3 Yohaannisixxa Erga 1

1Iikki Geerchi;

Dhugaat eeyyannek eeyyemeeke anka jaalo Gaayiyoosi'a.

2Anke jaaloo! Lubboti elo qico hexxeteshshanni fayyatinna elo qico hexxatoshshanna yaane duuchchi ati'a qajeeldo'a soodataannen. 3Dhugaatee xuurameesake kaddettexxanna marendaatekinna dhugaate'nite kaddemmaxxee mitti mitti dayyuwwi dageexxi atixxee dhugaa kulaa wodda ani lumoshsha gammadennen. 4Anxi oose dhugaate'n mammarenda'naa laqati iimi darre caldaaxxa gammashsho ani afebe'no.

Gayiyoosixxa Galateefatema

5Koo jaaloo! Ati'a keessummate kandoolenna midde dayyuwwakee assitaatexxe yaane duuchchinni ati xuurameesaken. 6Insa'ne ati affeetexxe jaalalaxxee Mageniixxe tuuta edo dhugaa kulleen; Mageno gammachchinsaa qicinni ati insa'neke ora insa'ne gargartottole eloxxe assitaton. 7Insa'ne Kiristoosii'i ergatemo'aa fulee wodda Kirstoosii'i amanebaake mannanaa'n mittechchonna adhdhinebaakiten. 8Yoona welti dhugaatee mitteba hunjannoshsha iitta hedheeka manna no'o gargaara hassissaan.

Diyoxiraaxisixxanna Dimeexiroosixxa Galateefatema

9Mageniinxe tuuta'a borreesseennan; yaane kinni akeekisanjoke kado'a eeyyaaki iikki Diyotirefiiisi yaada no'oka adhdhebaan. 10Tennexxee ani dagonnole isi fuggoke haaso'inni summa no'oka balleesso'a assaaxxa duuchcha duuchchinge'n haaso'annon. Tinninna isoo hanqatee'naa dayyuwwa adhdhabaan; insa'nee adhdho'a hassaaka duuchcha hoyyaan; Mageniinxe tuuta giddii'ni insa'nee fulchaan.

11Koo jaaloo! Eloxxe kaddeexxa malee fuggoxxa labboxxe'e; elooxxe kaddeexxa assaki duuchchi Magenokenaa'niten; fuggoxxa assaaki kinni Mageno uudeebaan.

12Dimexiroosi'a manji duuchchi dhugaa kulaan; dhugaa ifinge umininni isi'a dhugaa kuldaan; no'onna isi'a dhugaa kullannon; ha'nonna dhugaa kula no'oxxi dhugaate kaddeexxa egendinaan.

Muuxamiinka Nage'a

13Ati'a borreessa hasaannexxi heddo yaane afeennan; kaddo malee'e woraqatake'ni borreessonnaa eeyyabe'non. 14Shiqoxxe yanna'ni atee uudonnoxxa addataannen; ookkone woddanna welti afemmennexxi haasonnannon.

15Nage'i ati'a kadowwaal; jaaluwwikinna ati'a nage'a dhaama'neen; atinna jaaluwwa mitte mittengee nage'a anka shiqishi.