Geeshsha Mexaafa
Leemiso Maxaafa 18
Laggeteth koyontta asi
ba amo kaallees;
suure pirdaka ubbaa palqqees.
Eeyay ba qofa
qonccisanaaro xalla dosees;
gido attiin hara asappe
era ekkanaas dosenna.
Iitateththi kadhe kaaleththees;
yeellateththi yishin
kawushshateththi yees.
Asa doonappe ke7iza haasayay
ciimma haaththa mala;
aadho erateththa pulttoyka
xongettiza piissa haaththaa mala.
Iita as maaddidi,
xilloza pirda geellasizayssi
lo7o gidenna.
Eeya asa doonay iza bolla
oosh denththees;
iza doonappe ke7iza qaalay
iza bolla durqqa xeygees.
Eeya asa haasayay iza dhayssees;
iza metershati izas
woximade gideettes.
Zigiranchcha qaalay mal7o quma mala;
asas duge marace gakkees.
Azalla asi dhayssiza asas isha.
GODAA sunththi mino gimbe mala;
xillo asi hee woxxidi
iitappe attees.
Dureta dureteththi
isttas yuushoy
gimbettida katama mala;
istti bantta dureteththa
ke7ettontta
adussa gimbe mala qoodettees.
Asi kundanaappe kase
iza wozinay otorettees;
ashketeththi bonchchofe
sinththatees.
Lo7eththi siyontta dishe zaaroy,
izaades eeyateththinne
yeella gidees.
Asa ayanay
harge dandayana mala maaddees;
gido attiin ayanay
meqerettichchiko
iza ooni dandayanee?
Akeekanchcha wozinay
erateth koyees;
aadho eranchcha hayththi
minththi koyees.
Imotay immizaades oge doyees;
iza gita asatarakka erisees.
Baalgaaray yiidi
ba qaala immana gakkanaas
kasetidi yo7o haasaydaadey
xillo misatees.
Saama yessi palama teqqees;
nam7u wolqqama
baaligaaratakka shaakkees.
Qohettida ishay
gimbettida katamappe
aadhdhi minnees;
iza palamaykka gimbe penge
gordiza mino kolata mala.
Ba doonan haasaydaazappe
asi ba ulo kunththees;
ba inxarsafe ke7ida
yo7on kallees.
Inxarsa bolla hayqoynne
de7o wolqqay dees;
izo dosizayti izi ayfe meettes.
Machcho demmida asi
lo7o miish demmees;
hessaadey GODAAPPE
bonchcho ekkees.
Hiyeesa asi aadashidi haasayees;
gido attiin durey
dhechchi zaarees.
Lagge darssiza asi
baas meto darsees;
gido attiin ishappe aadhdhidi
ammanettiza laggey dees.
Geeshsha Mexaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.