1 Moyanjika Maxaafa

Taakkakaa Moyanjuwwiinkaa Maxaafa

E'yichchoo

Taakkaki moyanjuwwiink Maxaafi kuta mitte, lamiinge Samu'eeli Maxaafuwwinaa'ni safendeexxi hexxexxemaxxe Isira'eelike moyanjuwwixxe galchaxxe jirte'n itti aandeexxeni. Kunni Maxaafi giddo hexxeexxi yaanuwwa sase kutuwwa'n qoodema dandetaani.

1. Solomooni ifike annaxxa Daawwitixxe bakka'ni moyeexxi Isira'eelikenna Yihudiinke moyanjo kadeemmaxxeenna ifika anna Daawwitixxe reyoxxa kulaakeni.

2. Solomoonxe mootummaka jeejanna isi hujeexxa hujuwwa ege'nishaaxxe jirte kadda wodda, tenne hujuwwanaa'n xalli hiteexxi Yerusalemi'n ijaaremeeke woyyichcha galmani.

3. Isira'eel middixxenna bita'ixxe mootumma hiyyende ye'emati lameba qoodendeemaxxenna iitti mitte mittendi mootumma Kirsitoosixxe ilensha edi darre sallane dhibba wogga qico'n moye galchemake moyanjuwwixxeera kulaakeni.

Konne lame Maxaafuwwa'ni mitti mittingi akeekisanji iso'n murte murendaammak isi Duuchchi Woddike Gootti'a leellishaaxxe xuurameessummaxxe qixxe'ntemmani; iittani konne boguwwa bogiki nophphichchinna yaanetixxi qajeela mikemammaki tenne kunni akeekisanjuwwi leellisha'emmaxxe xuurameessummaxxe qixxe'ntemmani; wele darreenaa'n alagiinxa magenoonfachcho hordofanna ajajema gopha, konne akeekisanjuwwanna kadi ooke arda ba'netibaa akeekaammani. Middixxe mootummaki moyanjuwwi duuchchi hega uushshote'n inbe'emmake kadaa wodda Yihudiinke moyanjuwwixxi jirte kinni ookko fuggalessa kademakixeeranna ookke eloke kademakixeeranna kulda'emaxxemman.

Taakkake moyanjiinke Maxaafixxi mitte kuta giddo yo'osha ege'nemeekiir, iikki Duuchchi Woddike Goottixxe tukke kadeexxi raagiinka hiyyichcho haasoonnammakiinna ardi fakketixxa magenoonfachcho hordofabaashshanna Duuchchi Woddike Gootti'a ajajema gibabaashsha xexxe'achchinsammaxxi shenitte wabeeko hexxemani; insa'ne giddi'n yo'oshsha ege'nemeemmaki Eliyaasite kadaa wodda, isinna Ba'aalixxe qeesenni welti asseemaxxi wo'laancho mitteba kulende'eeni (Haf. Adh. 18) uudi.

Konne Maxaafi Giddo Hexxeexxa Yaanuwwa

Daawwitike barrixxa muuxensha

Solomoonixxa mootumma

Solomoonixxa galcha

Siretixxa wogguwwa

Galiiminxa huje

Muuxamiinxa wogguwwa

Qoqqoodendeexxa mootumma

Middixxe gosa gosa minixxa jalla

Yihudiinkanna Isira'eelika moyanjuwwa

Wabeeka Eliyaasii

Isira'eelika moyanjo Aki'abbii

Yihudiinka moyanjo Iyyosaafixxinna Isira'eelika moyanjo Akaziyaasii'i