Geeshsha Mexaafa
Mazamure Maxaafa 19
Dawiti Zammareta Kaabbos Yexxida Mazamure
Saloti Xoossa bonchcho yooteettes;
salo gufanththoy
iza kushe ooso awajjees.
Issi gallassay hara gallassas
hessa yootees;
issi qammayka kaalliza qammas
erateth qonccisees.
Isttas haasayay
woykko qaalay baawa;
istta cenggurssikka siyettenna.
Gido attiin istta haasaya cenggurssi
sa7a ubbaan laalettana;
istta qaalaykka biitta gaxa gakkana.
Xoossi arshes
salon soho giigsides.1
Arshey mishiray ba keeththafe
keziza mala poo7i ke7ees;
gaadde woxxiza pilata
asa mala ufayettees.
Arshey kessasoppe
wuloso gakkanaas bees;
iza seelappe geemmi
attana miishshi deenna.
GODAA wogay suure;
shemppo zaari cil7isees;
GODAA azazoy ammanettizayssa;
akeekay paccidaytas
aadho erateth immees.
GODAA wogay likke;
wozina ufayssees.
GODAA azazoy geeshsha;
ayfe poo7isees.
GODAAS yashshi geeshshateththa;
izi mernaas eqqidi de7ana.
GODAA pirday
mulera tumanne xillo.
Worqqafenne muuruta worqqafe
aadhdhi dosettees;
eessafenne eessa ililoppe
aadhdhi mal7ees.
Qasse tana ne aylleza
naagettana mala zorees;
ne woga naagoy daro go7ees.
Ba bala demmizay oonee?
Abeet GODAWU!
Geemmida nagarappe
tana geeshsha.
Tani ne aylley,
xalateththan nagara
ooththontta mala
neni tana naaga.
Nagaray tana haaroppo;
he wode tani suure gidana;
gita mooroppeka geeyana.
Abeet GODAWU!
Ta zemppiza wogga zaallawu!
Tana wozzida ta Godawu!
Ta doonappe ke7iza qaalaynne
ta wozina qofay
nena ufayssizayssa gido.
Source notes (1)
- Cross-reference Oro 10:18
Geeshsha Mexaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.