Gata Didayi Bible
ନିହିମିଆ 8
ଏଜ୍ରା ନିଅମ୍ ପଡ଼େନେ
ବାରି, ସାପାରେମୁଆ ମୁଇଂ ମନ୍ ଡିଂଚେ ଣ୍ଡିଆନେ ର୍ଣ୍ଣସାଙ୍ଗ୍ନେ ସାମ୍ନେ ଲେକ୍ନେ ଚକ୍ ଡାଗ୍ରା ରିସିଂଆର୍କେ । ମାପ୍ରୁ ଇସ୍ରାଏଲ୍କେ ମୋଶାନେ ଆଣ୍ଡିନେ ନିଅମ୍ ବଇକେ ଆଦେସ୍ ବିଃବଗେ, ଆତେନ୍ ରାଙ୍ଗ୍ପାଂନେସା ମେଇଂ ଏଜ୍ରା ଗ୍ରକେ ବାସଙ୍ଗ୍କେ । ତେଲା ଗୁ ଆର୍କେନେ ପର୍ତୁମ୍ ଦିନା କାଲା, ଏଜ୍ରା ପୁଜାରି ଙ୍ଗିରେ ବାରି ସେଲାମ୍ବୁଏଃଇଂ ଉଃଡ଼ି ରେମୁଆଁ ଅଁଚେ ବୁଜେଆର୍ଏ, ଆତେନ୍ ସାପା ସମାଜ୍ ସାମ୍ନାନିଆ ଆତେନ୍ ନିଅମ୍ ବଇ ରାଙ୍ଗ୍ପାଂକେ । ତେଲା ମେଁ ଣ୍ଡିଆ ର୍ଣ୍ଣସାଙ୍ଗ୍ ମ୍ନିକ୍ନେ ଗାଲି ସେଃମଁ ଲେକ୍ନେ ଚକ୍ନିଆ, ଙ୍ଗିରେ ବାରି ସେଲାମ୍ବୁଏଃ ସାପା ଉଡ଼ିରୁଆ ବୁଜେଆର୍ଏ, ଆତାନ୍ ସାପାରେନେ ସାମ୍ନାନିଆ ଞ୍ଜିର୍ବାନ୍ ମୁଣ୍ଡେବେଲା ଜାକ ଆତେନ୍ ବଇକେ ପଡ଼େ ଆର୍କେ । ବାରି, ସାପା ରେମୁଆଁଇଂନେ ନ୍ଲୁଗ୍ ଆତେନ୍ ନିଅମ୍ ବଇ ଆଡ଼ାତ୍ରା ଲାଗେ ଲାଏଃଗେ ।
ବାରି, ଏଜ୍ରା ଗ୍ର ଆତେନ୍ କାମ୍ ନ୍ସା ଆଃରେବକ୍ନେ ସୁଆନେ ପାଟା ଏତେ ଆଃରେକ୍ନେ ତିଆର୍କ୍ନେ ଜାଗା ଆରାତ୍ରା ତୁଆଁକେ । ବାରି, ଇଂଞ୍ଚଙ୍ଗ୍ତି ପାକା ମେଁଡାଗ୍ରା ମତ୍ତଥୀୟ, ଶେମା, ଅନାୟ, ଊରୀୟ, ହିଲ୍କୀୟ ବାରି ମାସେୟ ତୁଆଁ ଆର୍କେ । ବାରି, ମେଁନେ ବେଃସ୍ୟାଃତି ପାକା ପଦାୟ, ମୀଶାୟେଲ୍, ମଲ୍କୀୟ, ହଶୂମ୍, ହଶ୍ବଦ୍ଦାନ୍, ଜିଖରିୟ ବାରି ମଶୁଲ୍ଲମ୍ ତୁଆଁ ଆର୍କେ । ଆତ୍ବାନ୍ ଏଜ୍ରା ସାପା ରେମୁଆଁନେ ସାମ୍ନାରେ ଆତେନ୍ ବଇ ପାଃଲେକ୍କେ । ଡାଗ୍ଲା ମେଁ ସାପା ରେମୁଆଁବାନ୍ ଆରାତ୍ରା ତୁଆଁ ଲେଃଗେ । ବାରି, ମେଁ ବଇ ପାଃଲେଗ୍ ବେଲା ସାପାରେ ତୁଆଁଆର୍କେ । ତେଲା ଏଜ୍ରା ମ୍ନା ପର୍ମେସର୍ ମାପ୍ରୁନେ ମିନିରେ ଦନ୍ୟବାଦ୍ ଡିଂକେ । ବାରି, ସାପାରେ ନିଜର୍ ନିଜର୍ନେ ନ୍ତି ଟେକେଚେ ଆମେନ୍, ଆମେନ୍ ଡାଗ୍ଚେ ବାସଙ୍ଗ୍ଆର୍କେ । ବାରି, ମେଇଂ ନିଜର୍ ନିଜର୍ନେ ବାଃଆ ଆଃବ୍ରିଙ୍ଗ୍ଚେ ମାପ୍ରୁକେ ଡେଙ୍ଗାଚେ ସାର୍ଲକେ । ବାରି, ଯେଶୂୟ ବାରି ବାନି ବାରି ଶେରେବୀୟ, ଯାମୀନ୍, ଅକ୍କୂବ୍, ଶବ୍ବଥୟ, ହୋଦୀୟ, ମାସେୟ, କଲିଟ,ଅସରୀୟ, ଯୋଷାବଦ୍, ହାନନ୍, ପଲାୟ ବାରି ଲେବୀୟଇଂ ରେମୁଆଁଇଂକେ ନିଅମ୍ ଆଃବୁଜେ ବିଃଆର୍କେ । ବାରି ରେମୁଆଁଇଂ ନିଜର୍ ନିଜର୍ନେ ଜାଗାନ୍ନିଆ ତୁଆଁଚେ ଲେଃଆର୍ଗେ । ବାରି, ମେଇଂ ନିମାଣ୍ଡା ବାବ୍ରେ ପର୍ମେସର୍ନେ ନିଅମ୍ ବଇକେ ଲଃଆର୍କେ ବାରି ମେଇଂ ଆତ୍ଅରିଆନେ ଅର୍ତ ଆଃବୁଜେ ବିଃଆର୍କେ, ତେଲା ରେମୁଆଁଇଂ ଲଃକ୍ନେ ବଇ ବୁଜେ ଆର୍କେ । ବାରି, ସାସନ୍ଡିଂଣ୍ଡ୍ରେ ନିହିମୀୟା ବାରି ଗ୍ର ବାରି ପୁଜାରି ଏଜ୍ରା ବାରି ରେମୁଆଁଇଂନେ ଗ୍ର ଲେବୀୟଇଂ ସାପାରେକେ ବାସଙ୍ଗ୍କେ, “ଆକେନ୍ ଦିନା ମାପ୍ରୁ ପେନି ପର୍ମେସର୍ନେ ମ୍ନିରେ ପବିତ୍ର ଡିଙ୍ଗ୍ଲେଃଏ । ଦୁକ୍ ଆଡିଙ୍ଗ୍ପା କି ଆହଗ୍ପା ।” ମାତର୍ ନିଅମ୍ ବଇନେ ବ୍ନାଲିର୍ ଅଁଚେ ସାପାରେ ଅଃଆର୍କେ । ଆରି, ମେଁ ଆମେଇଂକେ ବାସଙ୍ଗ୍କେ, “ନିଜର୍ ନିଜର୍ ଗାଲିପାକା ୱେଲାପା, କ୍ରି ଲାଏଃକ୍ନେ ଜିନିସ୍ ଚଙ୍ଗ୍ପା ବାରି ମ୍ବ୍ରେକ୍ନେ ଜିନିସ୍ ଉଗ୍ପା ବାରି ଜା ଆତ୍ଲା ମେଃଡିଗ୍ ଆଃରେ ଆବ ଣ୍ଡୁ, ମେଁ ଡାଗ୍ରା ଚଙ୍ଗ୍ନେ ଜିନିସ୍ ବେପା । ମେଁ ଡାଗ୍ଲା ଆକେନ୍ ଦିନା ନେ ମାପ୍ରୁନେ ଆତ୍ଲା ପବିତ୍ର ଦିନ୍, ପେ ଦୁକ୍ ଆଡିଂଗେପା । ମେଁ ଡାଗ୍ଲା ମାପ୍ରୁନେ ସାର୍ଦା ପେ ଆତ୍ଲା ବପୁ ରକମ୍ ।”
ଦେକ୍ରକମ୍ ଲେବୀୟଇଂ ସାପାରେକେ ଆଃବୁଙ୍ଗ୍ଚେ ବାସଙ୍ଗ୍କେ, “ବୁଙ୍ଗ୍ପା, ଏଃକେ ପବିତ୍ର ଦିନ୍ ! ପେ ମନ୍ ଦୁକ୍ ଆଡିଂଗ୍ପା ।” ଆତ୍ବାନ୍ ରେମୁଆଁଇଂ ମେଇଂ ଡାଗ୍ରା ବାସଙ୍ଗ୍ବକ୍ନେ ବ୍ନାଃଲିର୍ ସାପା ବୁଜେକେସାଃ ମେଇଂ ସାପାରେ ଚଙ୍ଗ୍ଉଗ୍ନେସା ବାରି ଇତୁଡ଼ା ରକମ୍ ଚଙ୍ଗ୍ନେ ଜିନିସ୍ ବେନ୍ସା ବାରି ଜବର୍ ସାର୍ଦା ଡିଂନେସା ନିଜର୍ ନିଜର୍ନେ ଗାଲିପାକା ଅଲେଙ୍ଗ୍ଆର୍କେ ।
ପାଡ଼ୁ ଚାମ୍ଡା ଡିଙ୍ଗ୍ଚେ ପାଣ୍ଡୁଏ ପାଲେନେ
