Mazamure Maxaafa 22

Dawiti Zammareta Kaabbos Yexxida Mazamure

1Ta Xoossawu! Ta Xoossawu!

Tana ays aggadii?

Tana maadda gaada

tani waassishin

ays siyontta ixxadii?

Taappeka ays haakkadii?1

2Abeet ta Xoossawu!

Gallas kumeth

ta neekko waassishin

ne siyabeekka;

qamma ubbaankka neekko

waasoppe shempabeekke.

3Ne gidikko geeshsha kawo;

Isra7eele galatay

ne yuushon dees.

4Kase nu aawati

nenan ammanettida;

nenan ammanettiin

ne istta ashshadasa.

5Istti neekko waassiin ashshadasa;

nenan ammanettiin

istta yeellasabeekka.

6Tani guxune attiin

as gidikke;

tani asan kadhettidaadenne

ixettidaade.

7Tana be7ida ubbati qidheettes;

zaaridikka inxars

kessi qidheettes;

ba qoodhekka

ta bolla qaaththeettes.2

8Histtidi, «Izi GODAAN

ammanettides;

ane Xoossi iza ashsho;

izi ufayettidaa gidikko

ane iza maaddo» geettes.3

9Gido attiin ta wogara

yelettana mala maaddiday nena;

tani ta aayi dhanth

dhammishinkka

ne taas ammanettaasa.

10Tani yelettoosofe doommada

nenan diccadis;

ta aayey uloppe doommadakka

neni ta Xoossa.

11Metoy taakko

mati mati yiza gishshas,

tana maaddizaykka

baynda gishshas

neni taappe haakkofa.

12Daro morkketi korma boorata mala

tana giddoththida;

qayciza Baasaane biitta

boorata mala

tana dooddida.

13Menththereththi yeggidi

xaaggiza gaammo mala

ba doona ta bolla doyda.

14Tani haaththa mala goggadis;

ta meqeththati

someppe someppe kolettida.

Ta wozinay muqaadda mala

ta giddon seerides.

15Taas qoodhey kon7a mala melides;

ta inxarsay

gonggiraththara oykettides;

neni tana hayqqida asa mala

gudullan baanan yeggadasa.4

16Kanati tana giddoththida;

Iita asati tana dooddi oykkida;

Ta kushetanne

ta tohota shiishshi dhishkida.

17Tani meqeththata

qoodana dandayays;

ta morkketikka

tana phirxi histti xeelleettes.

18Ta may7oza gishetti ekkida;

ta adussa may7ozan

saama yeggida.5

19Abeet GODAWU!

Neni ha7i taappe haakkofa.

Abeet ta wolqqawu!

Tana maaddanaas eesota.

20Tana mashshafe ashsha;

ta shemppoyo

wolqqama kanatappe ashsha.

21Tana gaammota doonappe ashsha;

qayciza menththa kacezappe

tana naaga.

22Tani ne sunththa

ta ishatas yootana;

istti shiiqidasonkka

ta nena galatana.6

23Intteno GODAAS yayyizaytoo,

iza galatite!

intteno Yaaqoobe zereththatoo!

Ubbayka iza bonchchite!

intteno Isra7eele zereththatoo!

Ubbatikka bonchchon

izas yayyite!

24Izi naaqettidayssa kadhibeenna;

metotishin yeggi aadhdhibeenna;

ba sinththa izappe

genththibeenna;

izi maaddarkki gi waassiin

iza waaso siyides.

25Neni ooththida lo7o ooso gishshas,

derey shiiqidason galatana;

ta adinidayssa nena yayyiza

asaa sinththan gaththana.

26Hiyeesati miidi kallana.

GODAA koyzayti iza galatana.

Istti mernaas ufayettana.

27Sa7a gaxa gakkanaas diza asay

iza gishshas yuushshi qoppana;

GODAAKKO simmana.

Asa zere ubbay izas goynnana.

28Ays giikko maatay izassa;

kawoteththay ubbay izas haarettana.

29Sa7a bolla diza dureti

izas goynnana.

Bana hayqoppe ashshanawu

dandayontta biittan

baana asi ubbay

iza sinththan gulbatana.

30Buro yaana yeletay izas ooththana;

he yeletay kaalli yiza yeletas

Godaa ooso yootana.

31Istti iza xilloteththa gishshas

buro yaana yeletas yootana.