Mazamure Maxaafa 92

Sambata Gallas Yexettiza Mazamure

1GODAA galatoy lo7o;

Abeet Ubbaafe

Dhoqqa Xoossawu!

Ne sunththaas

mazam-ure shiishoy lo7o.

2Maalado ne mernaa siiqo,

giddoth ne ammaneteth

awajjay lo7o.

3Tammu shayan waaxettida

bagananinne

maasinqo diixxishe awajjay lo7o.

4Abeet GODAWU! Ne ooththida

wolqqama oosoti

tana ufayssida;

ne kushey ooththida gishshas

tani ufayssan yexxays.

5Abeet GODAWU!

Ne oosoy ay keena gitaa!

Ne qofaykka ay keena ciimmaa!

6Hessa eeya asi eranawu dandayenna;

damma asikka

akeekanawu dandayenna.

7Iitati maata mala diccikokka,

gene ooththiza ubbati ciiykkoka

istti mernaas dhayana.

8Gido attiin abeet GODAWU!

Neni mernaas ubbaafe dhoqqa.

9Abeet GODAWU!

Ne morkketi dhayana;

iita ooththiza ubbati

piski gaanayssa nu eroos.

10Ta kaceza menththa

kace mala dhoqqisadasa;

lo7o zaytenkka tana tiyadasa.

11Ta morkketi xoonettidayssa

ta ayfen be7adis;

ta baalgaarata kundeth

ta ayfen be7adis.

12Xilloti zamba mala daayana;

qasse Libaanoose

xiidda mala diccana.

13Istti GODAA keeththan tokettida;

istti Xoossa Keeththa

zago gakkanaas daayana.

14Istti ceeggidikka ayfana;

istti ubba wode cililida malanne

minnida mala daana.

15Istti, «GODAY likke;

izi taas wogga zaalla;

iza bolla wosoy deenna» gaana.