Afyisuyi 4:32

Gbedogwnu dna n Kirisiti nayi

1Əmi, ngye zhaluda ntu Dagayi ɓo, nlonu mi gyi fye əwye nge fye gyianyì n kwnuce n yiyii ń fye la gwo nyi. 2Fye kwu əfyehni atukwogba shaasha, jesnu fya zhni pəceye, fya ɓwamì n ajei dna n yeye. 3Fye zhni ɓəhoɓəhoi nabai fya shi gbedogwnu Zafnu nya ɓwa, dna n bwugbafu n kwo nu n fyei yeɓədo nyi. 4Nayi lo gbmanyi nu jesnu Zafnu gbmanyi, n ɓwasnu shi a ɓə yi fye fyi n awyetu gbmanyi nu, əsa n a ɓə yi fye nyi. 5Dagayi gbmanyi, gaiciyaga gbmanyi, batizima gbmanyi; 6Shekwoyi gbmanyi, əwo nu zhni Dada anya vnyanya nya, ń əwo nu tu n anya vnyanya əshe nyi, fyi n anya vnyanya jesnu fyi n aɓo vnyanya.

7Ama a la shebmyashi ga zahozahoyi, shi Kirisiti ɓə gná kwo ya ga nyi. 8Cenuzhni kwoi gna,

“Əsa n wo ɓə gwnulo əshemi,

wo ɓə la aza-wnawnayi bəgyé kwu,

jesnu wa kwu anyaga ga əwo aza.”

9(Knyiyi nu gyi nge “Wa gwnulo əshemi” awyega? Kwo wu nu ge wo ɓə la shniɓe dna n əknyi snuta! 10Əza n wo ɓə shniɓe nyi, əwo nu ɓwa jesnu n wo ɓə gwnulo wa du ashe ya vnyanya, nabai n wo ɓa nu anyì vnyanya.) 11Ntulonu Kirisiti n əwohni tukwoi nu ɓə ga anyaga ye: atnutnuloyi, asheɓəgwognayi, awaazizhniyi, apasto n anyawuyii. 12Nabai wa kwu atnutnu akaya fyi əwo aza na akwnu ntu n tnutnu zhni ɓo, nabai ami Kirisiti nayi. 13Kwa nya əsa n əyi vnyanya ɓə lá ɓwadnado dna n gaiciyaga, jesnu dna n ɓəyekpe Shekwoyi Nugwnu nya, jesnu yii kwu akpikwo, yii kwu si aba n yi ɓə kwu zhi n nunuyi n Kirisitii vnyanya.

14Nlonu yi to ɓə kwu je zhi n zhni aɓyipwutu, ai zè əyi awye gwnugwnu n shnishnii m, ai knyiaɓwaya lo ɓwoye n ɓwayii n nyawu dəhodəhoi n agbakwnuyi nukwoi azagyifyiyii, zhni apma ncei n əɓa kwocedna m. 15N əkwoɓwi, yi da gaiciyanunui dna n yeye, ya mwa ya kwu zè əwo nayi akpikwoi fyi n zokwo dəhodəhoi n əwo nu zhni tukwo nyi, Kirisiti nuu nu. 16A n nayi yeɓədo vnyanya dna n əwo nu, njesnu əji ɓwaceyi dəhodəhoi n kwoi wnashi n abagbmanyi, kwoi mwa kwoi mi əkwohni dna n yeye, shi səpa dəhodəhoi zhni əkwo tnutnu.

Agbega ntu Kirisitiavyiyi anyìgyi ɓo

17Ntulonu mi gna fye ɓəye, jesnu mi la gyitu n kwo dna n Dagayi, nge ɓəshishi nu fye taa je anyìgyi shi Abyedo gyi nyi m kpeekpe, dna n əɓa ɓənubwozhni gbəloi m. 18Əba awyega fyi wyegbma lo jesnu n gnaje gnagnaiya n Shekwoyi wyewyeyii, ntu tnagənyikpe ɓo n kwo fyilo n ɓa, ntu əɓa adu kalákpe ɓo. 19Ɓa kwu ɓwu əɓa ɓənubwokpezhni nuwna vnyanya, ɓa kwu ɓahni ga nayi aɓəpwawo, nabai ɓa myi ɓa lofyi n asisi dəhodəhoi pya, jesnu ɓa nunui lo n fnanai. 20Shikwonyi, fye to ɓə ɓwa Kirisiti yekpé dna n zokwo yi nu m. 21She fye ɓə wo Kirisiti ɓo, jesnu a kwu gaiciyanunui wu fye, shikwonyi dna n Yeisu. 22Ntu əfye anyìgyi kwokwoyi ɓo, a ɓə kwu wu fye nge, fye la əfye əza kwokwoyi kpmaya, n kwo gnyi kwoi wnuya n əkwo aɓəpwawo kwocedna nyai nyi; 23a kwu fye zhni awoiwoyi fyi n aɓonubwozhni əfye abwugba nya; 24njesnu fya kwu əzawoiwoyi kpe, n a ɓə zhni wo, waa wu ngye Shekwoyi dna n ɓəfyece hnihnii n gyigyii.

25Ntucenu ɓəshishinu zahozahoyi n fye, wa fa akatáce ɓo, jesnu wa da gaiciyanunui n əwo kwnuzhiyii, ntuge əyi vnyanya zhni aga nu nayi gbmanyi nya. 26“Dna n əho minagyi to zhni leifyi m” To ye nyipyei kwa shni hoi ye tu n əho minagyi m, 27jesnu to ga Shetam apita tu aba m. 28Zahozahoyi n wo wyi əvyì lo, ɓəshishinu wa fa əvyiwyi ɓo, ama ɓəshishinu wa zhni tnutnu, wa zhni əɓo n kwo n apmai n əwohni aɓwai, nabai wa ɓwa nyaho wa ce ga aza yi n ɓa fyilo n əsnagyi.

29To ye ɓəda nukwoi dəhodəhoi kwa gbmiɓe n əho əgbe m, akpəge əɓo n kwo ɓa ga bmazhni ntu azaje mimi ɓo, shi ɓa n əkwo apmai lo, nabai n kwo ɓa bma aza yi zhni n ɓa wo nyi. 30Njesnu fye to dna Zafnu Gyigyiyi Shekwoyi nya minagyi m, a ɓə tu fye əznù n əwoi nu, ntu nyipyei shnashna nya ɓo. 31Fye la bwugbalilii kwnuya vnyanya, n napyei n minagyii, anyàwu n əyewnuyai, ɓədo n ɓəshinmì dəhodəhoi pyai. 32Fye zhni aje shebmyashi njesnu fya wu aje snusnugye, fyei zo aje abwi n ɓwasnu shi, dna n Kirisiti, Shekwoyi ɓə zo fye abwi nyi.