ፍልጵስዮስ

ኦይትምስባብ ጳውሎስታ ክታ

ፍልጵስዮስ ኤድንከስካንታ

አርድንታ

ጳውሎስ ኮም ክቴን ክት ጻፍሳንዳ፥ መቄዶና ጋይምድን ፍጨና ሮማ ፍጨንታ ባንችና ቆልድንደታ ጎያር ዶቅድንዳ ፍልጵስዮስ ካተመናር ዶቅድን ምክስ ኤሄንካንቴ፥ ናኮና ምክስ ኤሄና፥ ጳውሎስ አዉሮፓ ፍጨናር እርምሶ ክት ዎይስሳንዴ፥ ክቴና ጻፍምሳንዳ ጳዉሎስ ዞክና ኤሄናር ክት Ꮊቃንደትካ፥ ክርስቶሳር ማችባብ ፍክስንባብ አብንከዘንካ ግርንተና ክታዘን የልሳንደትᎺይኬ ፍልጵስዮስ ምክስ ኤሄናር አምሳን ካርካ ኤስስንጎካ ቡደና ክታ ሞርእሳንደትᎺይኬ። ማታጋካ ዳት ጳውሎስ የሱስ ክርስቶስዘን ክታ ዶቅድንዳ አሜንና አንድር ዳቅማ ማቻንካንታ ኮትኮ ክቴናር ዳልክስሶ ሰድምድንደና ጉርምኬ ቦድማ ክታ አሜንምኔ።

ጳውሎስ ኮም ክቴን እሪናና ክት ጻፍሳንደና ክታ ማጠንᎺይካ ክትም አላካንታ ቡዳርንካ እመንም ኬት ኦይቻንካንታ ፍልጵስዮስ ካተመናር አሜንድባብከስም አንጃካንቴ፥ ክታዘነረ ማታ ከታዘን Ꮊክ Ꮊክ ማጠንከስ የልሳንዳ ማችንከረ ሙቅምኬ ቦድማ አሜንም ከትካንታ ዶቅተርንግንዳ ኮትኮ ክተንካ ከትም ኖ ዳቅዝዴ። ኦትረንምኬ ጬቅንም ዎይስሰኮ የሱስ ክርስቶሳር ከታ ይንታ ማተንም ይርክሳ ይተርንግንዳ ዳቅስሶ ከትካንታ ገቀርስዝዴ፥ የሱስ ክርስቶሰካ ክክን አያናር ዋልቃ ማትንተካ ኬት Ꮊፍሳን ዶቅንተና ሳብታ ዉች እምንተንዘንካ Ꮊፈርሳንደትኬ አሜንካ ኬት ተያንዳ ዳት ህግንም ቦድንተካ Ꮊፈርሳንዳ ካዬ ጋይንተካ ከትም ገቀርስዝዴ፥ የሱስ ክርስቶሰካ ክክን ዋልቃትቼካ ዶቅድባብ ሙደንካንታ ሳብ ከትካንታ እምድን ሳራትችንጎኬ ጉርምንጎከረ ከትካንታ ኖ ጻፍሴ።

ኮና ክተና ኤስምድንደና፥ ጉርምን፥ አሜንምን፥ ዋልቃትቼንምኬ ክርስቶሳር ማትን፥ ዶቅንተንምኬ ዳቅንተን ዳልክስሶ ሰችዝድንካንቴ፥ ጉጅሰረ ኦይትምስባብ ጳውሎስ ፍልጵስዮስ ካተመናር ምክስ ኤሄንካንታ ዶቅድን ይንታ አንድር ሶልመንም መያ ማዝዴ።

ማጻፍን ኮትኮታ ሙዳ የድንተና

አርድንታ

ጳውሎስ ስክሳን ማጠንከስጎካ

ክርስቶሳር ማትሶ ዶቅንተታ ካምስ

ጢማቶስካንተኬ ኤጳፍሮድቱስካንታ ገቅርና

አሜንን ግርድባብከዘንካ Ꮊዳን ኤግዝምስ

ጳውሎስ ፍልጵስዮስ ካተመናር ክርስቶሳር ማችባብከስካንታ ክት እምሳን ጎፍስኬ ዞረካ

በእንታ