ସତ୍ ଗାଲି
ପ୍ରକାସିତ୍ 4
କିତଂନ୍ନିଆ ପାର୍ତନା
ଆକେନ୍ ବେଲା ନିଂ ଆରି ମୁଇଂ ଚିନ୍ ଙ୍କେକେ । କିତଂନ୍ନିଆ ମୁଇଂ ଗାଲି ରଃଡ଼ା ୱେଲେଃଗେ ବାରି ପ୍ନିଃ ସବ୍ଦ ରକମ୍ ମୁଇଂ ଲୁଗଃ ସବ୍ଦବାନ୍ ଆନିଂ ଆଦେସ୍ ମିଲେକେ; “ଆକ୍ଡାଗ୍ରା ତଃଡ଼ିଆ ପାଙ୍ଗ୍ଲା । ଆକେନ୍ ଇଡ଼ିଂ ମେଃନେ ସାପା ଗଟେନେ ୱେଡିଂକେ ଆତେନ୍ ନିଂ ଆନାଁକେ ଣ୍ଡ୍ରାସୁଏଃଏ ।” ସାଙ୍ଗେ ସାଙ୍ଗେ ପବିତ୍ର ଆତ୍ମାନେ ବାନ୍ ବାଚେ ନିଂ ଙ୍କେକେ କିତଂନ୍ନିଆ ମୁଇଂ ସିଂଆଁସନନ୍ନିଆ ମୁଇଂଡା ଜାଣ୍ଡେ କଲେଃକେ । ମେଁନେ ସାର୍ମୁଆଁଃ ଇରା ଆରି ମାଣିକ୍ୟ ସୁଗୁଆ ତ୍ନା ଡିଙ୍ଗେ ଆରି ସିଂଆଁସନକେ ମର୍କତ ମଣି ସୁଗୁଆ ମୁଇଂ ଇନ୍ଦ୍ରଦନୁ ସାଃଚେ ଲେଃଗେ । ବାରି ସିଂଆଁସନନେ ପିତୁର୍ ୱେକେ ରକମ୍ ଲଃଲେଃକ୍ନେ ବିନ୍ ୨୪ କ୍ଲିଗ୍ ସିଂଆଁସନନ୍ନିଆ ୨୪ ରୁଆ ବୟସ୍କ ମଣ୍ଡଲି ନେତା କଲେଃଆର୍ଗେ । ମେଁଇଂ ତୁଲୁଏ ସକା ସଃଲେଃକ୍ନେ ଆରି ମେଁଇଂନେ ବାଆଃ ଆଡ଼ାତ୍ରା ସୁନା ମୁକୁଟ୍ । 1ସିଂଆସନବାନ୍ ଲ୍ଲାଂତାର୍ନେ ତାର୍କିଗ୍ ବିନ୍ବିନ୍ ସବ୍ଦ ଆରି ଲ୍ଲାଙ୍ଗ୍ତାର୍ନେ ସବ୍ଦ ତାର୍ଡିଂଗେ । ସିଂଆସନ ଡାଗ୍ରା ଇସ୍ପର୍ନେ ଗୁକ୍ଲିଗ୍ ଆତ୍ମାନେ ଚିନା ଗୁକ୍ଲିଗ୍ କୁପିସ ଡୁଆଡିଂଗେ । ବାରି ସିଂଆଁସନ ଡାଗ୍ରା କାଞ୍ଚ୍ ସୁଗୁଆ ମୁଇଂ ନିମାଣ୍ଡା କେଣ୍ଡିଆଃ ତ୍ନାଡିଂଗେ । ସିଂଆସନକେ ମ୍ବାର୍ପାକା ଗେରେ ଲେଃଆର୍ଗେ ଅଁଣ୍ଡ୍ରୁଆ ଜିବ୍; ମେଁଇଂନେ ଗାଗ୍ଡ଼େନେ ସେଃମଁପାକା ଆରି ଆଲପାକା ମୁଆଁଃନ୍ନିଆ ତ୍ନଲେଃଗେ । ମୁଲ୍ ଜିବ୍ ସିଂଅଙ୍କୁ ସୁଗୁଆ ତ୍ନାଡିଂଗେ; ଦୁତିୟନେ ଗ୍ଲେଃ ସୁଗୁଆ ତ୍ନାଡିଂଗେ । ତୁର୍ତିୟନେ ସାର୍ମୁଆଁଃ ରେମୁଆଁନେ ସାର୍ମୁଆଁଃ ସୁଗୁଆ ଲେଃଗେ ବାରି ଚତୁର୍ତନେ ୱାଲେନେ ରାବନ୍ ପିଗ୍ ସୁଗୁଆ ତ୍ନାଡିଂଗେ । ସର୍ତେ ଜିବ୍ନେ ତୁର୍କ୍ଲିଗ୍ ଡେନା ଲେଃଗେ ବାରି ତେନ୍ଇଂନେ ବାଏରେ ଆରି ବିତ୍ରେ ଣ୍ଡିଗ୍ ମୁଆଁଃନ୍ନିଆ ତ୍ନଲେଃଗେ । ମେଁଇଂ ସ୍ମିମିଡିଗ୍ ମାପୁଣ୍ଡେ ବାବ୍ରେ ସାର୍ ଡିଂଆର୍ଗେ,
“ପବିତ୍ର, ପବିତ୍ର, ପବିତ୍ର ସାପାଟୁ ବପୁନେ ମାପ୍ରୁ ଇସ୍ପର୍ !
ଅଃସେବାନ୍ ଏଃକେ ଜାକ ଜା କାଲାଆଃ ଲେଃଣ୍ଡ୍ରେ ଆରି ବାର୍ମୁଇଂତର୍ ଜା ପାଙ୍ଗ୍ଏ ।”
ଜିବ୍ଇଂ ସିଂଆଁସନନ୍ନିଆ କଣ୍ଡ୍ରେ ଆତେନ୍ କାଲାଆଃ ମ୍ବ୍ରନେ ରେମୁଆଁକେ ଗୌରବ୍, ସନ୍ମାନ୍ ଆରି ଦନ୍ୟବାଦ୍ ବିଚେ ମେଁନେ ଅସ୍ମାର୍ ସାର୍ନେ ବେଲା, ଅଃସେନେ ୨୪ ରୁଆ ବୟସ୍କ ନେତା କାଲାଆଃ ମ୍ବ୍ରନେ ରେମୁଆଁନେ ସିଂଆସନ ଡାଗ୍ରା ମୁକ୍ଚିଚେ ମେଁନେ ଅସ୍ମାର୍ ସାର୍ନେ ମୁଲେ ଆର୍କେ । ବାରି ସିଂଆସନ ଆଲ ନିଜର୍ ନିଜର୍ ମୁକୁଟ୍ ବଚେ ବାସଙ୍ଗ୍ଆର୍କେ
“ଏ ନେଁନେ ମାପ୍ରୁ ଇସ୍ପର୍ !
ନାଁ ଆଃ ଗୌରବ୍, ସନ୍ମାନ୍ ଆରି ବପୁନେ ବାନେ ରେମୁଆଁ,
ଡାଗ୍ଲା ନାଁ ସାପା ବିସଏ ଆଃରେ ନାବକେ ।
ନିଜର୍ ଇକ୍ଚାରେ ଆତେନ୍ ସାପାକେ ଜିବନ୍ ବିନାବକେ ଜିବ୍ଇଂକେ ଆମ୍ବ୍ର ନାବକେ ।”
Source notes (1)
- Cross-reference ପ୍ରକାସିତ୍ ୮:୫; ୧୧:୧୯; ୧୬:୧୮; ପ୍ରକାସିତ୍ ୧:୪.
ସତ୍ ଗାଲି. Copyright © 2020 The Word for the World International. Licensed under CC BY 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY 4.0 · SourceEdition imported 2026-10-25.