Gedeo Bible
Dadatikaa Maxaafa 16
Aggaariinnaa Isima'eelii
Abiraamixxi are Soora Abraami'a ildeemmabaan yaane kinni Soora ise'a ergatendaaxxa Aggaari hiyyendaaxxa Gibtsichcho affe'emman. Soorannaa Abiraamii «Yoona Mageni ani'a ila hoyyedhe'en; akimagaada Mageni ise darree'n finna ani'a uwwaaxxe hexxeen, martettexxi anxe erganjon welt dhiiphi» hite. Abiraminna yaada isika adhdhe. Abiraaminna Kenaanike boga'n tomme wogga tureechchi uduma are isixxi Soora ise'a ergatendammaxxa Gibtsichcho Aggaarii'i Abiraami'ni heerunsiisse. Abiraaminna Aggaarinni welti diiphe; isinna siila'wite. Aggaari siila'wieexxa calla egendeexxinna ifixxa giitte Soora'a tuffatte.
Sooranna Abiraami'a «Anke dhedhinaa'n keexxeexxe rakkataannexxe rakkoxxe yaane uuddaak ateten; hanqalfitotta'a erganjo anxa ati'a uwwene; ta'a kinni sila'witeexxa egendeexxinna ane tuffatte; ta'anna atenaa'ninna anenaa'n balleessanji ayyete kadeexa Mageni afo.»
Abiraaminna Soora'a «Aggaarite kaddoole atixxe anga'n hexxeexxen eetettexxa assedhi» hiyye; ookkonechchi uduma Soora Aggaari'i geebbe; Aggaarinna ise edii'n fulde baxxe.
Aggaar gammoojje qiilli bogi giddo hexxeexxe muumme qarqara hexxee'naa Duuchchi Woddike Goottik iimik erganji1 ise afe; tinni muummenna Suuri'a me'ammake ori qarqara hexxemmaxxen. Iimik erganjinna Soora'a, «Sooraxxe erganjo, tee Aggaar habaa'n kaba daggette? Haba'a me'itaatte?» Hiyye.
Isenna «Ani giitte anxe Soora hundii'n baaje dageennen» hite hiissite haasotte.
Duuchchi Woddike Goottik iimik erganjinna isee, «Atinxe giitteba illee iima higgettexxi ise'a hirem» hiyye. Iimik erganji lebeexxi, «Horte atixxa bira sa'issannon; bira sannetenaa'n kexxeexxa ayyinna isee laakko'a dande'abaan.»
Duuchchi Woddike Goottik iimik erganjinna leebeexxi ise hiyyee qici:
«Kunnise ati sii'lawitetten;
labbaka beltonna ildatton;
Mageni rakko atixxixxa uudemmaxxee
summa isika Isima'eeli2 hitatton.
Isinna diidiinxe harreshsha kadaan;
angatanna futti hiyyeeke manjo duuchcha'ninna ke'aan;
Isoo afeeki manni duuchchinna anga iso'ni ke'aan;
isinna ifike firi duuchchininna weli giba'ne hedhaan» hiyye.
Aggaarinna «Ane afaaka Duuchchi Woddika Gootta affeene» hiyyati isee yaanisemmaka Mageno isoo Eliro'i hite yexxe; tikkatinna «Anee afaaka» hiyyoten. Tennenaa'n kexxeexxeniten eettene Qaadesixxe oddo'ninna Bareedixxe oddo'n hexxemmaxxe muummek summi, «Bi'eeri, Leehayi, Roori»3 hiyye ye'e: telchi qico'ni Qaadesixxennaa Baaredixxe oddo'ni afendaan.
Aggaarinna Abiraami'a labba belto ilde; Abiraaminna ilememmake belta summa Isima'eel hiyye fulche.4 Aggaari Isima'eeli Abiraami'a ilde wodda Abiraamixxi wogga saddeeta tommenna jaanemmani.
Source notes (4)
- Footnote Duuchchi Woddike Goottik iimik erganj: Tenne bakka'n Duuchchi Woddike Goottik iimik eranji hitaaxxi hiyya Mageni manji hubataashsha isinni leelleexxi haaso'aamaxxe ergana hiyyende'een
- Footnote Isima'eeli: Ibritotike laagadinni Isima'eelite hiyya «Magen laqaan» hiyyaten.
- Footnote Bi'eeri Leehayi Roori Hiyya Anee Afaake Hedhotike Magenixxe Muumme Hiyyaten
- Cross-reference Gel. 4:22.
Gedeo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.