Gedeo Bible
Dadatikaa Maxaafa 30
Raaheelinna Ya'iqoobi'a mitte beltonni midde ildebaaxxa affeexxi dayyo ifixxa gaabbiteexxi Ya'iqoobii «Oose ani'a uwwi; uwwa gophphottole reyaannen» hite.
Ya'iqoobinna Raaheeli'ni mufateexxi, «Ati anee, finna ildaboxxoshsha hoyyedheeke Mageno ate'ni labbeenne?» Hiyye.
Isenna «Kunnaa erganjo anxi Baala hexxeen. Isenna oose ani'a ilde'naa aninna ise darree'n oose alfonna'a isenni welti diiphi» hite. Tennexxee erganjo ifixxa Baala'a Ya'iqoobi'n heerunsiisse. Ya'iqoobinna Baalani welti diiphe. Baalanna siila'witeexxi labba belto Ya'iqoobi'a ilde. Raaheelinna «Mageni ani'a mureen; anxa kadhanna laqeexxi labbaka belto ani'a uwween» hita'n summa isika Daani1 hite fulchite.
Raaheelixxi erganjo Baala higgeenna siila'wite; Ya'iqoobi'aanna langa belto ilde. Raaheelinna «Dayyo anxenni jaba qico wo'laancho abixxe injifatenne» hite; tennexxee summa isika Nefitaaleemi2 hite fulchite.
Liyanna ifi'a ila uurrisseexxa affeexxi erganjo ifixxa Zillifaan Ya'iqoobi'n heerunsiisse. Liyaxxi erganjo Zilifaanna Ya'iqoobi'a labbaka ilde. Liyanna, «Kaayo ani'a eldeen» hita'ni summa isikanna Gaadi3 hite fulchite. Liyaxxi erganjo Zilifaan Ya'iqoobi'a langaka labbaka belto ilde. Liyanna, «Lumoshsha gammadeennen techchinn elqi'a melaalle duuchcha anee tee gammadeettexxe hitaan» hite. Isika summanna Aseeri hite fulchite.4
Dinne haammammaxxa yanna Roobel fichchi giddi'a mareexxi Inkoy5 hiyyemaake haqichchixxa gumma afeexxi ama ifixxe Liya'a iyyedage; Raaheelinna Liya'a «Maganneten belt atik iyyedageexxe Inkoyetenaa'n ani'a uwwi» hite.
Liyanna, «Aro'o anka adhdha ati'a shixxexxeeta? Ta'a kinni anke beltixxa inkoye abboo adhdhitottaandee?» Hite.
Raaheelinna «Atike beltixxe inkoyexxa bado Ya'iqoobi dokko hashsha atinni welti galuun» hite.
Eettenenni galgala Ya'iqoob fichchii'n dagga wodda, Liya isoo qopheccatee gadhi'a fuldeexxi «Anke beltixxe Inkoye'n atee jijjidheennaxxee aninni galdatton» hite; tennexxe Ya'iqoobinna eettene hashsha isenni gale.
Magenikinna Liyaxxa soodachcho laqe; tennexxee Liya Ya'iqoobi'a siila'witeexxi ondika labbaka belto ilde. Liyanna «Erganjo anxa aro'o ankee uwwennaxxee Mageni bado ani'a uwween» hita'n summa isika Yisakoori6 hite fulchite. Liyanna higgeenna siila'witeexxi jiyaka labba belto Ya'iqoobi'a ilde. Isenna «Mageni eloxxa uwwa ani'a badhaseen. Jaane labballo isi'a ilennaxxee ta'a aro'i ank ane ulfeessaani» hita'n summa isika Zabilon7 hite fulchite.
Ookkonneechch udumanna meyyaxxa belto ilde; summa isekanna Diina8 hite fulchite.
Mageninna Raaheelii qaabbate; soodachcho isexxanna laqeexxi ila ise'a uwwe. Isenna siila'wite labba belto ildeexxi «Mageni diqatensha anenaa'n fugusseen» hite. Summakanna, «Duuchchi Woddik Gootti ani'a wele labba belto lebuun» hita'n Yoseefi,9 hite.
Ya'iqoobike Horxa Bira Sa'ne
Raaheeli Yoseefi ildee uduma Ya'iqoobi Laabaa hiyyee qic: «Anxe bakkaba'a ilemennake anike bogiba'a ille iima hige me'annoshsha assi. Insa'neexxee ati'a ergatemennaxxa anxa aruwanna anxa oose anxa adhdhe me'onna'a ani'a uwwi; hittee qico ati'a ergatemennexxa egendeetten» hiyye. Laabanna «Ati darree'n Mageninna anee eebbiseexxa leellati uudennaxxee ate'n elle alfo'onnole maganneten kabanni ofo'li; Runda maachcho adhdhitattoxxa ane'ni kuli; ati'a uwwannon» hiyye.
