Afyisuyi 6:10

1Aɓyi, fye vyi əfye azamayi ɓəda dna ń Dagayi, ntuge dəye dnalo n ɓəfyece zokwo. 2“Ga əho dada mwamwa n əho əyai” əkwo nu zhni ɓəgbetu kpmisnui n ɓəgbei shi, 3nabai ń aɓo ɓa lo ho n bmya jesnu ha wo wyewyeyi kpamwai agbmada dna n anyì.

4Adada, fye to fyi əfye aɓyi minagyi m; n əkwoɓwi fye shi ɓa fyi ń tata ɓədo n Dagayi gbegai.

5Afyenu, fye vyi əfye adagayi anyì nya ɓəda n mwamwagai n ədnawoi, jesnu n ədu ɓəhnihni nyai, n ɓwasnu shi fye ɓa vyi Kirisiti ɓəda nyi. 6Fye vyi əɓa ɓəda, toge fye ye fya ɓwa əɓa bmyashi nu ɓwa m, əsa n ɓa gye fye əwye lo m, ama ngye Kirisiti afyenu, fyei zhni Shekwoyi ɓəye fyi n əfye adu. 7Fye zhni tnutnu n əfye abwugbai vnyanya, ngye fye zhni Dagayi nu tnutnu, toge ngye fye zhni ga aza m, 8ntuge fye kpəlo nge Dagayi ɓə ga zahozahoyi n fye gyiba ntu əɓo manai dəhodəhoi ɓo n wo zhni, kwo woi zhni fyenu nu kwo əza loloiya. 9Adagayi, fye zhni əfye afyenu əɓəmanai. Fye to fyi ɓa ədna m, shikwonyi fye kpəlo nge əza n wo zhni əɓa Dagayi n əfye nyai nyi, wo dnalo n əshemi, wo ta gwo aza woi wu ɓa kakai m.

Shekwoyi akwnuakaya

10N kpmasnu, fye kwu akalá fyi dna n Dagayi, jesnu dna n əwo ikwodudui akalá. 11Fye kwu Shekwoyi akwnuakaya kpe n nunui, nabai n fye ɓa myi fya gnyiapaapa n Shetam agbákwnui. 12Ntuge əyi abwafyi to zhni nayi ń amii nya nu m, ama ǹ abegyiyii, ń aikwoi, ǹ akalái fyi n wyegbma anyì ye nya, jesnu n azafnu ɓənukwoizhni nya ń ashebmana. 13Ntucenu fye kwu Shekwoyi akwnuakaya anunui kpe vnyanya, nabai shi nyipyei nukwoi ɓə ɓe, fye ɓə myi fya gnyiagnyi zhi, n fya kwu ɓəhoɓəhoi zozhni, fya kwu myizhi. 14Fye kwu myizhi nsaiye, fye kwu gaiciyanunui shnipanya pa n əfye ashni, fya kwu ɓəfyecezhni agwuɓwunya kpe n əɓa aba. 15Fye kwu abwada fyi n əfye apita n fyehni yeyei fya lo n nabagyi manai bwugbafu nyai. 16Ənya n fye ɓa ɓe n aɓo ye vnyanya, fye la okwnukpáta gaiciyaga nya la, n əkwoi nu n fye ɓa myi fya wnu əzanukwoyi aknawyi əná ncei. 17La snuknakàta gnyignyi nya la, n əbeyakwo Zafnu nyai, n kwo nu zhni Shekwoyi ɓədagbma nyi. 18Fye zhniaduwa fyi n Zafnu n asai vnyanya, n aduwazhni dəhodəhoi pyai, n wyegyii. N ɓəyei dna n bwugba, fye kwu zhi n əfyehnii yeyei jesnu ciici fyei zhniaduwa ntu n Dagayi aza ɓo vnyanya.

19Fye zhniaduwa ntu əmi ɓo ce, nabai nge əsahosahoi n ma daɓo ncei, a ɓa ga mi aɓədagbma n mi ɓa da, ma wu asigyi nabagyi manai nya ntna ədnawoi, 20ntu əkwo ɓo nu n mi zhni kwo ambasado dna n agbma nyi. Zhniaduwa ma myi ma da kwo ntna ədnawoi, shi mi ɓa myi.

Gnaɓyi kpmasnui

21Ticikwus, əmizado yeyei njesnu tnutnuyi gbenuyii dna n Dagayi, wo ɓa gna fye ɓəhoɓəhoi, nabai əfyehni ce fya kpe shi aɓo n mii lo, n əɓoi n mi zhni lo. 22Mi tnu fye n woi ntu n ɓəye tukwo nu, nabai nge fya kpe shi yi lo, jesnu wa kwu əfye bwugbamyizhi.

23Bwugbafu ga əyi azanugbai aje n əyi amapwii, jesnu yeye n kwnusnu n gaiciyagai n kwo gbmi ń Shekwoyi Dada aba n Dagayi Yeisu Kirisitii. 24Shebmyashi kwo kwnusnu n azai vnyanya n ɓa ye əyi Dagayi Yeisu Kirisiti n yeyei n kwo ta shna fyí nyi m.