2 Akworentiyi 10

Bwulus aɓəmaɓəgbedna ntu əwo ɓəvyitnutnu ɓo

1Ntu Kirisiti tukwogba n tukwownashii, mi tna fye aɓwa, əmi, Bwulus, n mi zhni “vnyinkwoda” nu, əsa n mi gnyi n fye awyeba ncei, ama mi wu fye “agwumyi” əsa n mi to gnyilo əfye aba m! 2Mi ɓa fye, əsa n mi ɓə ɓe ncei, mi to ɓə wu fye agwumyi shi mi ncei pma ma wu azaho n ɓa zhninubwo nge yi gyianyì yi vyi akwnunu anyì ye nya nu m. 3Kwo shikwonyi yi gyianyì fyilo n anyì nu, yi ta snu okwnu shi anyìda snu nu m. 4Akwnuakaya n yi snu okwnu ncei nyi, ɓa to zhni akwnusnu akaya anyì ye nya nu m. Nkwoɓwi ɓa n kalá zafnu aba vyiya nyai lo, ɓa vyì abakalada ya. 5Yi vyì aɓəna ya n kwocedna dəhodəhoi n kwo la əkwohni tu kwoi gnyiapaapa n ɓəyekpe Shekwoyi nyai, jesnu yi wna ɓənubwozhni dəhodəhoi nabai kwa zè ɓəvyii ga Kirisiti. 6Njesnu yi ɓa kwu zhi n əyihnii yeyei ya ga tnaɓəvyiyi tnutnu dəhodəhoi tata, əsa n əho ɓədaɓəvyi kwa nu ncei.

7Fye da owa lo shi fye gye n awyeba nu. Ngye əzaho n agwui myignyi lo nge wo zhni Kirisiti nya nu, ɓa kwu kpe jesnu nge əyihni ce yi zhni Kirisiti anya nu n ɓwasnu shi ɓa zhni nyi. 8Ntuge kwo mii ɓə ɓa gyigbe, ntu ikwo ɓo n Dagayi ɓə ga yi ntu əfye mimi ɓo nyi, toge ntu əfye lalaya ɓo m, mi taa wo kwó vnyinkwo m. 9Mi to ncei pmalo kwa wu ngye mi gnyi mii ye ma fyi fye ədna n əmi apakai m. 10Ntuge azaho gna lo nge, “Əwo apaka woshna lo n akalái, ama əwo n wohni, wo to kwnuawye lo jesnu əwo ɓəda to zhni nyaho nu m.” 11Aza yi pya ɓa kwu kpəge, aza pya n yi zhni fyi n əyi apaka, əsa n yi to zhi n əyihni awyei nyi m, yi ɓa ɓwa aɓo zhni nlonu, əsa n yi zhi n əyihni awyei.

12Yi ta gnyiapaapa n əyihni, kwo ya mwi əyihni do n azajei n ɓa ci əɓahni m. Əsa n ɓa mwi əɓahni do əɓahniɓahni, ɓa gnyiapaapa əɓahniɓahnii, ɓa to cecei lo m. 13Dudulonu, yi ta gyigbe n du əgna tutui ya m, ama yi ɓa kwu əyi gbegyi ɓwa tu fyi n Shekwoyi tnutnu əgna nu, n wa fyi yi n kwo n əwohnii nyi, əgna n fye fyilo ce n əkwo nyi. 14Yi ta lolo n kpaai n gnasnusnu n əyi əgbegyi m, ngye shi kwo ɓə ɓaa zè, n yi to ɓə gna ya kwu ɓe əfye aba m, ntuge yi ɓə kwu si n kpaai, nya əfye aba n nabagyi manai Kirisiti nyai. 15Yihni ta gyigbe n du əyi əgna ya, n tnutnu n əyi azaje kwu zhni nyi m. Əyi awyetu nu nge, shi əfye gaiciyaganunui lo kwoi mwa, əyi tnutnu n fye atasni ɓa lapata n mwa, 16nabai ya da anabagyi manai n asəpa aje n ɓa tayazhi lo n fyei. Ntuge yi to ncei pmalo, ya gyigbe n tnutnu ɓo n a kwu luzhni n əzado əknyi m. 17Ama, “Fa əza n wo ɓa gyigbe, wo gyigbe dna n Dagayi.” 18Ntuge əza nu to n wo ci əwohni, n a gwo əwo tnutnu m, ama əza n Dagayi nuu ci wo.