1 ተስሎንቄ 3

1ኮካንታ ይና ኮዘንካ ዳንዳእክሳ ዎንታ ነግንተንካ አቴና ካተመናር ዎንት ዎንታ ነግንተና ኡርመም ካምሶ ዎካንታ Ꮊፈርሴ።1 2ዎንታ እስመንኬ ሳብታ ፍግዝድባብ፥ ክርስቶሰታ ክላ ኬዘን ኤስምስካ ዎንታ ፍክስንታ ላኮይት ማችባብ ጢማቶሰም የካንታ ኦይቶቴ፥ የካንታ ክትም ዎ ኦይቻንደረ የም ዛብዝድንግንደኬ አሜንካ የ ዳቅድንግንዳ የም ዞርድንግንዴ፥ 3ኮነረ የንዘን የልሳን ማጠንካ የ ጭጭዳክንግንዳ የም ይዴ፥ ኮና ማጠና ዎካንታ ጋይምሳንዳ እጫ ማቻንደትም የታ የንታ ማታርንካ ኤዝደቴ። 4ኮትኮግንደረ የንካ ክክን ዎ Ꮊቃንደትካ ማጣ ዎንዘን የልድንደትም እሪምሶቶ የካንታ ኬዝድ Ꮊቆቴ፥ የ ኤዝድንግንደረ ማጠና ዎም የልቴ፥ 5ኮጎካ ይና ኮዘንካ ኦስ ዳንዳእካ ካርስካንታ እ ማታክንካንታ የንታ አሜንንጎካ ኤስካንታ ዝግስቶ ጢማቶሰም የንደር ኦይቻቴ፥ ክትም እ ኦይቻንደረ Ꮊረንግርካ ጰጨንባብ ዋልቃጎግካ የም ጰጭቶ Ꮊረንዳት ጋይንተኬ፥ ዎንታ ፍክስነረ ዉችኩን ማትሶ ነግቴ ጋይስቶ ጳስኬ።

6ታ ማቼ ጢማቶስ የንደርንካ ዎንደረ Ꮊድሶ የንታ አሜንካንተኬ የንታ ሶልመንካንታ ጉርምዝድን ኬዘንም ዎካንታ ኬዜ፥ ኮትኮግንደረ የታ ሙዳᎺይካ ኡርመካ ዎም የ ገቀርድንደትምኬ ዎታ የም ሰድንካንታ ዎ ሱነርድንደትከካ የተረ ዎም ሰድንካንታ የ ሱነርድንደትም ዎም ኬዜ።2 7ኮካንታ እስመንከስኬ ምችነንከሶ፥ ዎ ዶቅድንዳ ዘረተኬ ማጠታ ዋሪ ዎ ማችንከረ ዎራ የንታ አሜንንጎካ የንካ ዳቅቶቴ። 8የንታ ጮይስ የሱሳር ዛብሶ ዶቅና ዎካንተረ ዶቅንቴ። 9ይና ታ የካንታ ሳብም ጋለዶቴ፥ የጎከረ ሳብታ እሪ ዎንታ ዶቅድን ጉርምንታ ክቲም ጋለዶቴ። 10ሶይትከ Ꮊየካ ዳቅሶ ዎ ምግዝድንዳ ዎንታ አፍይካ የም ዎ ሰተርንግንዳ የንታ አሜንንታ ዞግርን ጮችካንታ ዎ ማተርንግንዴ።

11ታየረ ዎንታ ጮይስንኬ ዎንታባቤና ኖይንታ ማታርንካ ዎንታ ጮይስ የሱሰረ የንደር ዎ Ꮊድንግንዳ ዎንታ ጎግንም ክት ሉልሳ። 12ዎታ የም ዎ ሶልምድንግንዳ ክክ ክክኬ አብንከስካንተረ ሙዳ የንታ ዶቅድን ሶልመና ጋጵድንግንደኬ በድንግንዳ ጮይስ የካንታ ማሳ። 13ኮግንደካ ዎንታ ጮይስ የሱስ ጭልንባብከስ ሙደንካ ክክን ክት ᎺድንᎺይካ ዎንታ ጮይስንተኬ ዎንታ ባቤንታ እሪ የንታ ቡደና ይንኤርዝድ ሪ ካየንደትኬ ሳብካንታ ፋስምሳንዳ ማተርንግንዳ የም ዛብዝዴ።