Yohana 3:16

Nikwodimwus gwo nyawu n Yeisu

1Nsayii Farisiyi ho ɓə nyi, ai yi wo nge Nikwodimwus. Wo ɓə dna ń Ayahudiyibwokwnu abegyiyi. 2Wa ɓe Yeisu aba n sukwoi wa gna, “Rabyi, yi kpəlo nge ho zhni nyawuyi nu n wo gbmi n Shekwoyi aba. Ntuge zaho to lo n wo ɓa myi wa zhni aznù ye n ho gnyi hoi zhni nyi m, akpəge Shekwoyii kwnusnu lo n woi.”

3Yeisu wa dnaɓəgbe, “Ɓəhnihni mi gna ho, əza to lo ń wo ɓə gye Shekwoyi əbemi əwye m, akpəge a la wo shnama.”

4Nikwodimwus wa nyaɓo, “A ɓa shna əza ma n wunanu woi la kwo a? Ɓəhnihnii wo taa je lodna n əwo əya nubwo a shna wo ma m!”

5Yeisu wa dnaɓəgbe, “Ɓəhnihni mi gna ho, əza to lo ń wo ɓə lodna ń Shekwoyi əbemi m, akpəge a la wo shnama n nuwnai ɓədo n Zafnui. 6Nayi ma nayi nu, ama Zafnu nu ma zafnu. 7Əmi ɓədada əɓo to wo ho m, nge, ‘Ɓəshishi nu a shna ho ma.’ 8Əse ci lo n əɓwai nu n kwo da kwo. Ho wo əkwo aɓəci, ama ho ta kpe aba n kwo kwnu, kwo aba n kwo lo m. N ɓwasnu nlonu ń əzahozahoyi aba, ń a ma wo dna n Zafnu.”

9Nikwodimwus wa nyaɓo, “Dəye ɓa yezhni n wuna a?”

10Yeisu wa gna, “Ho zhni Israila nyawuyi nu, ho nyi to n aɓo ye awyegai lo m?” 11“Ɓəhnihni mi gna ho gaiciya, yi da əɓo nu n yi kpeye lo, jesnu yii gbmiɓo tu n əɓo nu n yi kwu gyewye, ama dudulonu əfye aza ta gwo əyi ɓəgbmi lo m. 12Mi kwu aɓo da ho n ɓa nyì n anyì, honyi too ga gaiciya m; to, ho ɓa ga gaiciya n wuna, əsa n ma da ho əshemi aɓo a? 13Əza to lo n wo shni lodna n əshemi m, akpəge Əza Nugwnu n wo ɓə gbmiɓe n əshemi nyi. 14N ɓwasnu shi Mwusa ɓə kwu owa gyikpe n kwnuyi ń zhabwikawu, ntulonu kwo zhni ɓəshishi nu ai la Əza Nugwnu gyitu, 15nabai əzahozahoyi n wa ga gaiciya, n wo ɓa myi wa ɓwa wyewyeyi nyalonyalo nya dna n əwo.”

16Ntuge Shekwoyi ɓə ye n anyìi n mwa, kwa zhni wo waa əwo Nugwnu mamai ɓyigba ga, nabai əzadəhodəhoyi n wo ga wo gaiciya, n wo to ɓə ɓwu m, ama woi ɓwa wyewyeyi nyalonyalo nya. 17Ntuge Shekwoyi to ɓə tnu n əwo Nugwnui dna n anyì, wa da anyì owa nu m, ama wa gnyi anyì dna ń əwo. 18Əzadəhodəhoyi n wa ga wo gaiciya, wo to n knyiznui lo m, ama əza n wo to ga wo gaiciya m, a la wo lu knyiznu ntuge wo too ga gaiciya dna n Shekwoyi Nugwnu ɓyigba gbmanyi kəto əye m. 19Dəye nu zhni owaznuya: Bwuznagna kwo la lo ɓe anyì, ama aza gná wyegbma nu ye lo, a fa bwuznagna, ntuge əɓa atnutnu zhni anukwoi nu. 20Əzahozahoyi n wo zhni tnagaiciya, wo zhni bwuznagna nuwnuyi nu, jesnu wo taa lodna n bwuznagna m, ntuge wo wodna nge əwo atnutnu ɓaa kpmiyawu. 21Ama əzadəhodəhoyi n wo gyianyì dna n gaiciyanunui, wo lodna n bwuznagna, nabai n a ɓa gye kwo pəipəi nge əɓo n wo kwu zhni nyi, wa zhni kwo dna n Shekwoyi nu.

