2 Akworentiyi 1

1Bwulus, tnutnuloyi Kirisiti Yeisu nya dna n Shekwoyi ɓəye, n Timotii əyido.

Kwo lo da Ikilisiya Shekwoyi nya nu dna n Kworenti əknyi, n əwo aza agyigyiyii fyi n Akaiya əknyi vnyanya.

2Shebmyashi n bwugbafui ɓa ɓe da fye, n ɓa kwnu n Shekwoyi əyi Dada aba ɓədo n Dagayi Yeisu Kirisitii.

Cici ga Shekwoyi atnazhniyi vnyanya

3Cici ga Shekwoyi ɓədo n Dada əyi Dagayi Yeisu Kirisiti nyai, Dada snusnugye nya ɓədo n Shekwoyi atnazhniyii vnyanya, 4n əwo nu zhni yi atna fyi n əyi azhnìgye vnyanya, nabai n yi ɓa myi ya zhni aza yi atna n ɓa fyilo n azhnìgye dəhodəhoi n bwugbafui, n əyihni yi la gwo n Shekwoyi nyi. 5N ɓwasnu, shi yi n əɓwai dnadolo n Yeisu azhnìgyei n mwa nyi, ntulonu cè, əyi bwugbafu kwo kwu mwaɓe dna n Kirisiti. 6Ngye yi fyilo n snuwna, kwo nyi ntu əfye bwugbafu ɓo nu n gnyignyii; ngye yi ɓwa bwugbafu lo, kwo nyi ntu əfye bwugbafu ɓo nu, n kwo ɓe fye n atnazhnii, fyi n bwugbaɓwa pya n yi gye nyi. 7Njesnu əyi awyetu ntu əfye ɓo n myimyiilo, ntuge yi kpəlo nge n ɓwasnu shi fye kwnu azhnìgye lo n yii nyi, nlonu cè, n fye kwnu bwugbafu ɓwa lo n yii.

8Əyi azaje azanugbai n anyikwozai, yi to ncei pmalo fya kwu zhi n tnaɓəyekpé ntu n azhnìgye ɓo n yi ɓə gye fyi n Asiya əknyi nyi m. A ɓə la yi yepma n duwyi, n du shi yi ɓa myi ya ɓwa əmì, kwaa si, to yii ye kpé nge yi ɓə ye pwo m. 9Ɓəhnihni, yi ɓə gye ngye yi kwu si əyi əfyi sa nuu. Ama dəye ɓə zhni nabai to ya kpmima n əyihni nu m, ama n Shekwoyi n wo kwú azafyí kala nyi. 10Wo la yi gnyi n azhnìgye əfyi nya, jesnu wo ɓə ye gnyi yi. Yi n awyetui lo n wo nu, nge wo ɓə ye gwodu wa gnyi yi, 11ngye shi fye bma yi zhni fyi n əfye aduwazhni nyi. Nsayi bəgyé ɓəə ga amisa n əyi apitaɓwi ntu shebmyashi bmyashi nya ɓo, n a la ga yi ntu n ɓəgbedna aza bəgyé aduwazhni ɓo.

Bwulus ɓəmwushi doshna

12Nsaiye əyi gbegyi nu nyi: Əyi tukwovnyi gbmi yi əɓo lo nge yi kwu əznaznà fyi n anyì n gyigyii jesnu n Shekwoyi dnawoi cewo, n gnasnusnu ń əyi tagyiaje n fyei n ɓəfyecezhnii jesnu n ɓəhnihni nyai. Yi kwu dəye zhni, toge n kpema n anyì wyemwa m, ama ń Shekwoyi shebmyashi. 13Ntuge yi ta ka nyaho nu ga fye n fye taa myi n əkwo ba kwo nge fya ɓwa əkwo awyega m. Njesnu mi n awyetui lo nge, 14ngye she fye kwu yi kpeye cewyi nyi, fye ɓə ɓe fya kpe əyi əye n nunui, n fye ɓə myi fya gyigbe n yii, n ɓwasnu shi yi ɓə gyigbe n fyei ń Dagayi Yeisu nyipyei nyi.

15Ntuge mi ɓə n bwugbai myimyii n ɓəye, mi ɓə ncei pma maa ɓe fye gnaɓyi nu kpa, nabai n fye ɓa ɓwa gyiba aɓwa aba. 16Mi ɓə ncei pma maa fye ɓyigna mii lo Makidoninya nu, jesnu mii gbmi n Makidoninya ma zhi da fye nabai fyei kpe mi amigna, mii lo Yahudiya. 17Mi ɓə gbakalá nu, she mi ɓə ye ma zhni ɓəye? Kwo mi ɓə n aɓoi mwuzhi n anyì zokwo nya nu a, nabai n ɓədagbmai gbmanyi ma gna, “Əə n əəi” jesnu “aawo n aawoi a”?

18Ama ɓəhnihnii shi Shekwoyi zhni gaiciyazhninunui nu nyi, əyi waazi ga fye, kwo to zhni, “Əə” nu n “Aawoi” m. 19Ntuge Shekwoyi Nugwnu, Yeisu Kirisiti, n yi ɓə zhni əwo waazi dna n əfye atasni nyi; əmi n Silai n Timotii, kwo to ɓə zhni “Əə” nya nu n “Aawoi” m, ama dna n wo, kwo zhni “Əə” nu ciici. 20Ntuge, kwo kwoi n aɓəgbeshii ngwnu aknyii nu, n Shekwoyi wo kwu zhni, ɓa zhni, “Əə” nu dna n Kirisiti. Njesnu dna n əwo nu n yi ye, “Aamyi.” Kwa ɓe n latui n Shekwoyi aba. 21Nsayi Shekwoyi nu zhni, əyi n kwnusnu n əfyei ɓədo, yii myizhi dna n Kirisiti. Wo ɓə la yi pmya, 22waa əwo tuzè tu ń yi, nge yi zhni əwo anya nu, nlonu waa əwo Zafnu dna n əyi adu n zhni ətasaya, kwoí wnaɓoshi n kwo ɓe lo nyi.

23Mi yi Shekwoyi n zhni əmi ɓəgbmiyi; jesnu mi n əmi wyewyeyi ga lo n kwo; ntuge mi ɓə ye ma ce fye aɓo saya nu, cenu ɓə zhni to ma jezeɓe Kworenti m. 24Kwo to lo nge yi la kwo yefyi fye nu ń əfye gaiciyaganunui m, ama yi zhni tnutnu n fyei, nabai fya ɓwa agbmada nu, ntuge dna n gaiciyaganunui nu n fye kwu myizhi.