Gata Didayi Bible
୨ କରିନ୍ତିୟ 10
ଦଦ୍ୟା ବାସଙ୍ଗ୍ନେ ବିରଦ୍ରେ ପାଉଲ୍ନେ ଉତର୍
ନେଙ୍ଗ୍ ପାଉଲ୍ ଆପେକେ ନେଙ୍ଗ୍ନେ ଏନ୍ ନିଜର୍ନେ ନମସ୍କାର୍ । ଜାଣ୍ଡେ ଜାଣ୍ଡେ ବାସଙ୍ଗ୍ଏ, “ନେଙ୍ଗ୍ ପେଇଂନେ ଡାଗ୍ରା ଲେଃବେଲା ମାଲେ ଦରମ୍ ବାରି ସାନ୍ତି ଲେଃଏ ମାତର୍ ସ୍ଲ ୱେଲା ମାଲେ ସାହାସ୍ ଲେଃଏ ।” କିସ୍ଟନେ ଦରମ୍ ବାରି ମ୍ବ୍ରେ ବାରି ଦରମ୍ ବାବ୍ରେ ମନେ ଆଃଏତେଚେ ଆପେକେ କୁସାମୁତି ଣ୍ଡିଙ୍ଗ୍ଏ; ପେଇଂନେ ଏତେ କୁଡ଼େଃ ବେଲା ଆନେଙ୍ଗ୍ ଡିରକମ୍ ସାହାସ୍ ରକମ୍ ବାଃଲିର୍ବାଃତା ଡିଙ୍ଗ୍ନେସା ଆପଡ଼େ ଣ୍ଡୁ । ଡାଗ୍ଲା ଜାଣ୍ଡେଇଂ ମନେ ଡିଙ୍ଗ୍ଏ ଜେ ନେନେ ଗାଗ୍ଡ଼େନେ ନିତିନିଅମ୍ ରକମ୍ ଚାଲେନେଡିଂକେ ମେଁଇଂନେ ବିରଦ୍ରେ ଡାଟ୍ ବାଦୁଲ୍ ଡୁଙ୍ଗ୍ୱେନେ ଜାବର୍ ସାହାସ୍ ନେଙ୍ଗ୍ନେ ଲେଃକେ । ଡାଗ୍ଲା ନେ ମଞ୍ଚ୍ପୁର୍ନ୍ନିଆ ବାସା ନେଲେଏ ସତ୍, ମାତର୍ ନେ ସଂସାର୍ନ୍ନିଆ ଏତେ ବାସା ନେଡିଙ୍ଗ୍ ଣ୍ଡୁ, ତେସା ନେ ସଂସାର୍ନେ ସାଜବାଜ ଗାଗ୍ଡ଼େ ଣ୍ଡୁ, ସତ୍ରୁଇଂନେ ଡାଟ୍ ଗାଲିସାପା ଦଂସ ଡିଙ୍ଗ୍ନେ ସା ଇସ୍ପର୍ନେ ଆତେନ୍ ବପୁ ବାନ୍ ଦଂସ ଆଡିଙ୍ଗ୍ ନେବିଏ । ଇସ୍ପର୍ନେ ଗ୍ୟାନ୍କେ ବିରଦ୍ ଡିଙ୍ଗ୍ମ୍ୟାକ୍ନେ ସାପା ଚ୍ଲେ ସାମୁଆଁ ଦଂସ ଡିଙ୍ଗ୍ଲେ । ବାରି ରେମୁଆଁନେ ସାପା ଚିନ୍ତାକେ କିସ୍ଟନେ ଆଦେସ୍ ମାନେଃଲେ । ଆଣ୍ଡିନେ ରେମୁଆଁ ସମାନ୍ ବାବ୍ରେ କ୍ରିସ୍ଟକେ ଅମାନି ଡିଙ୍ଗ୍ଏ ନେନେ ଆମେକେ ଡଣ୍ଡ୍ ବିନ୍ସା ତିଆର୍ ନେଲେକେ । ମାତର୍ ସେନୁଗ୍ ନେନେ ଇକ୍ଚା ନେଡିଙ୍ଗ୍ଏ ଜେ ପେଇଂ ମେଁନେ ଆଦେସ୍ ମାନେପା ।