Yohana gbmiɓo tu n Yeisu tukwo njesnu

22Ń dəye avnu, Yeisu n əwo amwutuyii ɓa kwnuya ɓa lofyi n Yahudiya əzhigba, aba n wo ɓə la snu əsa dna n kwnusnu n ɓai, jesnu woi zhni ɓa batizima. 23Nsayii Yohana ɓə dna woi zhni batizima cè, dna n Ayenon, n wo vyivyiwyi n Salimii, ntuge nuwna ɓə fyi n ɓo n mwa, jesnu aza ɓai ɓe ai zhni ɓa Batizima. 24(A to ɓəə dna Yohana n zhalu m.) 25Aɓənakpeaje ɓa laka dna n Yohana amwutuyi atasni n Yahudiyi hoi, ntu anyazhna kwnunu ɓo. 26Ɓa ɓe da Yohana ɓa gna wo, “Rabyi, əza yi n wo ɓə kwnugnyi n hoi n Urudu əkpma dəyi nyi; əza n ho ɓə gbmi wo əɓo nyi; shiawye, wo zhni batizima lo, jesnu əzahozahoyi lo da wo nu.”

27Yohana wa dnaɓəgbe, “Əza ɓa ɓwa ənya nu gwo n a ga wo n əshemi. 28Əfye n fyehni, fye ɓa gbmi mi əɓo nge mi kwu gna, ‘Əmi nu to zhni Kirisiti m, ama mi zhni əza nu n a tnu n mii n gyi n əwo abye.’ 29Mwulanyikwo zhni mwulaɓa nya nu. Mwulaɓa nugwnudo n wo zhni mwulaɓa tnutnu, wo zhni wa pmi jesnu wa kna wo tnubwa, waa nu n agbmadai əsa n wo wó mwulaɓa bəgye. Agbmada yi zhni əmi nya nu, jesnu nsaiye kwo nunui lo. 30Ɓəshishi nu wa gna yaakwo zezè; əmihni ce ɓəshishi nu ma gna gbàgbà.”

31Əza n wo gbmiɓe n əshe, wo du aza lo vnyanya; əza n wo gbmi n anyì, wo zhni anyì nya nu, jesnu wo daɓo ngye əza nu n wo gbmi n anyì. Əza n wo gbmiɓe n əshemi, wo nu du aza lo vnyanya. 32Wo gbmi əɓo nu n wo kwu gyewye jesnu woi wo, ama əzaho to lo n wo gwo əwo ɓəgbmi m. 33Əzadəhodəhoyi n wo la kwo gwo, wo lá əɓwa tu nu nge Shekwoyi zhni gaiciyanunuyi nu. 34Ntuge əza n Shekwoyi wo la tnu ncei nyi, wo da Shekwoyi aɓədagbma nu, ntuge Shekwoyi ga wo Zafnu ntna əgnatui. 35Dada ye Nugwnu lo, jesnu wo kwu nyahonyahoi fa fyi n əwo akwnu. 36Əzadəhodəhoyi ń wo ga gaiciya dna n Nugwnu, wo n wyewyeyi nyalonyalo nyai lo, ama əzadəhodəhoyi ń wo na Nugwnu aɓo, wo to ɓə gye wyewyeyi m, ntuge Shekwoyi minagyi napyei kpetu lo ń wo.