Gedeo Bible
Hoose'ikaa Raaga 1
Yihudak moyanjuwwi Ooziyaani, Iyyo'ataami, Akaazinna Hiziqiyaasi galchineemmake baro'n ittanni Isira'eeliki moyanji Iyyo'aasiki belti Iyyorbi'aami moyemmake baro'ni Bi'eerike belto Hooshe'ibaa dageek Duuchchi Woddike Goottik hiyyichchi konneechchinni butti'a hedheen.1
Hoose'ixxa Arenna Oose
Duuchchi Woddiki Gootti Hoose'i'ni haaso'a safee wodda, Duuchchi Woddiki Gootti iso'n hiyyee qici, «Ardi anena'ni gargarti higeexxi yabaabule huje ifixxe assedhemmaxxe mertetexxi yabaabulto manjichchonna yabaabullet ilendeexxa oose adhdhi» hiyye. Tennexxee Hoose'i Dibilayimixxa belto Goomeri aadhe; isenna sila'wite labbaka belto isi'a ilde.
Ookkoneechchi uduma Duuchchi Woddiki Goottinna Hoose'i hiyyee qici, «Iyyizira'eeli giddo manjo shiyemmaxxe Iyyuxxa horte shiqoxxe yanna'ni xixaannaxxeenna Isira'eelixxa mootumma ibbamaxxee summa isika Iyyizira'eeli hite fulchi. Ettene barra Iyyizira'eelixxe dhooqa'n ani Isira'eelixxa gabe enqannon» hiyye.
Goomeri higgeenni sila'wite dubarra ilde; Duuchchi Woddiki Goottinna Hoose'i hiyyee qici, «Ta'anni edi'a insa'ne'a marara gophaannaxxee yookin cubbo insa'nexxa gattowwaal hiyya gophaannaxxee beltotika summa Loruhaama2 hite fulchi. Yaane kinn ani Yihudake ardi'a mararannon; ani insa'ne'e anjirannok gabeti, yookini wolaantichchik, yookin bagedik, yookini fadhadikinna fadhado gulufammake manninite kaddebaang Duuchchi Woddiki Gootta Mageno insa'nekenten.»
Goomeri, Loruhaama ununa waaldechchi uduma higgeeni sila'witeexxi labbaka belto ilde. Okkonechi uduma Duuchchi Woddiki Goottina Hoose'i hiyyee qici, «Ha'noo anke arda kada gophphineemmaxxee, aninna ha'noke Mageno kadagophenenaxxe beltiinka summa Lo'aami3 hite fulchi.
«Kaddomalee Isira'eelito laakkossi dandeesisabaake abbaayyatike maanchishsha kaddaan, ‹Ha'no anke ardabaani,› hiyyememmaxxe bakka'ni hedhaake, ‹Magenixxe oose hiyyeme ye'emaan.› Yihudaki ardinna Isira'eeliki ardi higgeeni mitteke kandaan; mitte akeekisanjonna ifi'a baalonsenaa'n; Iyyizira'eelixxi4 barra lumoxxe kaddeemmaxxee insa'nenna bogake'n bukkinaan.
Source notes (4)
- Cross-reference 2 Moy. 14:23—15:7; 15:32—16:20; 18:1—20:21; 2 Odo. 26:1—27:8; 28:1—32:33.
- Footnote Loruhaama hiyyo gattowaali hiyyemabaka arda hiyyoteni.
- Footnote Lo Ami Lo'aamite hiyyo anke arda kadebake hiyote
- Footnote Iyyizira'eelite hiyyo Ibiratike Magen rokaan hiyyote kadda wodda tinninna durmatanna qabeena leelishaan.
Gedeo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.