Mazamure Maxaafa 76

Aasaafey Zammareta Kaabbos Diiththatan Yexxida Mazamure

1Xoossi Yuhudan erettides;

iza sunththika Isra7eelen gita.

2Iza dunkaaney Saleemen dees;

izas duussasoyka Xiyoone.

3Izi hessan dukkiza

wondafe yiishshaa,

gondalle, giththa mashshatanne

hara ola miishshata

menththereththi yeggides.

4Abeet Xoossawu!

Neni bonchcho may7ada

phoollaasa;

Ne teemateththi

gita zumatappeka aadhdhees.

5Gooba olanchchati bonqqettida;

isttafe issoyka ba kushe

denththana dandaybeenna;

istti wolqqama dhisko dhiskida.

6Abeet Yaaqoobe Xoossawu!

Ne hanqo gaason toga asatinne

toga parati kundi attida.

7Abeet Xoossawu! Neni yashshaasa!

Ne hanqoy suullida wode

ne sinththan oonee eqqanay?

8Neni saloppe pirda sissadasa;

biittay yayyada sirphi gadus.

9Abeet Xoossawu!

Hayssi sa7a bolla

un7ettidayta ashshanaas

neni pirdas dendiin handes.

10Neni as hanqikokka

hessi ne bonchchos gidees;

olappe attidayti

ne ba7aale bonchchana.

11GODAA intte Xoossaas adinite;

he adinettidayssaka gaththite;

iza yuushon diza ubbati

yashissiza izas

imota ekki yiite.

12Izi otorettiza daannata kawushshana;

wolqqama kawotakka izi yashissana.