Geeshsha Mexaafa
Mazamure Maxaafa 6
Dawiti Zammareta Kaabbos Osppun Shayan Waaxettida Diiththan Yexxida Mazamure
Abeet GODAWU! Yiillon tana seeroppa;
woykko ne hanqon
tana qaxxayoppa.1
Abeet GODAWU!
Tani daaburanchcha gidida
gishshas tana maara.
Abeet GODAWU!
Ta wozinay madunxida gishshas
tana paththa.
Ta shemppoya keeha un7ettadus;
histtiin GODAWU!
Tana maaddanaas
neni awude gakkanaas gam7anee?
Abeet GODAWU!
Neni simmada tana ashsha;
ne maaroteththa daron
tana kessa ekka.
Hayqqida asi ooninne
nena qoppenna;
duufon nena galatizay deenna.
Ta ceecen xalla daaburadis;
omars omars tani yeekkashe
ta hiixa caphisays;
ta borkoththaaka
ta afunththan musissays.
Ta ayfeti
daro afunxxida gishshas daaburda;
ta morkketa ubbaa gaasonkka
demo ixxida.
GODAY tani yeekkiza yeeho
siyida gishshas,
intteno iita ooththiza ubbatoo!
Taappe haakkite.2
GODAY ta shoobeththaa be7ides;
ta woosaakka siyides.
Ta morkke ubbati
yeellatananne dagammana;
qoppontta kawuyidi guye simmana.
Source notes (2)
- Cross-reference Maza 38:1
- Cross-reference Mato 7:23
Geeshsha Mexaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.