Gata Didayi Bible
ଏଜ୍ରା 3
ପୁଜା ପାର୍ତନା ବାରି ଆରାମ୍ ଡିଂକେ
ଆକେନ୍ ଇଡ଼ିଂ ଗୁ ଆର୍କେ ପିଙ୍ଗ୍ଚାକେ, ବାରି ଇସ୍ରାଏଲ୍ନେ ଉଂଡେଇଂ ଆତେନ୍ ବେଲା ଇନିନିଆ ଲେଃଗେ । ଆତେନ୍ ବେଲା ରେମୁଆଁଇଂ ମୁଇଂ ରେମୁଆଁ ରକମ୍ ଯିରୂଶାଲମ ଡାଗ୍ରା ମୁଇଂତୁଗ୍ ରିସିଂଆର୍କେ । ଆକେନ୍ ପରେ ଯୋଷାଦକନେ ଉଂଡେ ଯେଶୂୟ ବାରି ମେଁନେ ପୁଜାରି ବୟାଁଇଂ ବାରି ଶଲଟୀୟେଲନେ ଉଂଡେ ଯିରୁବ୍ବାବିଲ୍ ବାରି ମେଁନେ ବୟାଁଇଂ ତଃଡ଼ିଆଚେ ପର୍ମେସର୍ନେ ରେମୁଆଁଇଂ ମୋଶାନେ ନିଅମ୍ନିଆ ଗୁଆର୍ବକ୍ନେ ଇସାବ୍ରେ ସୁଆ ବଲି ଡିଂନ୍ସାଃ ଇସ୍ରାଏଲ୍ନେ ପର୍ମେସର୍ ଆତ୍ଲା ବଲି ଡିଙ୍ଗ୍ନେ ବେଦି ଆଃରେଆର୍କେ । ବାରି, ମେଇଂ ବିନ୍ ବିନ୍ ଦେଶ୍ନେ ରେମୁଆଁଇଂକେ ବୁଟଚେ, ମେଇଂ ଆତେନ୍ ବାଇର୍କ୍ନେ ବଲି ବେଦି ଆତ୍ନେ ଆଡ଼ାତ୍ରା ତ୍ମିକ୍ନେ ବଲି ବେଦି ଆଃରେ ଆର୍କେ । ବାରି ମେଇଂ ତେନ୍ ଆରାତ୍ରା ମାପ୍ରୁ ମ୍ନିରେ ଞ୍ଜିର୍ ବାରି ଲମ୍ଡିଗ୍ କେଲା ସୁଆ ବଲି ଡିଂଆର୍କେ । ଆକେନ୍ ଇଡ଼ିଂ ମେଇଂ କୁଡ଼ିଆନେ1 ପାଣ୍ଡୁଏଃ ପାଲେ ଆର୍କେ । ବାରି ମେଇଂ କାଲାଆଃ ନିଅମ୍ ଇସାବ୍ରେ ଗୁଆର୍ବକ୍ନେ ସାପା ଦିନ୍ନେ ଉଃଡ଼ି ଦର୍କାର୍ ଅଃତେନ୍ ସଂଖ୍ୟା ଇସାବ୍ରେ ମେଇଂ ସୁଆ ବଲି ଡିଂଆର୍କେ । ଆକେନ୍ ଇଡ଼ିଂ ମେଇଂ ଦିନ୍କେ ସୁଆ ବଲି, ଆମାସ୍ ଦିନା ମାପ୍ରୁ ପବିତ୍ର ଡିଂବକ୍ନେ ସାପା ଆର୍ମେବକ୍ନେ ପାଣ୍ଡୁଏଃ ବାରି ମାପ୍ରୁନେ ମ୍ନିରେ ନିଜର୍ ଇକ୍ଚାରେ ବଲି ଜିନିସ୍ ବିଃବକ୍ନେ ସାପା ରେମୁଆଁନେ ଦାନ୍ ବିଃଆର୍କେ । ଗୁ ଆର୍କେନେ ପର୍ତୁମ୍ ଦିନାବାନ୍ ମେଇଂ ମାପ୍ରୁନେ ମ୍ନିରେ ସୁଆ ବଲି ବିଃନ୍ସାଃ ଆରାମ୍ ଡିଂଆର୍କେ । ମାତର୍ ଆତେନ୍ ବେଲା ମାପ୍ରୁନେ ମନ୍ଦିର୍ନେ ପାଣ୍ଡୁସନ୍ ଆଃରେ ଆବଗେ ।
