Ɓəkpəkpəyawu 15

Amaləka ngwnu-tnaaba n agwnùi shi

1Ma gye əznù ədo ɓəwowoi yaakwo nya, dna n əshemi: amaləka ngwnu-tnaaba n agwnù akpmasnui shi, ngwnu-tnaaba. Əɓa nu ɓə zhni akpmaknai ntuge n əɓai nu n Shekwoyi minagyi napyei ɓə nu. 2Jesnu ma gye ənya n kwo ɓə wu ngye shikwo maganyi kwoi bmyana n gbmaje n ənái. Njesnu n azai gnyiagnyi kpe n shikwogbe, n ɓa ɓə kwu nasalagyi tu n nyawnanyawna n əkwo nyadogbei, n namba əkwo əye nyai. Ɓa kwu amwulo shi n Shekwoyi ɓə ga ɓa nyi 3ɓa kwoanyi Mwusa nya, Shekwoyi tnutnuyi jesnu n Kwugyasnáyi nyai:

“Aɓo ayaakwo n aɓoawowoyii ɓa zhni əho atnutnu nu,

Dagayi Shekwoyi Kaláda Duduyi Vnyanya.

Əho azokwo zhni afyecei nu n gaiciyai,

Əsu abye nya.

4Dagayi, nyika nu taa wo ho ədna ma a,

jesnu wa ɓe n latui ga əho əye ma a?

Ntuge əho nu ɓwasnu gbmanyi kəto n ho gyigyiyi.

Abye vnyanya ɓa ɓə ɓe

ɓa ga mwamwa zhi n əho abye,

ntuge a la əho atnutnu aɓəfyece nya kpmiyawu.”

5N dəye avnu, ma shiawye ma gye dagayipwuwa dna n əshemi; n əkwo nu zhni dagayilubwui owa ɓəgbeshi nya nyi; kwo ɓə gwugwuiya gnyi. 6Amaləka ngwnu-tnaaba ɓa kwnuɓe n Dagayipwuwa, n agwnù ngwnu-tnaabai shi. Ɓa ɓə n aje agyigyiyii aluweluwei anashei kpe jesnu n azinali ajeɓyii wna n əɓa agwu. 7Nlonu nyawyewyeyi gbmanyi fyi n ngwnu-anyi yi, kwa ga amaləka ngwnu-tnaaba ashnapa ngwnu-tnaaba azinali nya, n nunui n Shekwoyi minagyi napyei n wo nyì nyalonyalo nyi. 8Njesnu Dagayipwuwa kwaa nu gnyi n awúi n ɓa kwnu n Shekwoyi latu aba ɓai kwnu n əwo kalái. Zahozahoyi to ɓə myi wa lodna n Dagayipwuwa m, nya əsa n agwnù ngwnu-tnaaba, amaləka ngwnu-tnaaba nya ɓə kwu tnutnu zozhni.