Geeshsha Mexaafa
Mazamure Maxaafa 135
Intteno GODAA aylletoo!
Iza galatite!
GODAA sunththa sabbite!
Intteno GODAA Keeththan
ooththizaytoo!
Intteno nu Xoossa Keeththa zagon
eqqidayto galatite!
Izi kiya gidida gishshas
GODAA galatite!
Izi lo7o gidida gishshas
iza sunththaas yexxite!
GODAY Yaaqoobe
baas buzo ooththides;
Isra7eelekka baas
al7o miish histti doorides.
GODAY gita gididayssanne
nu GODAY xoossata ubbaafe
dhoqqizayssa tani erays.
Saloninne sa7an,
abbataninne ciimmata
ubbaa giddonkka
GODAY ba dosidayssa
ubbaa ooththees.
Kareththa shaara sa7a gaxappe
izi denththees;
izi irara wolqqanth kiittees;
ba minjji woththidasoppe
carko kessi yeddees.
Gibxe biittan asappe biidi
mehe gakkanaas
bayra yelettida ubbaa wodhides.
Nenoo Gibxe! Paaroone bollanne
iza oosanchchata bolla
ooraththinne malalisiza
miish yeddides.
Izi daro kawoteththata dhayssides;
wolqqama kawotakka wodhides.
Amooreta kawo Sihoone,
Baasaane kawo Aagenne
Kanaane kawota ubbaa wodhides.
Istta biittaaka ba deraa
Isra7eele laatissides.
Abeet GODAWU!
Ne sunththi mernaas daana;
yeletappe yeleta gakkanaas
neni hassa7ettana.
GODAY ba asaas pirdana;
izi ba aylletaskka qadhettana.
Kawoteththati goynniza
eeqa xoossati
birappenne worqqafe
asa kushen oosettidayta.
Isttas doonay dees shin
haasayettenna;
ayfey dees shin xeellettenna.
Hayththi dees shin siyettenna;
istta siidhen peenoykka deenna.
Istta medhdhidaytinne
isttan ammanettizayti ubbay
istta mala gidetto.
Isra7eele derezoo!
GODAA galatite;
Aaroone keeththa asatoo!
GODAA sabbite;
Lewe keeththa asatoo!
GODAA galatite;
GODAAS yayyizaytoo!
Ubbay GODAA galatite.
Yerusalaamen de7iza GODAY
Xiyoonen galatetto!
GODAY galatetto!
Geeshsha Mexaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.