Titusu 2

Əɓo manai zhni ntu nabagyi manai ɓo

1Ama əho, ɓəshishi nu ha wunya n kwo dna n gaiciyanyawu kpokəloi ofye. 2Wu azakwoyi nge ɓa kwu əmìɓwa, n kwnuce n mwamwagai, n ɓahnii tukwo wnashi, n nunui n gaiciyagai, dna n yeyewu ɓədo n əmìfyi.

3N ɓwajesnu lonu, wu anyigbakwowyi ənya ɓa kwu zhni amwamwagayi fyi n əɓa anyìgyi, to ɓa kwu zhni aza ayewnuyayi m, kwo anamnuwna sniyi n mwa m, ama aza n ɓa wunya n kwo bmya. 4Nlonu n ɓa ɓá wu anyikwokasa ɓa wu əɓa anu yeye ɓədo n əɓa aɓyii, 5ɓa kwu ɓahni tukwo wnashi, njesnu n tnadodnai, ɓa kwu zhni apyi aknawnai, ɓa zhni aza shebmyashi, njesnu ɓa kwu əɓahni ga fyi n əɓa anu akwnu, nabai n əzaho taa tu Shekwoyi ɓədagbma cegye m.

6N ɓwajesnu lo nu, kwu agwumyizhi azanugbaikasa ɓa kwu əɓahni wnashi. 7Dna n ɓəhoɓəhoi shi ɓa ofye dna n shebmyashi zhni. Dna n əho nyawu, wu gaiciyazhni n əhohni, n wyenyii 8njesnu ɓəda kpokəloi a taa ci kwo aɓoya m, nabai aza yi n ɓa gnyiapaapa n hoi nyi, n vnyinkwo ɓə wo ɓa ntuge ɓa too ɓwa ɓənukwoi ho n ɓa ɓa da tu n əyi tukwo m.

9Wu afyenu nge ɓa kwu ɓahni ga fyi n əɓa adagayi akwnu, fyi n ɓəhoɓəhoi. Ɓa la ɓahni yi ɓa zhni əɓo n kwo da ɓa jesnu to ɓa fyi ɓa aɓo agbe m. 10Njesnu ɓa to wyi ɓa vyi m, ama ɓa wu nge ɓa kwnuce lo n a ɓa kpema ɓa n ɓəhoɓəhoi, nabai n zokwo dəhodəhoi, n ɓa ɓa zhni nyawu ntu Shekwoyi əyi Gnyiyi ɓo kwaa da gwo.

11Ntuge shebmyashi Shekwoyi nya n kwo ga aza vnyanya gnyignyi nyi, kwo la kpeyaɓe. 12Kwo wu yi nge yi gna, tnashekwodnawo ɓəzhni n anyi aɓəpwawoi nge “Aawo,” njesnu ya gyianyì n əyihni tukwoi wnashi, n kpmiabyezhi, n alu amanai fyi n cala ye n kwo nyi, 13əsa n yi zhi lo yii pmi awyetu anabəlika nya; latu kpeyawu əyi Shekwoyi yaakwo nya n Gnyiyii, Yeisu Kirisiti. 14Əza n wo ɓə la əwohni ga ntu əyi ɓo nabai wa shna yi n əkpízhni vnyanya njesnu wa pmya yi ya ga əwohni, aza n ɓa zhni əwohnihni anya, nabai ɓa zhni əɓo n kwo bmya n wyenyii.

15Nlonu, aɓo nyi n ho ɓa wu. Ga azaje agwumyizhi njesnu ha gnaknyi aza n ikwoi vnyanya. To ye nge zahozahoyi wa ci ho wyegba m.