ମନ୍ଦିର୍କେ ବାରି ମୁଇଂତର୍ ଆଃରେନେ ।
ବାରି ମେଇଂ ପାରସ୍ୟନେ ରାଜା କୋରସ୍ନେ ଆଦେସ୍ ଅନୁସାରେ ମ୍ନା ମିସ୍ତୁରି ବାରି ବାଡ଼େଇ ରେମୁଆଁଇଂକେ ଡାବୁ ବିଃଆର୍କେ । ବାରି ଲିବାନୋନ୍ବାନ୍ ଯାଫୋନିଆ ଲେକ୍ନେ ମ୍ନା କେଣ୍ଡିଆଃ ଆଃଡ଼ାଃ ଜାକ ଏରସ ସୁଆ ଡୁଙ୍ଗ୍ପାଙ୍ଗ୍ ନ୍ସାଃ ସୀଦୋନୀୟ ବାରି ସୋରୀୟ ରେମୁଆଁଇଂକେ କାଦି, ଣ୍ଡିଆ ବାରି ଞ୍ଚୁ ବିଃକେ । ଆକେନ୍ ଇଡ଼ିଂ ବାର୍ମୁଆଁନେ ମ୍ୱାର୍ ଆର୍କେ ବେଲା ପର୍ମେସର୍ନେ ଯିରୂଶାଲମ ଡାଗ୍ରା ଲେକ୍ନେ ମନ୍ଦିର୍ନିଆ ଶଲଟୀୟେଲନେ ଉଂଡେ ଯିରୁବ୍ବାବିଲ୍ ବାରି ଯୋଷାଦକନେ ଉଂଡେ ଯେଶୂୟ ବାରି ମେଇଂନେ ସାମୁଆଁରେ ପୁଜାରିଇଂ ବାରି ଲେବୀୟ ବୟାଁଇଂ ବାରି ବନ୍ଦି ଡିଂଚେ ଯିରୂଶାଲମନିଆ ପାଙ୍ଗ୍ଲାଏଃକ୍ନେ ରେମୁଆଁ ସାପାରେ ପାଙ୍ଗ୍ଚେ ମାପ୍ରୁନେ ଡୁଆ ଆଃରେନ୍ସା କାମ୍ନ୍ନିଆ ସଙ୍ଗ୍ତୁଡ଼୍ ଡିଂନ୍ସାଃ କୁଡ଼ିଏ ବରସ୍ ବାନ୍ ଜବର୍ ବରସ୍ ଲେଃକ୍ନେ ଲେବୀୟ ରେମୁଆଁଇଂକେ ଆଃମିସୁଃଆର୍କେ । ଆତେନ୍ ବେଲା ଯେଶୂୟ ମେଁନେ ଉଂଡେ ବାରି ବୟାଁଇଂ, କଦ୍ମୀୟେଲ ବାରି ମେଁନେ ଉଂଡେଇଂ, ଯିହୁଦାନେ ଉଂଡେଇଂ, ପର୍ମେସର୍ନେ ଡୁଆନିଆ କାମ୍ ଡିଂନେ ରେମୁଆଁଇଂନେ ସଙ୍ଗ୍ତୁଡ଼୍ ଡିଂ ନ୍ସା ଲିଗିଙ୍ଗ୍ ଡୁଙ୍ଗ୍ ନ୍ସାଃ ମୁଇଂତୁଗ୍ ତୁଆଁ ଆର୍କେ । ବାରି ହେନାଦଦନେ ଉଂଡେଇଂ, ମେଇଂନେ ଉଂଡେ ବାରି ବୟାଁଇଂ କିମେଇଂ ସାପାରେ ଲେବୀୟ ରେମୁଆଁ ଲେଃଗେ ।
