Skip to content
BibleKenya

Gedeo Bible

Fulatikaa Maxaafa 20

Tomme Ajajuwwa

(Lan. 5:1-21)

Magen konneechinni butti'a hedheeka hiyyichchuwwa hiyyeexxi haaso'ee qici: «Gibtse garbummatike boginaa'n ate fulchenek Duuchchi Woddike Gootti atik Magen anten.

«Anee malee'e wele magenuwwa affoxxe.

«Ale iimate'n hedheechchixxa yookaan kaba butta buttate'n hedheechchixxa yookaan woduwwi giddo hedheechchuwwixxe heene fakkexxa misile giissexxoxxe. Ani Duuchchi Woddik Gootti atik Mageni hinaantichcha Mageno kadennaxee'e konneechuwwa magenooffattoxxe; sagaddoxxe; anee gibakera sakkaxxenna sholgaxxe ila qico'n annuwwiinxe cubbo'aa oose xixannoken.1 Ani'a ajajemaakanna anee eeyyaaka kuma ila qico'n jaalala leelishannon.2

«Duuchchi Woddike Gootta atike Magenika summa tola yexxoxxe'e; summa anka tola ye'aaka xixebe'nok waalabe'non.3

«Edi sanbatiinxa barra gargar hexxeexxe barra assite woyyons.4 Jaane barra hucci assitattoxxa duuchchanna assedhi. Yaane kinni torbaxxi barra Duuchchi Woddike Gootta Mageni'a Edi Sanbatan; eettene barra'n atettenna kadi atik labbak belti yookaan atixxi meyyaxxi belto atik labbak erganji yookaan atixxe meyyaxxi erganjo yookaan hor atik yookaan atixxe baxxe'n hedheek kesuntichchi mitte hujenna hujjinoqe.5 Duuchchi Woddiki Gootti jaane barra giddo iimatanna butta, abbaayyatanna abbaayyati giddo hedheechcho duuchcha dade; torbaxxa barra hafuura adhdheexxe tennexxee Duuchchi Woddik Gootti torbaxxa barra eebbise'e; isee woyyoonse.6

«Duuchchi Woddik Gootti atik Magen ati'a uwwaake boga'n wogga atixxi qeerrexxo'a anna atikanna ama atixxa ulfees.7

«Shiltoxxe'e.

«Yabaabuldoxxe'e.8

«Moortoxxe'e.9

«Ayye'ninna dharik dhugaa kuldoxxe'e.10

«Wele manjika mine gaabbitoxxe'e; are isixxa yookaani erganjo isikanna erganjo isixxa, qotiyyo isixxa, harrichcho isika yookaan isi horateechcho duuchcha gaabbitoxxe'e.»11

Ardikinna dindinsotanna banqo, malagatinka hafuura laqe wodda, iitti kooba wiliildaa'na uudee wodda sodaate culphise; bayyate uurre; Insa'nenna Muuse, «Ati umo atingenni no'on haaso'i lanqaannen; Magen kinni no'on haaso'ole no'o'a reyonden» hine.12

Muusenna arda «Sodaattinoqqe'e; cubbo hujinabaashsha Mageniinxi so'da'a ha'no'n hexxaashsha Magen ha'no'o hega'a uudo'a dage'een» hiyye.

Muuse dimma dukanna giddi'a, Magen hedheba'a shiqe'emma wodda ardi kinni bayyate uurre'emman.

Wele magenuwwanna Tolchimalchuwwa

Ookkoneechchi uduma Duuchchi Woddik Gootti Muuse hiyyee qici; «Isira'eelike arda'ni haaso'o'a iso'n hiyyee qici: ‹Ani iimii'n ha'no'n haaso'enexxa ha'no umo ha'noongenninni uuddine'een. Ani bira wele magenuwwa giissexxinoqqe'e; worqetika yookaan birreti sibljika magno ifi'a giissexxinoqqe'e.

« ‹Buttiniinka tolchimalcho giissitettexxi isi hanna ani'a ciincatika tolchanna mittummatika tolchi'a atike gedhebonaa'n atixxe re'enaa'ninna atike lalonaa'n tolhchi. Summi ank ulfataashsha asssannoxxe bakka duuchcha'n atiba'a dagennexxi ate'e eebbisannon. Kinjinka tolchimalcho ani'a ijaartattole bocemeeke kinjika giissitoxxe; sibil iso'o kissottole battossitaaxxe bocemeeke kinjika jaartoxxe.13 Saal atik leelabaashsha anke tolchimalcho'n hani'a riqake'n qabattoxxe'e.› »

Source notes (13)
  1. Cross-reference Fula. 34:17; Lew. 19:4; 26:1; Lew. 4:15-18; 27:15.
  2. Cross-reference Fula. 34:6-7; Lak. 14:18; Lew. 7:9-10.
  3. Cross-reference Lew. 19:12.
  4. Cross-reference Fula. 16:23-30.
  5. Cross-reference Fula. 23:12; 31:15; 34:21; 35:2; Lew. 23:3.
  6. Cross-reference Dada. 2:1-3; Fula. 31:17.
  7. Cross-reference Lew. 27:16; Mat. 15:4; 19:19; Mar. 7:10; 10:19; Luq. 18:20; Efe. 6:2-3.
  8. Cross-reference Lew. 20:10; Mat. 5:27; 19:18; Mar. 10:19; Luq. 18:20; Rom. 13:9; Ya'i. 2:11.
  9. Cross-reference Lew. 19:11; Mat. 19:18; Mar. 10:19; Luq. 18:20; Rom. 13:8.
  10. Cross-reference Fula. 23:1; Mat. 10:18; Mar. 10:19; Luq. 18:20.
  11. Cross-reference Rom. 7:7; 13:9.
  12. Cross-reference Ibr. 12:18-19.
  13. Cross-reference Lew. 27:5-7; Iya. 8:31.

Gedeo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.