Atnutnu 1

A la Yeisu la lo ncei n əshemi

1O Tiyofyilus, dna n əmi pafyi n mi ɓə shnika ga ho nyi, mi ɓə kwu aɓo kafyi vnyanya n Yeisu ɓə ya zhni jesnu n əwo nyawui 2nya əwyi n a ɓə la wo lo ncei n əshemi, she wo ɓəə kwu aɓəgbega əwo atnutnuloyi n wo ɓəə la knyí dna n Zafnu Gyigyiyi nyi. 3N əwo azhnìgye avnu, wa kwu əwohni wu n əɓa aba jesnu wa wu ɓa aɓo n kwnuawye kwnukwnui n mwa bəgyé, nge wo ɓə n wyewyeyii. Wa kpeya da ɓa n du anyipyei shiinyi ya jesnu wa daɓo ntu Shekwoyi əbemi ɓo. 4Dna n əsa ho, woi ye tu woi kwnu nyagyigyi n ɓai, wa ga ɓa ɓəgbetu ye: “Fye to kwnuya n Urishelima m, ama fye kwu pmi ɓəgbeshi əmi Dada nyaga nya ń fye ɓə kwu wo mii da əkwo ɓo nyi. 5Ntuge Yohana ɓə zhni batizima n nuwnai nu, ama fyi n anyipyei fyewyi n ɓa ɓe nyi, a ɓə zhni fye batizima n Zafnu Gyigyiyii nu.”

6Nlonu ɓa kwu shegwnu wo zhi jesnu ɓa nya wo əɓo, “Dagayi, dna nsaiye nu, n ho ye ha je Israila əbegyi gwo ga kwo?”

7Wa gna ɓa, “Kwo to zhni əfye əɓo nu fya kpe asa əye kwo anyipyei n Dada ncei kpe, n əwo ikwoi m. 8Ama fye ɓə gwo kalá she Zafnu Gyigyiyi ɓə ɓe kpe n fye; jesnu fye ɓə kwu zè əmi Aɓəgbmiyi fyi n Urishelima, jesnu fyi n Yahudiya vnyanya n Samariyai, jesnu kwoi nya anyìcezhiba.”

9Shi wo ɓə kwu ɓəye da, a la wo gwnulo ncei n əɓa awye, jesnu ənyì kwa ɓwu wo n əɓa awyeba.

10Ɓai n awyei kpmiwu zhi byiwuu n əshebmana ɓai gye shi wo ɓə gnyi woi gwnulo, aza ngwnu-aba n aje abwuibwuii kpe ɓa kpmiyazhi n ma ɓa. 11Ɓa gna, “Əfye Agəliliyi, knyiyi nu zhni fyenyi gnyiagnyi zhi fyei shi əshebmana awye a? Yeisu ye, ń a la wo lá n fye aba, woi gwnulo əshemi nyi, wo ɓə jezeɓe n ɓwasnu nlai nu, shi fye gye woi gwnulo əshemi nyi.”

A la Matiyas knyi wa dna n Yahuda apitaɓwi

12Nlonu Atnutnuloyi ɓa jezezhi Urishelima ɓai kpma n əpekwulu, n a yi nge Zaitu əpe nyi; əzna n əza ɓa zna Sibyiwyi gbmanyi kwoi laka n əzhiyaakwo. 13She ɓa ɓə kwu si, ɓa gwnukpe n nyakwnusni nya aba n ɓa ɓə fyi nyi. Aza aye nu nyi n ɓa ɓə fyi n ɓo:

Byitusu, Yohana, Jemyis n Andurui;

Fyilibwus n Tomai,

Batolomyi n Matiyui;

Jemyis Alfyis nugwnu, Sima Ziloti, ɓədo n Yahudai Jemyis nugwnu.

14Əɓa vnyanya ɓai yezhi ciici fyi n abagbmanyi n aduwazhni, n kwnusnu n anyikwozai n Mariyamwui Yeisu əya, ɓədo n əwo amajei.

15Fyi n anyipyei yi, Byitusu wa laka dna n avyiyi atasni (okwu n ɓa ɓə nyi n bəgyé ngye tagyi-gbmanyi ncei kpe shiiba) 16wa gna, “Əmi azaje azanugbai n anyikwozai, ɓəshishi nu Nyakagyigyiyi kwa nu; n Zafnu Gyigyiyi ɓə da n saapa, dna n Dawuda əgbe ntu n Yahuda ɓo, n wo ɓə wú aza yi zokwo ń ɓa ɓə wna Yeisu nyi. 17A ɓə n woi ba dna n əyi okwu jesnu wo ɓə n əɓwai dna n əyi ɓəvyitnutnu.”

18(N gyiwyei n a ɓə gba wo ntu n əwo əkpízhni ɓo nyi, Yahuda wa si əknyi; n abaayi nu n wo ɓə kaya n tukwoi wu shnishni, əwo nayi kwa cepwo, jesnu əwo agbmi vnyanya ɓaa kwnuya zhi n əbmyi. 19Əzahozahoyi n Urishelima ɓə kwu ɓəye wo, ntulonu ɓa yi əknyi yi n əɓa əbyei nge Akeldama, n kwo nu gyi nge, Əknyi Ami nya.)

20Byitusu wa gna, “Ntuge a n kwoi kafyilo n pafyi Zabwura nya:

“ ‘Fa əwo pwuwa kwaa gnyi n zhni agwusa;

fa to əzaho wa dna n kwo m,’

jesnu,

“ ‘Fa əzado wa lodna n əwo əɓwi n gnabyetnutnu.’

21Ntucenu kwo zhni ɓəshishi nu a knyi zaknayi n wo ɓə kwnusnu n yii n əsai vnyanya n Dagayi Yeisu ɓə dna n əyi atasni nyi, 22ənya n kwo ɓə ya n Yohana batizimazhni kwoi lo əsa n a ɓə lá Yeisu n əyi aba gwnulo ncei n əshemi. Ntuge ɓəshishi nu zaknayi n aza ye waa zè ɓəgbmiyi n kwnusnu n yii, əwo kala la nya.”

23Ntulonu ɓa kwnu aza zhi ngwnu-aba: Yusufu n a ɓə yi wo nge Barsabas nyi (n a ɓə je wo yi nge Justus nyi) n Matiyasii. 24Nlonu ɓa zhniaduwa, “Dagayi, ho kpe zahozahoyi ədu əye lo. Wu yi əza n ho la knyí n aza ngwnu-aba ye 25wa la ɓəvyitnutnu ye, n Yahuda ɓə yashi, wa lo da aza n wo ɓə zhni əɓa nya nyi.” 26Nlonu ɓa she əba, jesnu əba kwa wna Matiyas nu; ntulonu aa wo ɓe n atnutnuloyi awocei-gbmanyi yi.