Zakaraasa Tinbite 10

Goday Yuhuda Naaganaas Woththida Hidota

1GODAY inttes assura ira

immana mala woossite.

Ira shaara kiittizay GODAA;

izi ubbaa asas

gidiza ira immees;

issaas issaas tokkanaas

dooza immees.

2Eeqa xoossati

baleththo yo7o yooteettes;

Maroti wordo ajjuuta beyeettes;

kaayizayti wordo

agumo agumetteettes;

asakka coo hada yo7on

minththeththeettes;

hessa gishshas derey

heemmizaadey baynda dorsa mala

coo mela toylattishe qohettides.

3GODAY, «Ta hanqoy

heenththachchata bolla

tama mala eexxi kezides.

Deraa kaaleththizayta

ta qaxxayana.

Tani Ubbaafe Wolqqama GODAY

ba wude gidida Yuhuda asaa

olas giigida para mala ooththana.

4Yuhudappe gulan woththiza

shuchchi,

dunkaane toliza dhishkey,

ola tooraynne

dere ubbaa haarizay kezana.

5Istti ubbayka issi bolla

ogen diza urqqa yedhdhiza

mino olanchchata mala gidana;

GODAY isttara diza gishshas

paran olettizayta istti xoonana.

6«Tani Yuhuda keeth minththana;

ta isttas qadhettiza gishshas

istti kase dizasota istta zaarana;

tani GODAA istta Xoossa gidida gishshas

ta istta woosa siyana;

isttika hayssafe kase

ta yegga erontta

asa mala gidana.

7Efreeme asay

wolqqama asa mala gidana;

istta wozinay

woyne ushshu uyida

asa mala ufayettana;

istta nayti istta

beyananne ufayettana;

isttika GODAAN ufayettana.

8Tani istta wayqeththan xeygada

issi bolla shiishshana;

tumappe ta istta wozzana;

kase mala ta istta darsana.

9Tani istta dereta giddon laallikokka

istti heen haaho deren dishe

tana qoppana;

isttanne istta nayti

shemppora paxa attidi

guye simmana.

10Tani istta Gibxeppe kessana;

asooreppeka shiishshana;

isttas uttizasoy

un7anaashe gakkanaas

tani istta Gala7aadeninne

Libaanoosen shiishshana.

11Istti abba giddora

waayetti aadhdhana;

abba dambalay co7u gaana;

ciimma abbayka wuri miccana;

otoranchcha Asoore dere

asay kawuyana;

Gibxe Kawoteththa

xam7ay meqqana.

12Tani istta GODAAN minththana;

isttika iza sunththan

simerettana» gees.