ଆରି ଉର୍ଣ୍ଡ୍ରେ ମାପ୍ରୁନେ ମନ୍ଦିର୍ନେ ପାଣ୍ଡୁସନ୍ ଆଃକନେ ବେଲା ମେଇଂ ଇସ୍ରାଏଲ୍ନେ ରାଜା ଦାଉଦ୍ ଆଃରେବକ୍ନେ ଇସାବ୍ରେ ମାପ୍ରୁନେ ପ୍ରଶଂସା ଡିଂ ନ୍ସା ନିଜେ ନିଜେ ପାଟେଇ ସଃଲେକ୍ନେ ପୁଜାରିଇଂକେ ପ୍ନିଃ ଏତେ ବାରି ଆସଫନେ ଉଂଡେ ଲେବୀୟଇଂକେ ବାଃତିଚେଃ ଆରେ ଆର୍କେ । ବାରି, ମେଇଂ ମାପ୍ରୁକେ ପ୍ରଶଂସା ବାରି ଦନ୍ୟବାଦ୍ ବିଃଚେ ମୁଇଂମାଣ୍ଡ୍ରେ ଅସ୍ମାର୍ ସାର୍ଚେ ବାସଙ୍ଗ୍ଆର୍କେ, ମେଁ ମଙ୍ଗଲମୟ, ମେଁ ଡାଗ୍ଲା ଇସ୍ରାଏଲ୍ ଆରାତ୍ରା ମେଁନେ ଦୟା ମାଡାନେ କାଲ୍ ଜାକ ଲେଃଏ । ଆରି, ମାପ୍ରୁ ଡୁଆନେ ପାଣ୍ଡୁସନ୍ ଆଃକକ୍ସା ମେଇଂ ମାପ୍ରୁକେ ପ୍ରଶଂସା ଡିଂନେବେଲା ସାପାରେ ୱାସାର୍ଚେ ଜୟ୍ ଜୟ୍ ଡିଂଆର୍କେ । ମାତର୍ ମୁଡ଼ି ପୁଜାରି ବାରି ଲେବୀୟ ବାରି ଆବାନେ ବଂସ ମ୍ନାଃ ଡକ୍ରାଡୁକ୍ରି ରେମୁଆଁଇଂ ପର୍ତୁମ୍ ଡୁଆ କେଲେଃଆର୍ଗେ, ମେଙ୍ଗ୍ନେ ସାମ୍ନେ ଆକେନ୍ ଡୁଆନେ ପାଣ୍ଡୁସନ୍ ଆଃକନେ ବେଲା ମେଙ୍ଗ୍ନେ ବାନ୍ ଗୁଲେରେ ୱାସାର୍ଚେ ଅଃଆର୍କେ ବାରି ଗୁଲେରୁଆ ସାର୍ଦା ଡିଂଚେ ଜୟ୍ ଜୟ୍ ଡିଂଆର୍କେ । ଆତ୍ଅରିଆ ରେମୁଆଁଇଂ ସାର୍ଦା ଡିଂକ୍ନେ ସବଦ୍ ବାରି ରେମୁଆଁ ଅଃନେ ସବଦ୍କେ ଡିଡା ଆୟାଆର୍କେ ଣ୍ଡୁ । ଆତେନ୍ସା ରେମୁଆଁଇଂ ଜାବର୍ ୱାଃସାର୍ଆର୍କେ, ଆରି ଆତେନ୍ ସବଦ୍ ଜାବର୍ ସୁଲ ଣ୍ଡ୍ରେ ଅଁଆର୍କେ ।
Source notes (1)
- Footnote ଚାମ୍ଡା କୁଡ଼ିଆନେ ପାଣ୍ଡୁଏଃ ଣ୍ଡୁଲା ବିଶ୍ରାମ୍ ଜାଗାନେ ପାଣ୍ଡୁଏ
Gata Didayi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.