Geeshsha Mexaafa
Mazamure Maxaafa 4
Dawiti Zammareta Kaabbos Osppun Shayan Waaxettida Diiththan Yexxida Mazamure
Abeet ta xillo Xoossawu!
Tani xeygiza wode
ne taas koya.
Tani un7ettida wode,
neni tana shempisadasa;
taas qadhettada ta woosa siya.
Intteno asatoo!
Intte awude gakkanaas
ta bonchcho kawushshanee?
Intte awude gakkanaas
hada miish siiqanee?
Intte awude gakkanaas
wordo miish kaallanee?
GODAY xillo asata
baas shaakki
dumma woththidayssa
intte erite;
hessa gishshas tani GODAA
xeygiza wode
izi taas siyees.
Hanqettite; gido attiin
intte hanqon
nagara ooththofte.
Hiixan ichchi diza wode
sirphi giidi
intte wozina qorite.1
GODAAS bessiza yarsho yarshite;
GODAANKKA Xoossankka
ammanettite.
Daroti, «Nuna
lo7o bessanay
oonee?» geettes;
Abeet GODAWU!
Ne lo7o ayfesoy
nu bolla poo7o.
Kaththinne woyne ushshu
daro demmidi
harati ufayettizayssafe aaththada
neni ta wozina
ufayssan kunththadasa.
Abeet GODAWU!
Ne xalla tana saron naaga
ayssiza gishshas
tani ichchada saroteththan
dhiskays.
Source notes (1)
- Cross-reference Efe 4:26
Geeshsha Mexaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.