1 Akworentiyi 3

Ikilisiya n əkwo atukwodai

1Əmi azaje, mi to ɓə daɓo n fyei ngye aza nu n ɓa gyianyì fyilo n Zafnu m, ama ngye anyìda nu; aɓyipwutu azanga fyi n Kirisiti. 2Mi ɓə ga fye ɓeɓegbma nu toge nyagyi kpokəloi m, ntuge fye to ɓəə si aba n fye ɓa gyi nyagyi kpokəloi m. Ɓəhnihni, kwo nsaiye, fye too du fye ye əfyehni m. 3Fye du fye yee zhni anyìda nu. Ntuge shi shewo n anyàwui ye fyilo n əfye atasni nyi, fye to zhni anyìda nu m? Fye ta ɓwa aɓo zhni lo ngye azanyikwoci nu m? 4Ntuge əsa n zaknayi n fye, wo gna lo, “Mi vyi Bwulus nu,” əzado ce, “Mi vyi Apwolos nu,” kwo ta wulo ge fye yee ɓwa azanyikwoci azanga nu zhni m?

5To, Apwolos zhni knyiyi nu a? Njesnu Bwulus zhni knyiyi nu a? Ɓa ɓwa atnutnuyi nu zhni, n fye ɓə ga gaiciya n əɓa akwnu; ngye shi Dagayi n tnutnui ga zahozahoyi. 6Əmi nu ɓə bye nyabye, Apwolos wa kpe kwo nuwna, ama Shekwoyi nu zhni kwo kwoi mwa. 7Ntulonu, əza n wo ɓə bye kwo nyi, kwo əza n wo ɓə kpe kwo nuwna nyi, əwo nu to zhni nyaho m, ama Shekwoyi nu ɓwasnu n wo zhni anya ɓai mwa nyi. 8Əza n wo bye nyi, n əzai n wo kpe nuwna nyi, ɓa n ɓəmwi gbmanyi nu, zahozahoyi ɓə gwo əwo gyiba shi əwo tnutnu n lo nu. 9Ntuge yi zhni Shekwoyi atnutnu kwnuzhniyi nu; əfye nu zhni Shekwoyi ofwa, Shekwoyi anyamimii.

10Dna n shebmyashi n Shekwoyi wo la ga mi nyi, əmi nu ɓə shi shnipa ngye nyakwnumiyi əgbáda, əzado gbowo nu gnyi woi mi kwo. Ama zahozahoyi wo zhni pəceye shi wo mi kwo n wu. 11Ntuge əzaho taa shna shnipa nyakwnumi nya shi gbowo n ədoi ń a la lu shi nyi m, əkwo nu zhni Yeisu Kirisiti. 12Ndei əzaho wo mi ənya tu lo n shnipa ye, woi zhni apma n zinalii, azulufa, akwuta anakwoi, ashnuwna, agbegbe kawu kwo n akpayii, 13əɓa tnutnu ɓə wu ədo pya n kwo nyi, ntuge Nyipyei yi, ɓə gbmi kwo ɓe ncei, azai gyewye vnyanya. A ɓə la kwo kpeyawu n ənái, nlonu əná ɓə la zahozahoyi tnutnu bmyabmya mwugye. 14Ngye ənya n a lá mi nyi, n kwaa pwo, nyamiyi ɓə gwo gyiba. 15N kwa kwu gyina, nyamiyi ɓə lá ɓwunuwna, ama dudulonu əwohni ɓə lá pwo; kwo shikwonyi kwo ɓə ɓwasnu ngye əza nu n wa pwo n əná-anyitala.

16Fye ta kpəlo nge əfye n əfyehni, fye zhni Shekwoyi Dagayipwuwa nu jesnu nge Shekwoyi Zafnu dnalo n fye m? 17Zahozahoyi n wa wnu Dagayipwuwa ya, Shekwoyi ɓə wnu əwohni ya; ntuge Dagayipwuwa zhni gyigyiyi nu, jesnu əfye nu zhni Dagayipwuwa yi.

18Fye to dna əfyehni kwoce m. Ndei əzaho n əfye zhninubwo lo nge wo cecei lo, woi mwi wohni n cece cala ye nyai, wo la wohni zè “mama” nabai wa zè əza cecei. 19Ntuge anyì ye wyemwa zhni amama ɓo nu n Shekwoyi awyeba. Ngye shi kwo kafyilo: “Wo zhni wa wna aza cece fyi n əɓa awyebwi nu” 20jesnu, “Dagayi kpəlo nge aɓonubwozhni əza cecei nya zhni atnatukwogyii nu.” 21Ntulonu nsaiye, gbegyi to ye lo ntu n azanyikwoci atukwoda ɓo m! Anya vnyanya zhni əfye anya nu, 22kwo Bwulus kwo Apwolos kwo Kefas kwo anyì kwo wyewyeyi kwo əfyi kwo nsaiye kwo əsa n kwo ye ɓeɓelo nyi; əɓa vnyanya zhni əfye anya nu, 23jesnu əfye, fye zhni Kirisiti nya nu, n kasnu Kirisiti zhni Shekwoyi nya nu.