2 Timoti 2

A kwu aɓwatna njesnu

1Nlonu əho, əmi nugwnu, la kalá dna n shebmyashi n kwo dna n Kirisiti Yeisu nyi. 2Aɓo n ho kwu wo mii da gnyi n aɓəgbmiyi bəgyé aba, əkwo nu n ho ɓa ka aza kwo ɓwafnyi, aza n a ɓa myi a kpema ɓa, n ɓa ɓə myi ɓai wunya n azaje aba cè. 3Dnaɓwado n mii dna n azhnìgye, ngye okwnuyi manai Kirisiti Yeisu nya. 4Əzaho to lo n wo zhni okwnuyi n wo da əwohni dna n ajebwuida aɓəzhni m, ama wo zhni əɓo nu n kwo ɓa da əwo okwnuyi gbegayi. 5N ɓwajesnu nlonu, zahozahoyi n wa lodna n əgbegyi əsibwi nya, wo taa gwo fnunyi abyegyi nya m, akpəge wa shi əgbegyi aɓocekpe ɓwa. 6Fwanuyi wyenyiyi nu gwo wa kpmi ofwa nyagyi gyi. 7Zhni əɓonubwo tu n aɓo n mi da nyi, ntuge Dagayi nu ɓa ga ho awyega aɓo ye nya.

8Pa Yeisu Kirisiti ɓo, n a ɓə la wo kala n əfyi nyi, wo ɓə gbmi n Dawuda ofye nu. Dəye nu zhni əmi nabagyi manai, 9n əkwo nu zhni mii gyeazhnì n kwo zhni aa n mii fyiagbma ngye əvyì zokwoznui. Ama Shekwoyi ɓəda to fyi agbmà lo m. 10Ntucenu mi ɓwa bwugba n ɓəhoɓəhoi ntu aza aknyiknyii ɓo, nabai n əɓahni ce ɓa ɓwa gnyignyi n kwo dna n Kirisiti Yeisu nyi, n latu nyalonyalo nyai.

11Ɓəda ye kwnuce lo a shiɓwa:

Ngye yi ɓə kwu kwnufyi n woi,

yi ɓa kwnu anyìgyi n woi ce;

12n ya ɓwa əmìfyi,

yi ɓə kwnu əbegyi n woi ce.

N ya na wo aɓo,

wo ɓə na əyi aɓo ce;

13n yi zhni a tnagbənuyi nu,

əwooda zhni gbenuyi nu,

ntuge wo taa na əwohni aɓo m.

Okwnusnu n anyawuyi akatayii

14Gwodu hoi pá Shekwoyi aza aɓo ye. Gnaknyi ɓa n Shekwoyi abye ntu anyàwu aɓədagbma nya ɓo; ɓa to n apmai lo m, ɓa wnu aza yi nu ya n ɓa wo nyi. 15La əhohni yi ha wu əhohni n Shekwoyi aba ngye əza n wo la wo gwo, tnutnuyi n vnyinkwo taa wo əwo m, n wo shi ɓədagbma gaiciyanunui nya ɓwa cewo. 16Bwi aɓəda anukwoi əsi, ntuge aza yi n ɓa fyi aɓəi pya aɓwa ɓa zhni ɓa gna Shekwoyi ɓəda nana nu ɓai kwnu n ofye. 17Əɓa nyawu ɓə gnamyi ngye aɓyinyasna nu. Himyinos n Fyiletusii fyilo 18n aza yi n ɓa la kwnuya n gaiciyanunui. Ɓa gna lo nge əfyikalakwu kwo la lu duya, njesnu ɓa zhni azaho gaiciyaga agbma lo. 19Dudulonu Shekwoyi shnipa kaladnai myignyi lo, n kwo n atuzèi yei kakpe lo: “Dagayi kpe aza yi əye lo n ɓa zhni əwo anya,” njesnu “Zahozahoyi n wo n Dagayi əyei tu lo, ɓəshishi nu wa fa əkpízhni ɓo.”

20N pwuwa yaakwo, ashakwnu zinali nya nu to ɓwa fyilo n azulufa nyai m, ama ashnuwna nya ce n ownu nyai njesnu adəho ntu apma knyiknyii ɓo, adəho ntu apma asukwui ɓo. 21Əza n wa zhna əwohni ya n aɓo asukwuii, wo ɓaa zè tnutnuyi ntu aɓo adnagbmai ɓo, waa zhni gyigyiyi, n apmai n Dagayi aba njesnu n əwohnii yeyei wa zhni ɓəmanai dəhodəhoi.

22Bwi ɓəpwawo nukwoi əɓyikasa nya əsi njesnu ha zna ɓəfyecezhni shni, gaiciyaga, yeye wu n bwugbafui n kwnusnu n aza yii n ɓa yi Dagayi əye dna n ədu tnadodnai. 23To fyi amama aɓəna aɓwa n atnatukwogyii nya m, ntuge ho kpəlo nge ɓa ɓe n anyàwui nu. 24Ɓəshishi nu Dagayi tnutnuyi taa zhni nyawunyawuyi m, ama ɓəmanaizhniyi ga zahozahoyi, n wo myi woi wu aza ənya, toge bwugba nukwoida m. 25Ɓəshishi nu wa wu əwo anuwnuyi ənya pəceye, n awyetui nge Shekwoyi ɓa zhni ɓa yeabwi kwa lo n ɓai n gaiciyanunui yekpé, 26njesnu dəye ɓa zhni ɓa ɓa kpé əɓahni əye jesnu ɓa kwnuya n Shetam agbúlu, n wo kwu ɓa wnafyi nabai ɓa zhni əwo ɓəye nyi.