Geeshsha Mexaafa
Mazamure Maxaafa 79
Aasaafe Mazamure
Abeet Xoossawu!
Kawoteththati
ne biitta worajjida;
geeshsha gidida
Xoossa Keeththa tunisida;
Yerusalaame laalli yeggida.1
Istti ne aylleta aha
salo kafotas
quma ooththidi immida;
qasse ne geeshsha asata asho
sa7a do7atas immida.
Istta suuth Yerusalaame yuushon
haaththa mala gussida;
istta aha
moogiza asi dhaydes.
Nu shoorotas nuni qilccas gididos;
nu heeran dizaytas qidhessinne
miichchas attidos.
Abeet GODAWU!
Hayssi awude gakkanaas
hananee?
Neni mernaas hanqettanee?
Ne qanaatey tama mala
eexxishe de7anee?
Nena erontta dereta bollanne
ne sunththa xeygontta
kawoteththata bolla
ne hanqoza gussa.
Ays giikko istti
Yaaqoobe zereththata
wodhidanne
istti de7izasozikka
mulera dhayssida.
Kase nu aawata nagara
nu bolla qoodoppa;
eeson ne maarotaa nuus kiitta;
ays giikko
nuni keehippe metotidos.
Abeet nuna ashshiza Xoossawu!
Ne sunththa bonchcho gishshas
nuna maadda;
ne sunththa gishshas nuna ashsha;
nu nagarakka atto ga.
Kawoteththati, Ays «Istta Xoossi
awan dizee?» gaanee?
Ne aylleta suuth
istti gussidayssa
neni halo kessizayssa
nu ayfey be7ishin
kawoteththata erisa.
Qasho asata ooley
ne sinth gakko;
Hayqos pirdettidayta
ne mino qesen ashsha.
Abeet Godawu!
Nu shooroti nena qidhidayssa
halo laappun kushe isttas zaara.
He wode nuni ne deretinne
nees wude dorsati
mernaas galata nees immana;
yeletappe yeleta gakkanaas
neni nuus ooththida oosoza
nu yootana.
Source notes (1)
- Cross-reference 2Kawo 25:8-10; 2Taari 36:17-19; Er 52:12-14
Geeshsha Mexaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.