Geeshsha Mexaafa
Mazamure Maxaafa 36
Godaa Oosanchcha Dawiti Zammareta Kaabbos Yexxida Mazamure
Iita asi ba wozinan
gene qoppees;
iza giddon Xoossas
yashshateththi deenna.1
Iza nagaray qoncciin ixxontta mala
izi barkka bana baleththees
Iza doonappe ke7iza haasayay
genenne wordo;
aadho erateththinne lo7o ooso
mulekka aggides.
Izi ba hiixan dishe
gene qoppishe aqees;
bana lo7o gidontta
oge kaaleththees;
iita izi ixxenna.
Abeet GODAWU!
Ne mernaa siiqoy salo gakkees;
ne tumateththayka
bolla shaara mala dhoqqees.
Abeet GODAWU!
Ne xilloteththay
ubbaafe dhoqqa zumata mala;
ne pirdayka ubbaafe
ziqqa ciimma mala;
neni asaakka do7aakka
iitappe naagaasa.
Abeet Xoossawu!
Ne mernaa siiqoy
ay keena al7o!
Asay ne qefe giddon
geemmi attees.
Istti neson kumida maaddafe
miidi kaalleettes;
neni ne anjjo shaafappe
istta ushshaasa.
Ays giikko de7o pulttoy
ne achchan dees;
ne poo7on nuni poo7o be7oos.
Nena erizaytas
ne mernaa siiqoza aggofa;
suuretas ne kiyateth diggofa.
Otoranchchata tohoy
tana yedhdhofo;
nagaranchchata kushey
tana yedeththofo.
Iita asati kundidayssa be7ite;
istti kundida;
dendanawukka dandayettenna.
Source notes (1)
- Cross-reference Oro 3:18
Geeshsha Mexaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.