Gata Didayi Bible
ନିହିମିଆ 10
ସିଲ୍ବଗ୍ନେ ନିଅମ୍ନେ ସାକି
ସିଲ୍ ବଗ୍ଣ୍ଡ୍ରେନେ ମିନି ଆକେନ୍, ଦେକ୍ରକମ୍, ହଖଲୀୟନେ ଉଂଡେ ନିହିମୀୟା ସାସନ୍ଡିଂଣ୍ଡ୍ରେ ବାରି ସିଦିକୀୟ । ସରାୟ, ଅସରୀୟ, ଯିରିମିୟ । ପଶ୍ହୂର, ଅମରୀୟ, ମଲ୍କୀୟ । ହଟୂଶ୍, ଶବନୀୟ, ମଲ୍ଲୂକ । ହାରୀମ୍, ମରେମୋତ୍, ଓବଦୀୟ । ଦାନିୟେଲ, ଗିନ୍ନଥୋନ, ବାରୁକ୍ । ମଶୁଲ୍ଲମ୍, ଅବୀୟ, ମିୟାମୀନ୍ । ମାସିୟ, ବିଲ୍ଗୟ, ଶମୟୀୟ । କିମେଇଂ ପୁଜାରି ଲେଃଗେ । ଆରି, ଲେବୀୟଇଂ, କିମେଇଂ, ଅସନୀୟନେ ଉଂଡେ ଯେଶୂୟ । ହେନାଦଦନେ ଉଂଡେଇଂନେ ବିତ୍ରେ ବିନ୍ନୁୟି ଆରି କଦ୍ମୀୟେଲ । ବାରି, ମେଙ୍ଗ୍ନେ ବୟାଁଇଂ, ଶବନୀୟ, ହୋଦୀୟ, କଲିଟ, ପଲାୟ, ହାନନ୍ । ମୀକା, ରହୋବ, ହଶବୀୟ । ସକ୍କୂର, ଶେରେବୀୟ, ଶବନୀୟ । ହୋଦୀୟ, ବାନି, ବନୀନୁ । ରେମୁଆଁଇଂନେ ମ୍ନାଃରେଇଂ, କିମେଇଂ, ପରିୟୋଶ୍, ପହତ୍ ମୋୟାବ, ଏଲମ୍ । ସତ୍ତୂ, ବାନି । ବୁନ୍ନି, ଅସ୍ଗଦ୍, ବେବୟ । ଅଦୋନୀୟ, ବିଗ୍ବୟ, ଆଦୀନ । ଆଟେର୍, ହିଜକୀୟ, ଅସୂର । ହୋଦୀୟ, ହଶୂମ୍, ବେତ୍ସୟ, ହାରୀଫ, ଅନାଥୋତ୍, ନୋବୟ । ମଗ୍ପୀୟସ୍, ମଶୁଲ୍ଲମ୍, ହେଷୀର୍ । ମଶେଷବେଲ୍, ସାଦୋକ, ଯଦ୍ଦୂୟ । ପଲାଟୀୟ, ହାନନ୍, ଅନାୟ । ହୋଶେୟ, ହନାନୀୟ, ହଶୂବ । ହଲୋହେଶ୍, ପିଲହ, ଶୋବେକ । ରହୂମ୍, ହଶବ୍ନା, ମାସେୟ, ବାରି, ଅହୀୟ, ହାନନ୍, ଅନାନ୍ । ମଲ୍ଲୂକ, ହାରୀମ୍, ବାନା ।
ନିଅମ୍ନେ ଦାଇତ୍
ବାରି, ରେମୁଆଁଇଂନେ ବାକି ସାପାରେ, ପୁଜାରିଇଂ, ଲେବୀୟଇଂ ଜଗୁଆଲ୍ଣ୍ଡ୍ରେଇଂ, ଅସ୍ମାର୍ ସାର୍ଣ୍ଡ୍ରେଇଂ ପାର୍ତନା ଡୁଆ ସେବା ଡିଙ୍ଗ୍ଣ୍ଡ୍ରେ ଆରି ବାକି ସାପାରେ ନାନା ଦେସ୍ନେ କୁଟୁମ୍ଇଂନେବାନ୍ ନିଜ୍କେ ଅଲ୍ଗା ଆଃଡିଂଚେ ପର୍ମେସର୍ନେ ନିଅମ୍ ପାକା ଡିଂଲାଏଗେ, ମେଇଂ, ମେଙ୍ଗ୍ନେ କୁନେଃଡ଼େଇଂ, ମେଙ୍ଗ୍ନେ ଉଂଡେଇଂ ଆରି ମେଙ୍ଗ୍ନେ ସେଲାଇଂ, ସାପାରେ ଜ୍ଞାନ୍ବାନ୍ ଆରି ବୁଦିମାନ୍ ରେମୁଆଁ । ମେଇଂ ମେଙ୍ଗ୍ନେ ବୟାଁଇଂ, ମେଙ୍ଗ୍ନେ ନେତାଇଂନେ ଆଡ଼ାତ୍ରା ବିସ୍ବାସ୍ ଡିଂଚେ ପର୍ମେସର୍ନେ ଦାସ୍ ମୋଶାବାନ୍ ବିଃବକ୍ନେ ପର୍ମେସର୍ନେ ନିଅମ୍ ଇସାବ୍ରେ ଅଲେଙ୍ଗ୍ନେସା ଆରି ନେଇଂନେ ମାପ୍ରୁ ସଦାପ୍ରବୁନେ ସାପା ଆଜ୍ଞା ଆରି ସାସନ୍ ଆରି ନିଅମ୍ ମନ୍ଦିଆନ୍ ବିଃଚେ ପାଲେନ୍ସା ପାର୍ମାନ୍ ଆରି ପ୍ରତିଜ୍ଞା ଡିଂକେ । ଆରି ବାସଙ୍ଗ୍କେ, “ନେ ବିନ୍ ଦେଶ୍ନେ ରେମୁଆଁଇଂକେ ନେନେ ସେଲାଇଂକେ ନେବିଃଣ୍ଡୁ, କି ନେନେ ଉଂଡେଇଂ ଆତ୍ଲା ମେଙ୍ଗ୍ନେ ସେଲାଇଂକେ ରାଙ୍ଗ୍ନେଡ ଣ୍ଡୁ ।”
ଆରି, ଦେଶ୍ନେ ରେମୁଆଁଇଂ ବିଶ୍ରାମ୍ ଦିନ୍ କାଲା ମେଃଡିଗ୍ ଜିନିସ୍ କି ଚଙ୍ଗ୍ନେ ବଲେ ସଃନ୍ସା ରାଙ୍ଗ୍ପାଙ୍ଗ୍ଲା, ନେ ପୁଣ୍ଡେନେ ଦିନ୍ କେଲା କି ବିନ୍ନେ ମେଃଡିଗ୍ ପବିତ୍ର ଦିନ୍ନିଆ ମେଇଂନେ ବାନ୍ ଆତାନ୍ ନେବିଆର୍ ଣ୍ଡୁ । ଆରି ଗୁମୁଆଁ ସାପା ରକମ୍ନେ ରୁନ୍ ସାଲ୍ୟାଃନେ ଆନ୍ତାର୍ ନେବିଃଏ ଆରି ଚାସ୍ଡିଙ୍ଗ୍ନେ କାମ୍ ଆନ୍ତାର୍ ନେବିଏ । ଆରି, ନେ ପେନି ପର୍ମେସର୍ନେ ସେବା କାମ୍ ଡିଂନେସା, ବାରି, ମାପ୍ରୁ ସେଃମନିଆ ବଃନେ ରୁଟି ଆରି ଦିନ୍କେ ଚଙ୍ଗ୍ନେ ଉଗ୍ନେ ତାଲି ଆରି ଦିନ୍କେ ସୁଆ ବଲି ଡିଂନେ ପସୁ, ପୁଣ୍ଡେନେ ଦିନ୍ନେ, ଆମାସ୍ ବେଲା ଆର୍ମେବକ୍ନେ ପାଣ୍ଡୁଏଃ ଆଣ୍ଡେଙ୍ଗ୍ନେ ଆରି ପବିତ୍ର ଜିନିସ୍ ଆଣ୍ଡେଙ୍ଗ୍ନେ ଆରି ଇସ୍ରାଏଲ୍ ଡିଙ୍ଗ୍ବକ୍ନେ ପାପ୍ ବଲିନେ ଆରି ନେନେ ପର୍ମେସର୍ନେ ଡୁଆନେ ସାପା କାମ୍ ଆତ୍ଲା ମୁଇଂ ମୁଇଂ କେଜିନେ ଞ୍ଜି ବାଗ୍ ଦାନ୍ ଡିଂନେ ଅଜନ୍ ପେ ଆଡ଼ାତ୍ରା ଡୁଙ୍ଗ୍ୱେନ୍ସା ନିଅମ୍ ନେଡିଂକେ ।
ବାରି, ନିଅମ୍ଅରିଆ ଗୁଆର୍ବକ୍ନେ ଇସାବ୍ରେ ମାପ୍ରୁ ନେଃନେ ପର୍ମେସର୍ ପୁଜାବେଦି ଆରାତ୍ରା ଆଃଡୁଆନ୍ସା ନେଇଂନେ ଆବାନେ ବଂସ ଇସାବ୍ରେ ମେମୁଆଁକେ ମେମୁଆଁ ଆର୍ମେବକ୍ନେ ସମୟ୍ ବେଲା ନେନେ ପରମେସର୍ନେ ଡୁଆନିଆ ସୁଆ ରାଙ୍ଗ୍ପାଂନେସା ନେ, ବାରି ପୁଜାରିଇଂ, ଲେବୀୟଇଂ ଆରି ରେମୁଆଁଇଂ ସୁଆ ଦାନ୍ ବିଃନେ ବିସଏରେ ଚିଟି ନେଃତ୍ଲାଗ୍କେ ।
