Skip to content
BibleKenya

Gedeo Bible

Fulatikaa Maxaafa 11

Angafuwwa Duuchcha'n Ibbeexxa Bala

Duuchchi Woddiki Gootti Muuse'e hiyyee qici, «Wele mitte bala Gibtse'ninna Feri'ooni'n iyyedagannon; ookkoneechchi uduma Feri'ooni ookkone boganaan me'itino'aa ha'noo'o wocci assaan; wele waalini mittikinna gattinebaang ha'no'o shorraan. Labbak ifike ollalchonaa'n meyyaxxinna ifixxe olla'lchonaa'n birretikanna worqetika seesuwwa no'aa uwwe hine adhdhinaashsha Isira'eelke arda'ni kuli» hiyye. Duuchchi woddiki Gootti Isira'eelik ardi Gibtseke ardi edo elle alfaashsha asse; iittanni Muusenna Gibtseke bogi giddo Feri'oonike ja'laabuwwa'ninna ardake'n lumoo qica ulfaateemmake manjomman.

Muusenna, «Duuchchi Woddiki Gootti hiyya'nee qici, ‹Hashsha wodhaka kadda wodda ani Gibtseke bogi giddi'a fulannon. Gibtseke bogi giddo angafi belti duuchchi, mootete'n offo'leeke Feri'oonike angafa beltinaa'n daamma daltaaxxe garbitike angafa belti qico'n hedheek angaf belt reyaan; iittanni horekenaa'ninna edise ilemeeki duuchchi reyaan. Gibtseke bogi giddo duuchcha'n konnechchi edo kadde egendebaaxxi edi'aanna kaddabaaxxi jabbaxxi humbaashsha kaddaan. Yaane kinni Isira'eelike arda'n kadi hore insa'neke'n wolchi midde dutabaan› eettene yanna Duuchchi Woddiki Gootti Isira'elike ardixxe oddo'ninna Gibtseke ardixxe oddo'n gargarumma uggaaxxa egendinaan hiyye. Muusenna ja'laabuwwi atiki ani edo dagee heeshshi hyyeexxi ‹Atinna fuli; atee hordofa'neek ardi duuchchinna fulowwaal› hiyya'n anee kadhataan; aninna ookkone uduma me'anonni» hiyye. Ookkonechchi uduma Muuse jabaxxe aarenni Feri'oonbaa'n fule.

Duuchchi Woddiki Gootti Muuse'e, «Maso anxi Gibtseke bogi giddo heddato'a Feri'oon ha'no hitinaaxxa laqa gibaan» hiyye. Muusenna Aaroon konnee manbe'uwwa duuchcha Feri'oon edo assine; yaane kinni Duuchchi Woddiki Gootti Feri'oonika godoba jabeesse; Feri'ooninna boga ifikenaa'n Isira'eelika arda me'o'aa wocci assebaan.

Gedeo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.