ପେନେ ପିତୁର୍ପାକା ମେଃମେଃନେ ସାପା ଗଟେଡିଂକେ କେଲାପା । ପେଇଂନେ ବିତ୍ରେ ଜାଣ୍ଡେ କିସ୍ଟନେ ବିସ୍ବାସି ଲେଃଆର୍କେ ଲେଃ ? ଜଦି ଲେଃଆର୍କେ ତେଲା ମେଁ ଆର୍ମୁଇଂତର୍ ଏନ୍ ଚିନ୍ତା ଡିଙ୍ଗ୍ କେଲାପା । ଡାଗ୍ଲା ମେଁନେ ରକମ୍ ନେନେ ଡିଗ୍ କିସ୍ଟନେ ବିସ୍ବାସି । ଆପେକେ ଦଂସ ଆଡିଙ୍ଗ୍ ନ୍ସା ଣ୍ଡୁ, ମାତର୍ ଆରେ ନ୍ସା ଇସ୍ପର୍ ଆନେକେ ମୁଡ଼ିନେ ଅଦିକାର୍ ବିବକେ, ଆତେନ୍ ସା ଜଦି ନେଙ୍ଗ୍ ମାଲେ ଗରବ୍ ଣ୍ଡିଙ୍ଗ୍ଏ, ତେଲା ଗିଆସ ନାଡିଙ୍ଗ୍ ଣ୍ଡୁ । ନେଙ୍ଗ୍ ନେଙ୍ଗ୍ନେ ଚିଟି ବାନ୍ ଆପେକେ ବାଃଟନ୍ସା ଚେସ୍ଟା ଡିଙ୍ଗ୍ଣ୍ଡିଂକେ ଡାଗ୍ଚେ ପେଇଂ ଆଏତେଗେପା । ଜାଣ୍ଡେ ଜାଣ୍ଡେ ବାସଙ୍ଗ୍ଆର୍ଏ “ପାଉଲ୍ନେ ଚିଟିଇଂ ବାଦେକେ ରକମ୍ ବାରି ଗୁଆକେ ରକମ୍ ମାତର୍ ନେ ଏତେ ଲେଃକେଲା ମେଁନେ ଗାଗ୍ଡ଼େ ରୁଗଚ୍ୟା ତ୍ନାମ୍ୟାକେ ବାରି ମେଁନେ ସାମୁଆଁ ଦଦ୍ୟା ରକମ୍ ଲାଗେଏ ।” ଆତେନ୍ ରେମୁଆଁଇଂନେ ବୁଜେନେ ଦର୍କାର୍ ଜେ ନେନେ ସ୍ଲ ବାନ୍ ଚିଟିନ୍ନିଆ ମେଃମେଃନେ ନେଗୁଆର୍ଏ ସାମ୍ନାନ୍ନିଆ ଆମେକେ ସ୍ଲେନିଆ ବେବଆର୍ ନେଡିଙ୍ଗ୍ଏ ।
ଡାଗ୍ଲା ଜାଣ୍ଡେଇଂ ଆତ୍ମା ପ୍ରସଂସା ଡିଙ୍ଗ୍ଆର୍ଏ ମେଁଇଂନେ ବାନ୍ ଜାଣ୍ଡେ ଜାଣ୍ଡେ ଏତେ ନିଜେ ନିଜେକେ ତୁଲ୍ନା ଡିଙ୍ଗ୍ନେସା ନେ ସାହାସ୍ ନେଡିଙ୍ଗ୍କେ ଣ୍ଡୁ; ମାତର୍ ମେଇଂ ନିଜେ ନିଜେ ନିଜର୍ ନିଜର୍ବାନ୍ ନିଜର୍ ନିଜର୍ନେ ଇସାବ୍ ବାରି ନିଜର୍ ନିଜର୍ ଏତେ ନିଜର୍ ନିଜର୍ନେ ରକମ୍ ଡିଙ୍ଗ୍ଚେ ମୁର୍କ ଆତ୍ନା ବକେ । ଆନେକେ ମୁଡ଼ିନେ କାମ୍ ବିବ ଆର୍କେ ଆତ୍ବାନ୍ ସିମା ଗାଲେଗ୍ଚେ ଅଃନାଡିଗ୍ ଗରବ୍ନେ ସାମୁଆଁ ନେବାସଙ୍ଗ୍ ଣ୍ଡୁ । ପର୍ମେସର୍ନେ ବିଃକ୍ନେ କାମ୍ ନ୍ସା ନେନେ ନିଜେ ଗରବ୍ ନେଡିଙ୍ଗ୍ଏ । ଏନ୍ କାମ୍ ପେଇଂନେ ଏତେ ନେନେ କାମ୍କେ ଡିଗ୍ ପାକାପାକି ଡିଙ୍ଗ୍ଏ । ଆତେନ୍ସା ନେନେ ସେନୁଗ୍ କିସ୍ଟନେ ନିମାଣ୍ଡା ସାମୁଆଁ ପେଇଂନେ ଡାଗ୍ରା ଡୁଙ୍ଗ୍ ୱେନେ ବେଲା ମେଃଡିଗ୍ ସିମା ବାଏରେନେ କାମ୍ ନେଡିଙ୍ଗ୍କେ ଣ୍ଡୁ । ନେନେ ବିନ୍ଣ୍ଡ୍ରେ ବାନ୍ ଆଡିଙ୍ଗ୍ବକ୍ନେ କାମ୍ ନ୍ସା ଣ୍ଡୁ ମାତର୍ ନିଜେ ଡିଙ୍ଗ୍ବକ୍ନେ କାମ୍ ନ୍ସା ଗରବ୍ ଡିଂନେଡିଙ୍ଗ୍ଏ । ନେନେ ଆସା ନେଡିଙ୍ଗ୍ଏ ଜେ ପେଇଂନେ ବିସ୍ବାସ୍ ମ୍ନାନେ ଏତେ ନେନେ କାମ୍ ଜାବର୍ ବାବ୍ରେ ମ୍ନାନେ ପେଇଂ ସାଇଜ ପେଡିଙ୍ଗ୍ଏ । ତେଲା ବିନ୍ଣ୍ଡ୍ରେ ଡିଙ୍ଗ୍ବକ୍ନେ କାମ୍ ଆଡ଼ାତ୍ରା ଗରବ୍ ମାଡିଙ୍ଗ୍ଚେ ପେଇଂନେ ଗିରା ବାଏରେ ବିନ୍ ଦେସ୍ନ୍ନିଆ ଡିଗ୍ ନେନେ ନିମାଣ୍ଡା ସାମୁଆଁ ବାସଙ୍ଗ୍ ନେୟାଏ ।
ଦର୍ମ ସାସ୍ତର୍ନ୍ନିଆ ଗ୍ନୁଆର୍ଲେଃକେ “ଜାଣ୍ଡେ ଗରବ୍ ଡିଙ୍ଗ୍ନେ ଚାଏଁଏ ମେଁ ମାପ୍ରୁନେ କାମ୍ ନ୍ସା ଗରବ୍ ଡିଙ୍ଗ୍ଲେ ।” ଡାଗ୍ଲା ଜାଣ୍ଡେ ନିଜର୍ ପ୍ରସଂସା ଡିଙ୍ଗ୍ଏ, ମେଁ ପରିକ୍ୟା ନିମାଣ୍ଡା ଣ୍ଡୁ, ମାତର୍ ମାପ୍ରୁ ଜାଣ୍ଡେନେ ପ୍ରସଂସା ଡିଙ୍ଗ୍ଏ, ମେଁନେ ପରିକ୍ୟା ନିମାଣ୍ଡା ।
Gata Didayi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.