1 Byitusu 3

1Anyikwo, n ɓwasnu n zokwo ye, fye kwu əfyehni ga fyi n əfyehni anu akwnu, nabai n əzaho n ɓa n wo taa kna gaiciya ɓədagbma tnubwa lo m, n a ɓa myi a gnyi wo ɓe ncei n tna aɓədagbma dai, ama ntu əwo anyikwo alu ɓo, 2she wo gye əfye anyìgyi tnadodnai nya ɓədo n mwamwagai. 3A to gye əfye bmyabmya ntu nyigwnu zhni əbmyi nya ɓo nu, ngye tukwoyi abazhni n duwyi ɓədo n azinali akayai kwo aje ayeda m.

4N əkwoɓwi, kwo la zè ədo nu n kwo dna n əho mi, bmyabmya n kwo ta toya m, əhohni wnashi nya ɓədo n zafnu pəceye nyai, n kwo n apma yaakwoi lo n Shekwoyi aba nyi. 5Ntuge zokwo nu nyi n anyikwo agyigyiyi n sapa, n ɓa ɓə n awyei tu n Shekwoyi nyi, ɓə zhni ɓai zhni əɓahni nyigwnu. Ɓa ɓə kwu aɓwa yafyi n əɓahni anu akwnu, 6ngye Saratu, n wo ɓə ga Ibrahim mwamwa woi yi wo nge Dagayi nyi. Fye zhni əwo anyigwnu nu n fya zhni əɓo n kwo bmya njesnu to fya ga ədna aba m.

7Anu, n ɓwasnu n zokwo ye, fye sase n əfye anyikwoi fyi n gənyikpe, fyei zhni əɓo n kwo gwo fya zhni ga ɓa. Fye ga ɓa mwamwa ngye əfye azabayi akalágbai njesnu ngye aza n ɓa kwnu nyaga shebmyashi wyewyeyi nya gwo, nabai n nyaho taa kpma fye aduwazhni wo m.

Azhnìgye ntu ɓəmanaizhni ɓo

8N kpmasnu, əfye vnyanya, fye kwu zhi n bwugbai gbmanyi, fye kwu zhni asnusnugyeyi. Fye ye n ajei, fye ɓwa bwugba n ajei, njesnu na atukwoi gbàgbài. 9Fye to gba ɓənukwoi əta n ɓənukwoi m, kwo akpmi n akpmii m. N əkwoɓwi, gba ɓənukwoi əta n anabəlikai nu, ntuge n dəye ɓo nu, n a ɓə yi fye nabai fya gyi əgwú anabəlika nya. 10Ntuge,

“Zahozahoyi n wo ɓa ye wyewyeyi

njesnu woi gye anyipyei amanai,

ɓəshishinu waa əwo nyitala wnashi n ɓənukwoi

njesnu əwo əgbe n ɓəda wyidna nya.

11Ɓəshishinu wa pmyiya n ɓənukwoi njesnu wa zhni ɓəmanai;

ɓəshishinu wa zna bwugbafu shni njesnu wa vyi kwo əɓo.

12Ntuge Dagayi awye wulo n ɓəfyeceyi ɓwa nu

njesnu əwo atnubwa gwuya lo ga əwo aduwazhni,

ama Dagayi awye gnyiapaapa lo n aza yii n ɓa zhni aɓənukwoi.”

13Nyika nu ɓa zhni ho əkpí, hoi n əwyenyii lo ha zhni ɓəmanai a? 14Ama kwo n ho ɓa gyeazhnì nu ntu ɓəfyecezhni ɓo, ho n anabəlikai lo. “Fye to wo əɓa ədna m; fye to vnyivnyi m.” 15Ama fyi n əfye abwugba, fye ga Kirisiti mwamwa ngye Dagayi. Fye kwu zhi ciici n fyehnii yeyeyi, fya dna zahozahoyi ɓəgbe n wo nya əfye ɓətukwo əfye awyetu nya. Ama fye zhni dəye pəceye n mwamwagai, 16fye la əfye tukwovnyi shi ntnaɓətu, nabai aza n ɓa da ɓəshinmì aɓədada ntu n əfye alu manai ɓo dna n Kirisiti, n vnyinkwo ɓa wo ɓa ntu n əɓa aza aye wnuya ɓo. 17Ntuge kwo gnabmya lo, ngye kwo zhni Shekwoyi ɓəye nu, əza wa gyeazhnì ntu n əɓo manai zhni ɓo, a fa ntu n ɓənukwoizhni ɓo. 18Ntuge Kirisiti ɓə kwu azhnìgye ce znugbmanyi ntu n aleifyi ɓo, ɓəfyeceyi ntu atna-aɓəfyeceyi ɓo, wa ɓe n fyei n Shekwoyi aba. A ɓə la wo wu dna n nayi, ama aa wyewyeyi ga wo dna n Zafnu. 19Shi a ɓə la wyewyeyi ga wo, wa lo wa dnawyi ga azafnu gwugwuyi fyi n zhalu, 20ga aza yi n ɓa ɓə znu ɓəgbetu gna aye bəgyé n ɓa la duya nyi, əsa n Shekwoyi ɓə pmi n bwugbaɓwai dna n Nuhu anyipyei, əsa n a ɓə mi əya nuwnanya nyi. Aza ɓə ɓwa fyi fyewyi nu n kwo, aza nyimwanyimwa nu vnyanya, n ɓa ɓə pwo n nuwna yi. 21Njesnu nuwna ye zhni əznù nu batizima nya, n əkwo nu gnyi fye nsaiye ce nyi; toge cegye kpmaya nayi nya m, ama ɓəshishi tukwovnyi tnaɓətui nya n Shekwoyi aba. Əkwo nu gnyi fye dna n Yeisu Kirisiti kalala, 22n wo la lodna n əshemi njesnu wo gnyilo n Shekwoyi ɓwaizheɓwa; n kwnusnu n amaləkai, n aikwoi ɓədo n akalái n əɓahni ga fyi n əwo akwnu.