Geeshsha Mexaafa
Mazamure Maxaafa 24
Dawiti Yexxida Mazamure
Sa7aynne sa7an kumida
ubbay GODAASSA;
salo gufanththon diza
ubbay Xoossassa.1
Sa7aa gita abbata bolla miccides;
haaththa bollaka
minththidi essides.
GODAA zuma bolla kezanay oonee?
Iza geeshshasohon
eqqanay oonee?
Iza kushey nagarappe geeyiday,
iza wozinay geeshsha gididay,
eeqa xoossatas goynnonttay,
wordo caaqqonttay,2
izi GODAAPPE anjjo ekkana;
bana ashshiza Xoossafe
xillo pirda demmana.
Xoossako xeelliza asaynne
Yaaqoobe Xoossaa sinth
koyza asay heytantta mala.
Kareti doyettetto;
Bonchcho Kawoy gelo;
beni pengeti
iza ufayssan mokkite!
He Bonchcho Kawoy oonee?
Minonne wolqqama GODAA!
Olaska izi wolqqama GODAA!
Kareti doyettetto;
Bonchcho Kawoy gelo;
beni pengeti
iza ufayssan mokkite!
Ha Bonchcho Kawoy oonee?
He Bonchcho Kawoy
salo medheteththa GODAA!
Source notes (2)
- Cross-reference 1Qoro 10:26
- Cross-reference Mato 5:8
Geeshsha Mexaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.