Ya'iqoobinna isoo hiyyee qici, «Hitta ati'a ergatemennaxxanna hore atik anxe allalanni hittee qico horeexxa atinni egendeetten. Ani dagebo'no ediga'ma affeettaxxi heenoxxi karra telcho lummexxe birasaxxeen; anxe faanaxxa duuka Duuchchi Woddik Gootti atee eebbise'een. Yaane kinni haanoteta ani anke minixxee hedannoki?» Hiyye.
Laabanna, «Ati'a maachcho uwwanno?» Hiyye isoo qore.
Ya'iqoobinna «Ati ani'a mittechchonna assitoxxe; yaane kinni ati ani'a assitotta'a laqaannexxa mitte yaane ani'a assitottole hore atika woldishshanni ati'a bobbaasa'n allalannon. Telcho hore atik giddo maremennexxi gedhebo atik giddo taltallichcha, xillinni boddi hiyyekanna xillolla gedhebo iittanni re'etenaa'ninnaa taltallitenna xillinni boddi hiyyeka fowe'naa kunni anke runda kadaan. Konne qicinni heger runda anka towachcho daggatto wodda adatensha anxi ege'nendaan; anke hori giddo tali talle yookaan xillinni boddi boddi hiyyebaxxi re'e affendoole yookaan xillolli gedhebiink buruus afemoole ikki mooremekishsha uudemowwaal» hiyye.
Laabanna «Ishshi eloxxen hitetteshanni kadduun» hiyye. Yaane kinni eettenenni barra Laaba burre burre affeexxa yookaan tali talle re'etixxa korbeeyye duuchcha, iittanni, meyyaxxe re'e giddii'ninna tali talle yookaan xillinni boddi boddo hiyyemmaxxa duuchcha, heenenna kadi golallinne afeeka duuchcha foye; iittanni xillolla gedhebika buruusa duuchcha foyeexxi allaldo'a ifixxe labbaxxe oose'ni uwwe. Ookkoneechchi uduma Laaba hore ga'ne sase barraka ora Ya'iqoobinaa'ni bayyate me'e; Ya'iqoobinna gateeka wele Laabaka hore allala'nemman.
Ya'iqoobinna Libine, Lewizenna Eermooni hiyyemaake haqichchuwwixxa siqqo woxeexxi shamonxa hani'n quncisee hoyya'ni golalook giddik leello'a borro borrote asse. Tenne qunce isexxa wowwoxxa'n hoyyemmaxxa siqqo hori uudaashsha albi edo wode'e ha'wammake gongi duuchchi giddo ugge. Hori korbeeyye halseexxi wode'e ha'wo'a dagaa wodda tenne siqqo edo uuda'n rarragata'neman; tennexxe borro borro talittalenna xillinni boddi boddi hiyyexxa beltanna ille. Ya'iqoobi tenne beltanna qofiba foye; gateeka wele Laabaka hore ookkone barro barronna xillolla hori edo uurse; konne qicinni ifik hori Laabake'n makemabaashsha foye. Munde afeek meyyak gedhebinna meyyaxxi re'e korbeeyye halsite raragatamma wodda alfaashsha Ya'iqoobixxi siqqo wodinke gongi giddo albi edo ugga'nemman. Yaane kinni munde afebaake gedhebinna re'e edo eettene siqqo uggaammabaan. Konne qicinni munde afebaaki Laabake kade; munde afeekiir kinni Ya'iqoobike kade. Konne qicinni Ya'iqoobi hara dureessa manjo kade; heddo gedhebonnaa re'e, heddo labbakanna meyyaka erganjuwwa, iittanni kinni hedo gaaluwwanna harre afeemman.
Source notes (9)
- Footnote Daani Ibritotike laagadinni Daani hiyya «Murte uwween» hiyyate
- Footnote Nefitaleemi: Ibritotike laagadinni «Nefitaalemi» hiyyate kadda wodda «Wo'laanchcho» hiyyate
- Footnote Gaadi: Ibritotike laagadinni Gaadi hiyya «Faleen» hiyyate
- Footnote Aseeri Hiyya Gammashshote Hiyyate.
- Footnote Inkoy: Inkoy hiyya qawuffate kadda wodda, gumma isixxa melaalle ittoole labballik diipha yortaan; labbakinna melaalleti diipha yora; iittani kinni melaalle gumma isexxa ittoole siila'witaan hiyyendaxxi adde hexxeman
- Footnote Yisakoor: Ibrititotikenni Yisakori hiyya «Bado hiisseeni» hiyyate
- Footnote Zabilon: Ibrititotike laagadinni Zabilon hiyya «Ulfeessate» hiyyate
- Footnote Diina: Ibrititotikenni Diina hiyya «Murte uwween» hiyyate
- Footnote Yoosefi Hiyya Isi lebuun Hiyyate.
Gedeo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.