o'wannon;
Iyyerusaalemik qachchi diigememmaxxe bakka'ninni ijaaremaan;
mootomatik mininna edinge ifinge booncho'n ijaaremaan.
Ookko hedhaak manni galatiinxa faaro farsaan;
gammashshotinna ilillissaan;
Ani insa'nee bira sa'issannon,
laakkossi insa'neekinn shixedhabaan;
Ulfaantaashsha assannon,
tuffatemmeke kandabaan.
Oose insa'neexxi edike insa'neeke annuwwishsha kaddaan;
orgi insa'neekinna an edo jabeesseme hedhaan;
insa'nee miicaaka duuchcha xixannon.
Insa'nee akeekaak insa'neeke kadaan;
insa'nee galchaakinna insa'nee giddii'ninni ilemaan;
Ani isoo ifibaa shiqilshannon,
isinna aniba'a shiqaan;
Iittate kada gophphee'ya ayyete sheneti anba'a shiqammata?›
Hiyya'nee Duuchchi Woddiki Gootti.
« ‹Tennexxee ha'no anke arda kaddinaan;
aninna ha'nooke Mageno kadannon.› »
Kunnise Duuchchi Woddike Goottixxi hobonbalte,
mufeti kexxaani;
Sodaachchissaaxxi diidallonna,
fuggaleeyyetike umo'n bubuwwissaan.
Ifixxe qalbeka yaada muuxebaak,
Duuchchi Woddike Goottixxi aare,
illeema higgabaan;
Dagaake baruwwa'inna,
ha'no tenne'e hubattinaan.
Gedeo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.