ଆରି, ନେନେ ତୁବନେ ପର୍ତୁମ୍ ଡିଂକ୍ନେ କିଆ ଗ୍ଲେ ଆରି ସାପା ରକମ୍ନେ ସ୍ଲାଃନେ ପର୍ତୁମ୍ ଡିଂକ୍ନେ ଚୁଚୁ ମେମୁଆଁକେ ମେମୁଆଁ ମାପ୍ରୁନେ ପାର୍ତନା ଡୁଆନିଆ ରାଙ୍ଗ୍ପାଂନେସା ।
ଆରି ଏଲେଡିଗ୍ ନିଅମ୍ଅରିଆ ଗୁଆର୍କ୍ନେ ଇସାବ୍ରେ ନେନେ ଉଂଡେଇଂନେ ଆରି ପସୁଇଂନେ ପର୍ତୁମ୍ ଜନମ୍ ଡିଂକ୍ନେ ଆରି ନେନେ ଅରେଃ ରାସି ଆରି ମେଣ୍ଡା ରାସିନେ ପର୍ତୁମ୍ ଜନମ୍ ଡିଂକ୍ନେ ନେନେ ପର୍ମେସର୍ନେ ଡୁଆନିଆ, ନେନେ ପର୍ମେସର୍ନେ ପାର୍ତନା ଡୁଆ ଅରିଆ ସେବାଡିଂଣ୍ଡ୍ରେ ପୁଜାରିଇଂନେ ଡାଗ୍ରା ରାଙ୍ଗ୍ପାଂନେସା, ବାରି, ନେନେ ଚକ୍ଟେବକ୍ନେ ମଇଦାନେ ଗୁଆ ବାଗ୍ବାନ୍ ମୁଲ୍ ବାଗ୍ ଆରି ନେନେ ନିଜର୍ ଇକ୍ଚାନେ ପୁରୁସ୍କାର୍ ଆରି ସାପା ରକମ୍ନେ ସ୍ଲାଃନେ ଚୁ, ଅଙ୍ଗୁର୍ରସ୍ ଆରି ଞ୍ଚୁ ପୁଜାରିଇଂନିଆ ନେନେ ପର୍ମେସର୍ନେ ଡୁଆନେ ବାକ୍ରାନିଆ ରାଙ୍ଗ୍ପାଂନେସା, ଆରି ତୁବନିଆ ଚୁକ୍ନେ ଜିନିସ୍ନେ ଗୁଆ ବାଗ୍ବାନ୍ ମୁଇଂ ବାଗ୍ ଲେବୀୟଇଂନିଆ ରାଙ୍ଗ୍ପାଙ୍ଗ୍ ନ୍ସାଃ ରାଜି ନେଡିଂକେ । ମାତର୍ ଆତେନ୍ ଲେବୀୟଇଂ ନେନେ ସାପା ଚାସ୍ କାମ୍ ଡିଂନେ ଇନିନିଆ ଗୁଆ ବାଗ୍ବାନ୍ ମୁଇଂ ବାଗ୍ ଆଦାୟ୍ ଡିଂମ୍ୟାଃକେ । ମାତର୍ ଲେବୀୟଇଂ ଗୁଆ ବାଗ୍ବାନ୍ ମୁଇଂ ବାଗ୍ ସାଲ୍ୟାଃନେ ବେଲା ହାରୋଣନେ ଉଂଡେ ପୁଜାରି ଲେବୀୟଇଂ ଏଃତେ ଲେଃଆର୍ଏ । ଆରି, ଲେବୀୟଇଂ ପର୍ମେସର୍ନେ ପାର୍ତନା ଡୁଆନିଆ ଲେଃକ୍ନେ ଡାବୁ ଲାଏଃକ୍ନେ ବାକ୍ରାନିଆ ଗୁଆ ବାଗ୍ବାନ୍ ମୁଇଂ ବାଗ୍ ରାଙ୍ଗ୍ପାଙ୍ଗ୍ଆର୍ଏ । ମାତର୍ ପବିତ୍ର ଜାଗାଅରିଆନେ ତାଲି ସାପା ଆରି ସେବା ଡିଂନେ ପୁଜାରିଇଂ, ଆରି, ଜାଗୁଆଲ୍ଇଂ ଆରି ଅସ୍ମାର୍ ସାର୍ଣ୍ଡ୍ରେଇଂ ଆଣ୍ଡିନେ ସାପା ବାକ୍ରାନିଆ ଲେଃଆର୍ଏ, ଆତ୍ଅରିଆ ଇସ୍ରାଏଲ୍ ଉଂଡେଇଂ ଆରି ଲେବୀୟ ଉଂଡେଇଂ କିଆଉଁଆଃନେ, ଅଙ୍ଗୁର୍ ରସ୍ନେ ଆରି ନିଜର୍ ଇକ୍ଚାରେ କିଗ୍ ଡିଙ୍ଗ୍କ୍ନେ ଞ୍ଚୁ ଦାନ୍ ବିଃଏ । ବାରି, ନେ ନେନେ ପର୍ମେସର୍ନେ ଡୁଆକେ ନେଆନ୍ତାର୍ ଣ୍ଡୁ ।
Gata Didayi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.