Ɓəkpəkpəyawu 7

Atuzè 144,000

1N dəye avnu ma gye amaləka ngwnu-anyi n gnyiagnyi zhi n anyì aɓwakwonu ngwnu-anyi, n ase ngwnu-anyii wnashi nabai ɓa zhni to əse dəhodəhoi kwa cikpe n əknyi kwo n shikwo kwo n shnuwna dəhodəhoi m. 2Nlonu ma gye maləka ədo woi gbmi gwnuzhi ń kpəkwó, n Shekwoyi wyewyeyida tuzèi shi. Wa yì amaləka ngwnu-anyi n bəgye yaakwoi, n a ɓəə kwu ikwo ga ɓa nge ɓa wnu əknyi ya ɓədo n shikwoi nyi: 3“Fye to kwu əknyi zhniagbma kwo shikwo, kwo ashnuwna m, akpəge əsa n yi ɓə kwu Shekwoyi afyenu zo atuzè kpe n əɓa anyikwnumi.” 4Nlonu ma wo shi aza lo n bəgyé, n a ɓə kpe ɓa atuzè nyi: 144,000 n abye vnyanya n Israila.

5N Yahuda əbyé a kpe 12,000 atuzè,

n Rubyen n əbyé 12,000,

n Gad əbyé 12,000,

6n Asha əbyé 12,000,

n Naftali əbyé 12,000,

n Manase əbyé 12,000,

7n Simyiyon əbyé 12,000,

n Levyi əbyé 12,000,

n Isaka əbyé 12,000,

8n Zebwulum əbyé 12,000,

n Yusufu əbyé 12,000,

n Banyami əbyé 12,000.

Deeji yaakwo n aje abwuibwui kpadalaii kpe

9N dəye avnu, ma shiawye ma gye deeji yaakwo n zhi n əmi abye n əza taa myi wa ba ɓa m, n əknyi dəhodəhoi, əbyé, n azai n anyitalai, n gnyiagnyi zhi n əbeshnikpegye abye jesnu n Kwugyasnáyi abye. Ɓa ɓə n ajekpadalai abwuibwuii nu kpe n abalái shi n əɓa akwnu. 10Njesnu ɓa fyiakwu n bəgyei latu:

“Gnyignyi zhni əyi Shekwoyi nya nu,

n wo sasetu n əbeshnikpegye nyi,

jesnu kwo zhni Kwugyasnáyi nya nu.”

11Amaləka vnyanya ɓa ɓə gnyiagnyi zhi n shekna əbeshnikpegye ɓədo n shekna azakwoi n anya awyewyeyii ngwnu-anyi. Ɓa yazhi n ɓa awyebai shnikwnu n əknyi n əbeshnikpegye abye jesnu ɓa ga Shekwoyi mwamwa, 12ɓai gna:

“Aamyi!

Cici n latui

n wyemwai n amisai n mwamwagai

n ikwoi n kalái

ɓa zhni əyi Shekwoyi nya nu nyalonyalo.

Aamyi!”

13Nlonu zakwoyi gbmanyi ho wa nya mi əɓo, “Aza ye n ɓa zhi n aje abwuibwui kpadalai kpe nyi, ɓa zhni anyika nu a, jesnu ɓa kwnuɓe n nanu a?” 14Ma dna wo ɓəgbe, “Haamwasa, ho kpəlo.”

Njesnu wa gna, “Aza nyi n ɓa kwnuɓe n azhnìgye yaakwo; ɓa la əɓa ajekpadalai zhna ɓa kwu ɓa zè abwuibwui n Kwugyasnáyi amii. 15Ntucenu,

“ɓa zhi n Shekwoyi əbeshnikpegye abye

jesnu ɓai zhni əwo tnutnu n nyipyei n sukwoi dna n Dagayipwuwa;

jesnu əza n wo sasetu n əbeshnikpegye nyi,

wo ɓa tu ɓa ofnu n əwo abye.

16‘Ɓa to ɓə je myikwnu wo m nanyinanyi;

ɓa to ɓə je nuwna myikwnu wo m nanyinanyi.

Nyipyei to ɓə je ɓa wo m,’

kwo nyipyei əná kwoi je ɓa gyi m.

17Ntuge Kwugyasnáyi n wo dna n əbeshnikpegye atasni nyi,

wo ɓə la zè əknyiknayi;

wo ɓə gyiabye n ɓai lo nuwna pyipyii wyewyeyi nya.

‘Njesnu Shekwoyi ɓə wnu awyenyi dəhodəhoi ya n əɓa awyeba.’ ”