Aibraniyi 3

Yeisu yaakwo n du Mwusa

1Ntulonu, əmi azaje azanugbai n anyikwoza agyigyiyii, n yi n aɓwai kwnufyi lo n əshemi yiyì nyi, fye kwu əfye aɓənubwozhni kpe n Yeisu nu, ń yi da əwo əɓo nyi, nge əyi tnutnuloyi n pirisiti dnagbmai. 2Wo ɓə zhni gbenuyi nu ga Shekwoyi n wo ɓə knyí wo nyi, n ɓwasnu shi Mwusa ɓə zhni gbenuyi nu nyi dna n Shekwoyi pwuwa vnyanya. 3A kwu gye Yeisu n kwnuce wa gwo mwamwaga n du Mwusa nya, n ɓwasnu shi pwuwa miyi n mwamwai lo n du pwuwa n kwohni nyi. 4Ntuge pwuwa dəhodəhoi əzaho nu mi kwo, ama Shekwoyi nu mi nyahonyahoi. 5Mwusa ɓə zhni gbenui nu ngye tnutnuyi dna n Shekwoyi pwuwa vnyanya, woi gbmiɓo tu n əɓo n Shekwoyi ɓə ye wa da n abyeɓwa. 6Ama Kirisiti zhni gaiciyazhninunui nu ngye Nugwnu dna n Shekwoyi pwuwa. Njesnu əyi nu zhni əwo pwuwa; ndei n ya kwu əyi abwugbakalafyi shiɓwa kamkam ɓədo n awyetui ədo n yi gbma ncei nyi.

Ɓəkwnukwnù tu ntna gaiciyaga ɓo

7Ntulonu, shi Zafnu Gyigyiyi daɓo lo:

“Nnaiye, n fya wo əwo bəgye,

8fye to kpe əfye adu akalá m

ngye shi fye ɓə zhni dna n tukwognanakwo nyi,

dna n mwumwu əsa fyi n zhabwikawu m,

9aba n əfye azakwoyi ɓə mwi mi jesnu ɓaa mi pmigye,

kwo shikwonyi fyi n aye shiinyi yi, ɓa ɓə kwu aɓo gyewye n mi ɓə zhni nyi.

10Cenu ɓə zhni ma gyi minagyi n cala yii;

ma gna, ‘Əɓa adu kwnuya lo n zokwo ciici,

jesnu ɓa too kpe əmi azokwo əye m.’

11Ntulonu ma kwu əɓo da n nyasii dna n əmi minagyi,

‘Ɓa taa lofyi n əmi snusnu m, nanyinanyi.’ ”

12Əmi azaje n amapwuyii, fye to ye a gye əzaho dna n fye, n ədu leifyizhniyi, tnagaiciyaga nyai dna, n kwo pmyi əza ya n Shekwoyi wyewyeyida aba m.

13Ama fye fyi aje bwugbakala fyegyifyegyi, əsa kwo ye ɓwagnyi lo ai yi kwo “Nnaiye,” nabai n a to ɓə gye əzaho n bwugbai kpakalá ntu leifyi kwocednadna nya ɓo m. 14Yi kwu ɓe ya kwnu ɓwadodna n ajei dna n Kirisiti, ndei n ya kwu əyi bwugbaɓwato kpmisnui shiɓwa n myignyii, nya azozo ba. 15Ngye shi a ye ɓwa da nyi:

“Nnaiye, n fya wo əwo bəgye,

fye to kpe əfye adu akalá

ngye shi fye ɓə zhni dna n wyenakpeya nyi m.”

16Anyika nu ɓə n ɓai, n ɓa ɓə kwu wo, ama ɓa kwu bwugba kpakalá a? Aza yi nu to vnyanya n Mwusa ɓə kwnu ɓa n Masar nyi m? 17Njesnu n anyikai nu, n wo ɓə gyi minagyi n ɓai aye shiinyi a? N aza yii nu to, n ɓa ɓə zhni leifyi nyi, n əɓa anayi ɓə zhniagbma fyi n zhabwikawu nyi m? 18Njesnu n anyikai nu n Shekwoyi ɓə si nyasi, nge ɓa taa lo əwo snusnu m, nanyinanyi; n to n aza yii nu, n ɓa to ɓə vyi əwo ɓəgbetu nyi m, ma a? 19Ntulonu yi kwu gyewye nge ɓa to ɓə myi ɓa lofyi m, ntu n əɓa tnagaiciyaga ɓo.