Akwolosiyi 4

1Adagayi, fye ga əfye afyenu anya n ɓa bmya, ntnagyifyi, ntuge əfyehni ce, fye kpəlo nge fye n Dagayii dnalo ń əshemi.

Agbega aje

2Fye kwu əfyehni ga fyi n aduwazhni ciici, fye kwu zhigwu njesnu fyei sa Shekwoyi ami. 3Jesnu fye zhniaduwa ntu əyi ɓo ce, nabai n Shekwoyi ɓa gwú abwokwnumi ya ntu n əyi waazi ɓo, nabai ya myi ya wú asigyi Kirisiti n mi dna n agbma ntu əkwo ɓo nyi. 4Fye zhniaduwa ń mi ɓa myi ma wú kwo n səsəiya, shi kwo gwo ma wú. 5Fye gyianyì ń cecei əsa n fye zhni aɓo n abmyida aba; əsa dəhodəhoi n fya ɓwa, fye zhniapma n kwoi n nunui. 6Ciici fye fa əfye azata ɓa kwu nu ǹ ɓəmanai, n dadai, nabai n fye ɓa kpé shi fye ɓa dna zahozahoyi ɓəgbe.

Gnaɓyi kpmasnui

7Ticikwus wo ɓa wu fye nabagyi vnyanya ntu əmi ɓo. Wo zhni əyido yeyei nu, tnutnuyi gbenuyi jesnu n tnutnu kwnuzhniyii dna n Dagayi. 8Mi tnu n əwoi nu n əfye aba, ntu əɓo ɓo n kwo to ɓwuɓwui lo m, nabai n fye ɓa kpe shi aɓo n yii wulo, jesnu n wo ɓa kwu əfye adu myizhi. 9Wo ɓe lo n kwnusnu n Onisimwusii əyido yeyeyi n gbenuyii, n wo gbmi n əfye əmi nu nyi. Ɓa ɓə gna fye aɓo vnyanya n ɓa zhni lo ń ya.

10Əmi zhaluda ədo Arisitakwus, wo tnu fye lo n əwo gnaɓyii, ɓədo n Marukwusii ce, Banaba zhalu. (Fye ɓə la agbega gwo ntu n əwo ɓo; n wa ɓe əfye aba, fye gwo wo). 11Yeisu, ń a yi wo nge Justus nyi, əwohni ce tnu fye lo n gnaɓyii. Ayahudiyi nu ɓwasnu nyi, n ɓa zhni əmi atnutnu kwnuzhniyi ntu Shekwoyi əbemi ɓo, jesnu ɓa kwu əɓahni wu nge əmi atnazhniyi nu. 12Epafras, n wo gbmi n əfye aba nu nyi jesnu Kirisiti Yeisu tnutnuyi, wo tnu fye gnaɓyi lo. Wo fyiabwa lo ciici dna n aduwazhni ntu n fye ɓo, nabai fya kwu gnyiagnyi zhi n kalái dna n Shekwoyi ɓəmwi vnyanya, njesnu n akpii-kwokwoi n nunui n agwumyi. 13Mi gbmi əwo əɓo lo nge wo zhni tnutnu lo n kalái ntu fye ɓo, njesnu ntu n aza yi ɓo n Lawudisiya, ɓədo n Hirapwolisii. 14Əyi nugwnudo yeyeyi Luka, likita, ɓədo n Dimasii ɓa ɓyi fye gna lo. 15Fye kwu əmi gnaɓyi ga əmi azaje azanugbai n anyikwozai n ɓa fyi n Lawudisiya nyi, njesnu ga Nimfa, ɓədo n Ikilisiyai n kwo dna n əwo pwuwa nyi.

16Shi a ɓə la paka ye ba ga fye, fye ɓə gye ge a la kwo ba ga Ikilisiya Alawudisiyi nya ce, əfyehni ce fya ba paka n kwo gbmi ń Lawudisiya nyi.

17Fye gna Akipwus, “La əwyewna nabai ha kwu tnutnu zozhni n ho la gwo dna n Dagayi nyi.” 18Əmi Bwulus nu na ka gnaɓyi ye n əmihni aɓwai. Fye pa əmi agbma ɓo. Shebmyashi ɓa kwnusnu n fyei.