Geeshsha Mexaafa
Leemiso Maxaafa 29
Daro wode seeriin ixxidi
ba morge zoodisida asi
hassa7ontta meqqana;
hessaades paxeteththika deenna.
Xillo asati maata oykkiza wode
asay ufayettees;
gido attiin iita asati
biitta haariza wode asay oolees.
Aadho erateth dosiza asi
ba aawa ufayssees;
gido attiin laymatara laggetizay
ba aqota dhayssees.
Tumaa pirdiza kawoy
ba dere woppu histtees;
gido attiin matta7e
maanaas yiiqetizay
ba deraa laallees.
Ba laggezas cimo haasayza asi
iza tohos woximade waaxees.
Iita asi barkka
ba nagaran oykettees;
gido attiin xillo asi
ufayetteessinne yexxees.
Xillo asi hiyeesatas
suure pirday
pirdettana mala qoppees;
gido attiin iita asi
hessa mala wudukka geenna.
Miirizayti kataman
shiro denththeettes;
gido attiin aadho erateththi diza
asati hanqo irixiseettes.
Aadho erateththi diza asi
eeya asara pirdaso biikko
eeyay hanqetteessinne qidhees;
izas saroykka deenna.
Suuth gussanaas jaamiza asati
suure as ixxeettes;
qasse xillo asaakka
wodhanaas koyeettes.
Eeya asi zaway baynda hanqeettes;
gido attiin aadho eranchchay
ba hanqo mittees.
Dere haarizaadey
wordo yo7o ekkiko
iza shuumeti ubbay
iita gideettes.
Hiyeesaynne as naaqqizaades
koththa miishshi dees;
GODAY nam7ataska
xeelliza ayfe immides.
Issi kawoy hiyeesas suure pirdiko
iza kawoteththa araatay
mernaas minni daana.
Xunduqi dishoy naytas
aadho erateth immees;
gido attiin yeda diccida nay
ba aayo kawushshees.
Iita asati maata oykkiza wode
nagaray darees;
gido attiin xilloti
istta kundeththaa be7ana.
Ne naa seera;
histtiko neni saro demmana;
izi nena ufayssana.
Ajjuutay bayndason
derey yeda daana;
gido attiin wogaa naagiza
asi anjjettidaade.
Ashkaray coo doonan yootiin
xalla erenna;
yo7oy izas gelizaakkoka
izi azazettenna.
Eeson haasayza as beyay?
Izappe eeya asas hidotay dees.
Asi ba aylle
naateteththafe doommidi
al7ison dichchiko
wurseththan izaade bolla
ceecey gakkana.
Hanqettiza asi
oosh denththeththees;
elle yiillotiza asi
daro nagara ooththees.
Otoroy as kawushshees;
gido attiin
ashketeththi bonchchisees.
Kaysora zuppetiza asi
bana ixxiza asa;
qanggi caaqisishin siyishekka
izi co7u gees.
Asas yayyizayssi
izaades woximade gidees;
gido attiin
GODAAN ammanettiza asi
saron de7ees.
Daroti dere haarizayta sinththan
erettana koyeettes;
gido attiin asas suure pirday
GODAA achchafe beettees.
Xilloti as baleththizayta
shaatetteettes;
Iitati suure asata ixxeettes.
Geeshsha Mexaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.