ବାରି, ବାର୍ମୁଇଂ ଦିନା ସାପା ରେମୁଆଁଇଂନେ ଆବାନେ ବଂସନେ ମ୍ନାଃରେଇଂ, ପୁଜାରିଇଂ ବାରି ଲେବୀୟଇଂ ନିଅମ୍ନେ ସାମୁଆଁ ମନ୍ ବାବେ ନ୍ସାଃ ଏଜ୍ରା ଗ୍ର ଡାଗ୍ରା ରିସିଙ୍ଗ୍ଆର୍କେ । ମେଇଂ ମୋଶାକେ ବିଃବକ୍ନେ ମାପ୍ରୁନେ ଆକେନ୍ ଆଦେସ୍ ନିଅମ୍ ବଇନିଆ ଗୁଆର୍ବକ୍ନେ କେଆର୍କେ ଯେ, ଗୁ ଆର୍କେନେ ପାଣ୍ଡୁଏଃ କାଲା ଇସ୍ରାଏଲ୍ନେ ଉଂଡେଇଂ ପାଡ଼ୁ ଚାମ୍ଡା ଡିଙ୍ଗ୍ଚେ ଡିରକମ୍ ବାସାଆର୍ଏ । ବାରି, ମେଇଂ ମେଙ୍ଗ୍ନେ ସାପା ଇନିନିଆ ବାରି ଯିରୂଶାଲମନିଆ ଆକେନ୍ ସାମୁଆଁ ଆଃଅଁଏ ବାରି ବାସଙ୍ଗ୍ ଅଲେଙ୍ଗ୍ଆର୍ଏ, ଯେ, “ପେ ଗୁଆର୍ବକ୍ନେ ଇସାବ୍ରେ ପାଡ଼ୁ ଚାମ୍ଡା ତିଆର୍ ଡିଙ୍ଗ୍ନେସା କଣ୍ଡା ୱେଚେଃ ଜୀତ ସ୍ଲାଃନେ କେନ୍ଦା ବାରି କଣ୍ଡାନିଆ ଲେକ୍ନେ ଜୀତ ସ୍ଲାଃନେ କେନ୍ଦା ବାରି ମେହେନ୍ଦି ସ୍ଲାଃନେ କେନ୍ଦା ବାରି କଜ୍ରି କେନ୍ଦା ବାରି ଉଲିଆ ଲାଏଃକ୍ନେ ସ୍ଲାଃନେ କେନ୍ଦା ଡୁଙ୍ଗ୍ପାଂଲାପା ।”
ତେଲା ରେମୁଆଁଇଂ ବାଏରେ ୱେଚେ ଆତେନ୍ସାପା ଡୁଙ୍ଗ୍ପାଂଚେ ନିଜର୍ ନିଜର୍ ଆତ୍ଲା ପାଃଡ଼ୁ ଏଃତେ ଚାମ୍ଡା ଆଃରେ ଆର୍କେ, ସାପାରେ ନିଜର୍ ନିଜର୍ନେ ଡୁଆନେ ବ୍ଲେସାଂ ଆରାତ୍ରା ବାରି ସେଃମନିଆ ବାରି ପର୍ମେସର୍ ଡୁଆନେ ସାପା ପ୍ଲେଡ଼ିଆନେ ସେଃମନିଆ ବାରି ଣ୍ଡିଆଃ ର୍ଣ୍ଣସାଙ୍ଗ୍ନେ ଚକ୍ନିଆ ବାରି ଇଫ୍ରୟିମ ର୍ଣ୍ଣସାଂନେ ଚକ୍ନିଆ ଆଃରେ ଆର୍କେ । ବାରି, ବନ୍ଦି ଡିଂନେବାନ୍ ପାଙ୍ଗ୍ଲାଏକ୍ନେ ରେମୁଆଁଇଂନେ ସାପା ସମାଜ୍ ପାଃଡ଼ୁ ଏଃତେ ଚାମ୍ଡା ଆଃରେଚେ ଆତ୍ଅରିଆ ବାସାଆର୍କେ । ନୂନନେ ଉଂଡେ ଯେଶୂୟ କେଲାବାନ୍ ଆତେନ୍ ଦିନା ଜାକ ଇସ୍ରାଏଲ୍ନେ ଉଂଡେଇଂ ଦେତ୍ରକମ୍ ସାର୍ଦା ଡିଂଆବଗେ ଣ୍ଡୁ । ଆତେନ୍ କାଲା ମାଲେ ସାର୍ଦା ଡିଂକେ । ବାରି, ଏଜ୍ରା ପର୍ତୁମ୍ ଦିନାବାନ୍ ଡିଡା ଜାକ କାଲାଆଃ ପର୍ମେସର୍ନେ ନିୟମ୍ ବଇବାନ୍ ପଡ଼େକେ । ବାରି, ରେମୁଆଁଇଂ ଗୁଦିନା ଜାକ ପାଣ୍ଡୁଏ ପାଲେ ଆର୍କେ । ଆରି, ନିଅମ୍ ଇସାବ୍ରେ ତ୍ମା ଦିନା ମ୍ନା କୁକପାର୍ ଡିଂକେ ।
Gata Didayi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.